سۋرەت «ەگەمەن قازاقستاننىڭ» ارحيۆىنەن الىندى
ۇلىبريتانيانىڭ ەكس-پرەمەر-ءمينيسترى مارگارەت تەتچەردىڭ كەزىندە ايتقان: «قازىر جاھاندىق ساياساتتا 5-6 ءىرى جانە ىقپالدى ساياساتكەر بار. سولاردىڭ ءبىرى – نۇرسۇلتان نازارباەۆ. مەن وعان سەنەمىن جانە ونىڭ بارلىق باستامالارىن قولدايمىن» دەگەن ءسوزىنىڭ قۇندىلىعىنا تاعى دا كوزىمىز جەتە تۇسەدى.
شىندىعىندا, الەمنىڭ ساياسي كارتاسىندا جاڭادان پايدا بولعان جاس مەملەكەت قازاقستاننىڭ تۇڭعىش پرەزيدەنتىنىڭ باسشىلىعىمەن, بىرەگەي تۇلعاسىمەن جانە بيىك بەدەلىنىڭ ارقاسىندا الەمدەگى بەدەلدى ءارى ورنىقتى ەلگە اينالدى.
قازاقستان پرەزيدەنتى ق.توقاەۆ «تاريحي تۇلعا تاعىلىمى» اتتى ماقالاسىندا ەلباسىنىڭ قايراتكەرلىك قاسيەتىنە توقتالا وتىرىپ, «تاريح جولى تاقتايداي تەگىس, ءتۇزۋ بولا بەرمەيدى. بۇرىلىسى مەن قالتارىسى ءجيى كەزدەسەتىن ءداۋىردىڭ سىنشىسى دا كوپ. ال ناقتى ءارى باتىل ءىس-ارەكەتكە بارا الاتىن ادامدار سيرەك. مۇنداي تۇلعالار تاريحتى تۇزەدى, جاڭا زاماندى العا جەتەلەيدى. مىنە, نۇرسۇلتان ءابىش ۇلى – وسىنداي ايرىقشا ەرىك-جىگەرىمەن ەرتەڭگى كوكجيەككە باتىل قاراي بىلگەن بىرەگەي رەفورماتور, الەم مويىنداعان مەملەكەت قايراتكەرى. ول – تاۋەلسىز ەلدىڭ ءتول تاريