ەلىمىزدىڭ تۇڭعىش پرەزيدەنتى ن.ءا.نازارباەۆ كەڭەستىك كەزەڭنىڭ وزىندە-اق توپ ىشىنەن سۋىرىلىپ شىققان بىلىكتىلىگىمەن دارا كورىنگەن دارىندى باسشى ەكەنىنە سان مارتە كوزىمىز جەتتى. ءبىز سول ەل تاۋەلسىزدىگى ءالى قولعا تيمەگەن, كەڭەستىك بيلىكتىڭ «ەكى تىزگىن, ءبىر شىلبىرى» كرەملدىڭ قولىندا تۇرعان كەزدە نۇرسۇلتان ءابىش ۇلىنىڭ تالاي مىنبەردەن شەشىلە سويلەيتىن شەشەندىگىنە, ءار فاكتىنى بۇگە-شىگەسىنە دەيىن دايەكتەپ بەرەتىن قابىلەت-قارىمىنا, رۋحى مىقتى ءورشىل مىنەزىنە قايران قالاتىنبىز. پارتيا ورگانىندا جۇرگەندىكتەن, ءوز باسىم ۇلاعاتتى ءار سوزىنە تەرەڭ ءۇڭىلىپ, كوكەيىمە ءتۇيىپ الاتىنمىن.
سول كەزدەگى بيلىكتىڭ ن.ءا.نازارباەۆتى تالاي تۇعىرى مىقتى باسشىلار اراسىنان قازاق كسر مينيسترلەر كەڭەسىنىڭ توراعاسى, كەيىننەن قازاقستان كومپارتياسى ورتالىق كوميتەتىنىڭ ءبىرىنشى حاتشىلىعىنا تاڭداپ الۋى ول كىسىنىڭ بويىنا بىتكەن تەكتىلىك پەن تۇلعاعا ءتان مىنەزىنىڭ بولۋىنان دەر ەدىم. ەلباسىمىز وسى ساناۋلى جىلدار ىشىندە تاريحتىڭ ساراڭ كوشىندە بۇعان دەيىن بولماعان, ءبىر عاسىردا اتقارىلار ۇلان-عايىر ۇلىلىقتى, تاڭدانارلىق تاماشا ىستەردى ومىرشەڭ ەتە ءبىلدى. بۇگىندە سول ءۇشىن حالقىنىڭ شەكسىز العىسى مەن قۇرمەتىنە بولەنىپ وتىر. پرەزيدەنتتىڭ عاسىرعا بەرگىسىز بۇل ەڭبەگىن بۇگىنگى جاستار, كەلەشەك ۇرپاق استە جادىنان شىعارماۋى ءتيىس.
ەلىمىز ءۇشىن توقسانىنشى جىلداردىڭ باسى وڭاي بولعان جوق. كەڭەس وداعى دەگەن مىزعىماس الىپ يمپەريانىڭ بۇزىلعان سەڭدەي اياق استىنان ىدىراۋى جاي حالىقتى دا, نەبىر سۇڭعىلا ساياساتكەردى سەڭ سوققان بالىقتاي ەتتى. ەلباسى بولسا سول تۇستا دانىشپان اباي ايتقانداي, «اقىرىن ءجۇرىپ, انىق باسىپ», ءالىپتىڭ ارتىن كۇتە وتىرىپ, حالقىمىزعا الدىمەن ءوز ەلىمىزدىڭ ەگەمەندىك دەكلاراتسياسىن قابىلداۋ قاجەت ەكەنىن ايتىپ, سودان سوڭ عانا تاۋەلسىزدىگىمىزدى جاريالاي الامىز دەپ ءتۇسىندىردى. قازاقستاننىڭ بولاشاق تاعدىرىنا الاڭداعان جۇرتشىلىقتى اۋىزبىرلىككە شاقىردى. سابىرلىلىق تانىتىپ, سالماقتى ساياسات ۇستانۋعا, جاڭا قوعامعا ادال قىزمەت ەتۋگە, توقىراۋعا تۇسكەن ەل ەكونوميكاسىن, الەۋمەتتىك-تۇرمىستىق جاعدايدى, ساياسي تۇراقتىلىقتى قىراعىلىقپەن دامىتۋدى وتانىن سۇيگەن ءاربىر قازاقستاندىق ازاماتتان تالاپ ەتتى. سول كەزەڭدە ايتقان نۇرسۇلتان ءابىش ۇلىنىڭ: «ەڭ باستىسى – ادام فاكتورى, ونىڭ ەركى, كۇش-جىگەرى تاباندىلىعى مەن ءبىلىمى. وركەندەپ دامۋ مەن تاۋەلسىزدىككە اتتار تابالدىرىقتىڭ التىن كىلتىن دە وسى شامادان ىزدەگەن ءجون» دەگەن دانالىق ءسوزى ءبارىمىزدى دە ەگەمەن ەلىمىز ءۇشىن ءمىنسىز قىزمەت ەتۋىمىزگە جەتەلەدى.
وسى ءبىر قيىن كەزەڭدە ءوز ومىرىمە ۇلكەن سەرپىلىس بەرگەن مىنا ءبىر وقيعانى ايتا كەتكەنىم ارتىق بولماس. جوعارعى كەڭەس تاريح ساحناسىنان كەتكەن سوڭ پرەزيدەنت اكىمشىلىگى مەنى قىزمەتكە شاقىرىپ, مەملەكەت باسشىسىنىڭ كومەكشىسى بولۋ لاۋازىمىن ۇسىندى. ارينە, وتە ابىرويلى قىزمەت, ال جاۋاپكەرشىلىگى ودان دا زور. بۇل ءالى جاس, بۋىنى قاتپاعان, تاۋەلسىز ەلىمىز ەندى عانا اياعىنان تىك تۇرعان اۋىر كەزەڭ بولاتىن.
ءدال وسى قيىن-قىستاۋ كەزەڭدە تاۋەلسىز مەملەكەتىمىزدىڭ الدىندا اسۋ بەرمەس نەبىر كۇردەلى ىستەر تۇردى. سونىڭ ەڭ ماڭىزدىسى – ىشكى ساياسي احۋالدى تەز جەتىلدىرىپ, تۇراقتىلىقتى بەكەمدەۋ كەرەك بولدى. ول ءۇشىن تەز ارادا قورعانىس جۇيەسىن قولعا الىپ, ەلىمىزدىڭ قاۋىپسىزدىگىن دامىتۋ ءبىرىنشى كەزەكتە تۇردى. مۇنىڭ ءوزى جاڭا دەموكراتيالىق قۇقىقتىق مەملەكەتىمىزدىڭ بىردەن ءبىر نەگىزگى ارقاۋى بولاتىن. ەل پرەزيدەنتى وسىنداي قىرۋار جۇمىستى اتقارا ءجۇرىپ, وسى قيىن كەزدە سالى سۋعا كەتكەن, ەرتەڭ نە بولارىن بىلمەي الاڭداعان قاراپايىم حالىق اراسىنا, ەڭبەك ۇجىمدارىنا بارىپ, ەل ىشىندەگى ساياسي احۋالدان كوزبە-كوز اقپاراتتار الۋعا ۋاقىت تاباتىن, پىكىر الماساتىن.
ءبىر كۇنى ەلباسىنىڭ قاراعاندى وبلىسىنا باراتىن ساپارىن ۇيىمداستىرۋ جونىندە تاپسىرما الدىق. بۇل وبلىس – كوپشىلىك بىلەتىندەي, رەسپۋبليكاداعى اۋىر يندۋستريانىڭ ۇلكەن وشاعى. سول كەزدە ول ەلىمىزدىڭ ەكونوميكاسىنداعى ءرولى زور, ءارى مىڭداعان جۇمىسشىنىڭ قوعامدىق-ساياسي ومىرىنە, تۇرمىس-جاعدايىنا جان بەرىپ تۇرعان بىردەن-ءبىر وندىرىستىك ورىن ەدى.
الدىمەن ادەتتەگىدەي ەلباسى ساپارىنىڭ باعدارلاماسىن, ءتيىستى ماتەريالدارىن دايىندادىق. پرەزيدەنتتىڭ بۇل وبلىستاعى جۇمىس كەستەسى وتە تىعىز بولدى. كۇن تارتىبىنە قاراعاندىدا سالىنعان جاڭا اۋەجايدى اشۋ, بىرقاتار ءوندىرىس ورىندارى مەن الەۋمەتتىك-تۇرمىستىق سالاداعى ۇيىمداردا بولۋمەن قاتار, ەڭبەك ۇجىمدارى جانە جەكە ازاماتتارمەن كەزدەسۋلەر وتكىزۋ كىرگىزىلىپ, بەكىتىلدى.
پرەزيدەنت بىزگە ساپارىن دايىنداۋ بارىسىندا تاپسىرما بەرىپ, قاراعاندى شاحتەرلەرىمەن مىندەتتى تۇردە كەزدەسەتىنىن, ناقتى ايتقاندا, وندا گورباچەۆ اتىنداعى شاحتانىڭ ۇجىمىمەن جۇزدەسەتىنىن قاداپ تۇرىپ ايتتى. سايكەسىنشە, اتالعان شاحتانى ساپار باعدارلاماسىنا ەنگىزىپ, جوبانى جۇمىس جۇرگىزۋ ءۇشىن وبلىس باسشىسىنا جىبەردىك. ارادا ءبىر ساعات وتىسىمەن ماعان قاراعاندى وبلىسىنىڭ سول كەزدەگى اكىمى پ.نەفەدوۆ قوڭىراۋ شالدى. ول گورباچەۆ اتىنداعى شاحتاعا بارۋ مۇمكىن ەمەس ەكەنىن, ويتكەنى وندا احۋال وتە قيىن, شاحتانىڭ توقتاۋ الدىندا تۇرعانىن, ەرەۋىل تۋىپ كەتۋى مۇمكىن ەكەندىگىن ايتتى. وسىعان بايلانىستى ەلباسىنىڭ اتالعان نىسانعا كەلۋى قيسىنسىز دەپ, ءبىزدى سەندىرۋگە تىرىستى. بۇل پرەزيدەنتتىڭ جەكە تاپسىرماسى دەگەنىمىزگە پ.نەفەدوۆ ءوزىنىڭ سوزىنە ارقاۋ بولعان سىلتاۋلارىن ءۇستى-ۇستىنە ءتوندىرىپ, دالەلدەي ءتۇستى. مەن دە ءوز تاراپىمنان ارەكەت ەتىپ, ەلىمىزدىڭ قوعامدىق-ساياسي تۇراقتىلىعى مەن قاۋىپسىزدىگىنە جاۋاپ بەرەتىن قىزمەت باسشىلارىمەن سويلەسىپ ەدىم, ولار دا وبلىس اكىمىنىڭ سەكەمىن راستادى. وسىعان بايلانىستى پرەزيدەنت اكىمشىلىگىمەن اقىلداسۋعا تۋرا كەلدى. ولار بار جاۋاپكەرشىلىكتى وزدەرىنە الدى دا, ەلباسىنىڭ گورباچەۆ اتىنداعى شاحتاعا بارۋىن كەستەدەن الىپ تاستادى.
نۇرسۇلتان ءابىش ۇلى قاراعاندى وبلىسىنا باراتىن ساپاردىڭ سوڭعى قۇجاتتارىمەن تانىسۋ بارىسىندا اتالعان نىسانداعى شاحتەرلەرمەن كەزدەسۋ كورسەتىلمەگەنىن بىردەن بايقاپ, بىزگە وتە ماڭىزدى ەسكەرتۋ جاسادى. كەلتىرگەن دالەلىمىزگە قاراماستان, گورباچەۆ اتىنداعى شاحتانىڭ ۇجىمىمەن كەزدەسەتىنىن نىقتاپ تۇرىپ ايتتى.
ەلباسى قاراعاندىعا كەلىسىمەن جاڭا اۋەجايدى اشىپ, قالاداعى بىرقاتار نىساندارمەن تانىسقان سوڭ, وبلىس اكىمىنە تۇستەن كەيىن گورباچەۆ اتىنداعى شاحتاعا باراتىنىن ەسكەرتتى. ءبىز شاحتاعا كەلگەندە اكت زالىنا كىرەبەرىستە توپتالعان حالىقتى كوردىك. جۇزدەرىنەن قاتتى تولقۋ ءبىلىنىپ, سۇستانىپ تۇرعان ەدى. پرەزيدەنت ولارمەن بايسالدى تۇردە جايدارى امانداسىپ, وبلىس اكىمى مەن شاحتا باسشىلارىنىڭ قوشامەتىمەن كەزدەسۋ ورنىنا ءوتتى. زالعا 500-دەي شاحتەر جينالدى. ولار ءوزارا داۋرىعىپ جاتتى. تورالقا تورىنە پرەزيدەنت, وبلىس اكىمى, شاحتا ديرەكتورى كوتەرىلدى. قىسقا كىرىسپە سوزدەن كەيىن بىردەن ەلباسىنا ءسوز بەرىلدى. نۇرسۇلتان ءابىش ۇلىنىڭ جارقىن داۋىسى ەستىلىسىمەن-اق, زال ءىشى سىلتىدەي تىنا قالدى.
شاحتەرلەر پرەزيدەنتتىڭ ەلدەگى جاعدايلار تۋرالى اشىق ايتقان ءار ءسوزىن مۇقيات تىڭدادى. كەڭەس وداعى كۇيرەگەننەن كەيىنگى ەلىمىز اۋىر ءحالدى باستان كەشىرىپ وتىرعانىن جاسىرماي, ەگجەي-تەگجەيلى ايتىپ بەردى. مەملەكەت قولدان كەلەر بارلىق مۇمكىندىكتەردى قاراستىرىپ, ەلىمىزدىڭ ىشكى ەكونوميكاسىندا جانە سىرتقى ساياساتىنداعى شيەلەنىسكەن ماسەلەلەردى شەشۋدە ءتيىمدى ءىس-شارالار قابىلدانعانىن تەرەڭ تۇرعىدا ءتۇسىندىردى. سونداي-اق قاراعاندىداعى بارلىق ەكونوميكالىق ءوندىرىس كەشەندەرى مەن شاحتەرلەردى بۇل قيىن جاعدايدان شىعارۋدىڭ ءتيىمدى جولىن, قولدانىلاتىن ءىس-شارالار تۋرالى جان-جاقتى بايانداپ, باعىت-باعدارىن كورسەتتى. ءسويتىپ, سۋىعان كوڭىلدەرگە جىلۋ بەردى. ءسوز اياقتالعاندا, سارتىلداي سوعىلعان شاپالاقتان قۇلاق تۇندى. پرەزيدەنتتىڭ دالەلدى دە شىنايى سوزىنەن كەيىن ەرەۋىل ۇيىمداستىرۋعا نيەتتەنگەن وكىلگە ءسوز بەرىلگەندە, ول نە دەرىن بىلمەي, ءسوزىن قىسقا قايىرىپ, مىنبەردەن ءتۇسىپ كەتتى.
بۇل ايتۋعا عانا وڭاي. ءدال سول كەزدە اشىنىپ, اشۋعا مىنگەن شاحتەرلەردىڭ ورتاسىنا بارۋ وتە قاۋىپتى بولاتىن. مۇنى وبلىس اكىمدىگى دە, ارنايى قىزمەت وكىلدەرى دە, ول كىسىنىڭ جەكە قاۋىپسىزدىگىنە جاۋاپتىلار دا قانشا ايتىپ, ايعاقتاپ بەرسە دە, پرەزيدەنت قايمىقپاي, اسا باتىلدىق تانىتتى. «كوز كورسە ءجۇز ۇيالادى» دەگەندەي, ەڭبەكشى حالىقپەن كوزبە-كوز, جۇزبە-ءجۇز وتىرىپ, قيىن كەزەڭنىڭ ءمان-جايىن شىنايى ءتۇسىندىرىپ بەرۋدىڭ ارقاسىندا ءوندىرىسى اسا كۇردەلى وڭىردەگى تۇراقتىلىق ساقتالىپ, قالدى. بۇل مەملەكەت باسشىسىنىڭ قانداي قيىن جاعداي بولسا دا ادامدارمەن ءتىل تابىسا الاتىنىن ايعاقتاپ بەرگەن وقيعا بولدى.
پرەزيدەنتتىڭ كوكەيىندە جۇرگەن تاعى ءبىر ونەگەلى ءىسى – ۇلت تاعدىرى, ونى قۇرايتىن ادام ءومىرىنىڭ قىمباتتىلىعى, ۇرپاق وسىرۋدەگى وراسان ورنى ەش نارسەمەن ولشەنبەيتىندىگىن ەرەكشە قادىرلەۋى دەر ەدىم.
ماسەلەن, ءبىزدىڭ حالقىمىز ءۇشىن 1930 جىلداردىڭ باسىنداعى اشارشىلىق, ودان كەيىنگى جاپپاي قۋعىن-سۇرگىن, عاسىرلار بويى ۇمىتىلمايتىن قايعى – ورنى تولماس وكىنىش. وسى قاتىگەز ناۋبەت كەزىندە ميلليونداعان قازاق اشتان قىرىلدى. كوبىسى امالسىزدان باس ساۋعالاپ, وزگە ەلگە اۋا كوشتى. كەيبىرى جول-جونەكەي اشتان ءولىپ, اۋرۋدان قىرىلدى, امان قالعانى سويىلعا جىعىلدى. ارنايى ورگاننىڭ بەرگەن مالىمەتىنە قاراساق, قازاقتاردىڭ سانى 1926 جىلى 3 968 289 بولسا, ارادا ون ءبىر جىل وتكەندە ەكى ميلليونعا دەيىن كەمىپ كەتكەن. بۇل جىلدارى كەيبىر مالىمەتتەرگە سۇيەنسەك, قازاقستان اۋماعىنان ءبىر ميلليوننان استام ادامنىڭ اۋىپ كەتكەنى بەلگىلى. ال شىندىعىندا قانشا ادامنىڭ وپات بولعانىن ءبىر قۇداي بىلەدى. بۇل تۋرالى تاريح «جۇمعان اۋزىن اشپايدى». تەك 1970 جىلى عانا قازاقتاردىڭ سانى سول كەزدەگى كورسەتكىش دەڭگەيىنە ازەر جەتكەن.
ەلىمىزدىڭ تۇڭعىش پرەزيدەنتى ن.ءا.نازارباەۆ ءوزىنىڭ قازاقستان حالقى اسسامبلەياسىنىڭ ءحىح سەسسياسىندا جاساعان بايانداماسىندا: «سول جىلدارداعى اشتىقتىڭ زاردابى بولماعاندا, وندا بۇگىنگى قازاقتاردىڭ سانى كەم دەگەندە 40-50 ميلليون دەڭگەيىندە بولار ەدى» دەپ اششى شىندىقتى بۇكپەسىز ايتقان بولاتىن. وسىعان وراي ءبىر وقيعانى ايتقىم كەلىپ وتىر.
ەلباسى بىردە ماعان: «اقان, بەلگىلى قوعام قايراتكەرى, قۇراندى قازاق تىلىنە اۋدارعان تەولوگ عالىم, كەزىندە اشتىق پەن ناۋبەت جىلدارى شەتەلگە ءوتىپ كەتكەن حاليفا التاي ەلگە ورالىپتى. ءبىز بۇل كىسىلەرگە نازار اۋدارىپ, جاعداي جاساۋىمىز كەرەك. مەنىڭ سول كىسىمەن كەزدەسۋىمدى ۇيىمداستىرىڭدار. حال-جاعدايىن, قالاي ورنالاسقانىن بىلىڭدەر. ءوز وتانىندا عىلىمي جۇمىس, قوعامدىق قىزمەتپەن اينالىسۋعا مۇمكىندىك جاسالعان با, سونى انىقتاڭدار», – دەپ تاپسىرما بەردى.
ارادا بىرنەشە كۇن وتكەندە مەن حاليفا التايدى پرەزيدەنت قابىلداۋىنا شاقىردىم. قادىرمەندى اقساقال كەلگەن كەزدە سىرتقا شىعىپ قارسى الدىم. مەنىڭ كوز الدىمدا پاراساتتى, جيناقى, كوزىنە مۇڭ ۇيالاعان قاريا ادام تۇردى. نۇرسۇلتان ءابىش ۇلى قادىرلى قوناقتى ىستىق ىقىلاسپەن قارسى الىپ, ەمەن-جارقىن وتىرىپ ۇزاق اڭگىمەلەستى. نەبىر كەلەلى ماسەلەلەردى اڭگىمەگە وزەك ەتتى. حاليفا التايدىڭ جاعدايىن ءبىلىپ, قازىرگى تۇرمىس-تىرشىلىگىمەن جان-جاقتى تانىسقانى ەسىمدە. كەزدەسۋ اياقتالعان سوڭ پرەزيدەنت حاليفا التايدى شىعارىپ سالدى دا, سول ارادا بىزگە بىرقاتار تاپسىرما بەردى. قالاي ورنالاسقانىن ارنايى بارىپ كورۋدى, دۇرىس جاعداي تۋعىزۋ كەرەكتىگىن, عىلىمي قىزمەتپەن اينالىسۋى ءۇشىن قولايلى ءارى بارىنشا مۇمكىندىك جاساپ بەرۋدى نىقتاپ ەسكەرتتى.
پرەزيدەنتىمىز ەل ادامدارىنا, ونىڭ ىشىندە ادەبيەت, مادەنيەت, ونەر مەن عىلىم سالاسىنا سۇبەلى ۇلەس قوسقان ءىرى تۇلعالارعا قامقورلىق كورسەتۋدەن استە ايانىپ قالعان ەمەس. مۇنداي مىسالدار وتە كوپ جانە ءبىز پرەزيدەنتتىڭ وسى ءتالىمى زور كەزدەسۋىنەن ءار كەزدە مول رۋحاني بايلىق الاتىنبىز.
كەزىندە ەل استاناسىن اقمولاعا كوشىرۋگە باستاماشى بولعان تۇڭعىش پرەزيدەنتىمىز ەكەنىن بارشا جۇرت بىلەدى. ال تاۋەلسىز قازاقستان ەندى عانا ەس جيعان تۇستا اسا كورەگەن مەملەكەت باسشىسىنىڭ الىستى بولجاي بىلەتىن بۇل ساياسي شەشىمى ەلىمىز ءۇشىن دە, ءبىز ءۇشىن دە ويعا كەلمەگەن توسىن سىي بولدى. جوعارعى كەڭەستىڭ 1994 جىلعى سەسسياسىنا كانيكۋلعا شىعار الدىندا جينالدىق. جوعارعى كەڭەستىڭ وتىرىسىنا پرەزيدەنت ن.ءا.نازارباەۆ قاتىستى. ماجىلىستە نەگىزىنەن اعىمداعى جانە ەل ومىرىندەگى ماسەلەلەر جانە سوعان قاتىستى پروبلەمالاردى قۇقىقتىق جاعىنان قامتاماسىز ەتۋ جايى تالقىلاندى. ەلباسى ءوزىنىڭ سوزىندە استانانى اقمولا قالاسىنا كوشىرۋ جونىندە ۇسىنىسىن ايتتى. مەملەكەت باسشىسىنىڭ دالەلى سونشالىقتى ناقتى ءارى سەنىمدى, بارلىق تۇرعىدا نەگىزدى بولعاندىقتان, نۇرسۇلتان ءابىش ۇلىنىڭ ۇسىنىسىن ءبىراۋىزدان قولداپ, ءتيىستى قۇجاتتى قابىلدادىق.
وسىلايشا ەلىمىز ءوزىنىڭ جاڭا استاناسىنا قونىس اۋدارۋ جۇمىسىنا كىرىسىپ كەتتى. ءبارىمىز دە بۇل ۇلى كوش كەمىندە بەس-جەتى جىلدان كەيىن باستالاتىن شىعار دەپ ويلاعانبىز. الايدا ءبىز ويلاعانداي ەمەس, ارادا ەكى جىلعا جەتەر-جەتپەس ۋاقىتتا كوشتىڭ الدى اقمولاعا قاراي بەت تۇزەدى. 1997 جىلدىڭ جەلتوقسان ايىندا مەملەكەتتىك ورگاندار بىرىنەن كەيىن ءبىرى اقمولاعا كوشىپ كەلدى. بۇگىنگى تاڭدا ەلوردامىز الەم تانىعان اسەم شاھارعا اينالدى.
تاۋەلسىز مەملەكەتىمىزدىڭ جاڭاشا تاريحىنىڭ ءار كۇنى مەن اتقارىلىپ جاتقان ىرگەلى ىستەردىڭ ءبارى دە ەلباسىمىزدىڭ ايتقان اقىل-كەڭەسى, دانالىق شەشىمدەرى جارقىن بولاشاق ومىرىمىزگە ازىق بولار سارا جول ەكەنى كۇمانسىز. نۇرسۇلتان ءابىش ۇلىنىڭ باتىل شەشىمىمەن ەلىمىزدىڭ تاريحىندا التىن ارىپپەن جازىلعان, ءالى دە جازىلىپ جاتقان ورەلى ىستەرى وتە كوپ. سونىڭ بىرنەشەۋىن اتاپ كەتكەنىم ارتىق بولماس.
تاۋەلسىزدىگىمىز ءالى جاريالانا قويماعان تۇستاعى حالقىمىزعا اجال وشاعى بولعان سەمەي يادرولىق سىناق الاڭىن جاپتىرۋعا جانە ادامزات بالاسىن قىرىپ-جويۋدىڭ الاپات قارۋى – يادرولىق قارۋدان باس تارتۋى, ءتول تەڭگەمىزدى جاساتىپ, ۇلتتىق قورىمىزدى قۇرۋى, ەل شەكاراسىنىڭ بەكىتىلۋى, اسا ستراتەگيالىق ماقساتپەن ەل استاناسىن اقمولاعا كوشىرۋى تىكەلەي ءوز اتىمەن بايلانىستى تۇڭعىش پرەزيدەنتىمىزدىڭ ەسىمى, ەلباسى دەگەن مارتەبەسىمەن بىرگە قازاق ەلىنىڭ دامۋ تاريحىندا ەرەكشە ورىن العان وراسان زور ءرولى بار لايىقتى وقيعا رەتىندە جازىلارى كۇمانسىز.
اقان بيجانوۆ,
بعم فيلوسوفيا, ساياساتتانۋ جانە ءدىنتانۋ ينستيتۋتىنىڭ ديرەكتورى, ۇعا كوررەسپوندەنت-مۇشەسى, ساياسي عىلىمدار دوكتورى, پروفەسسور
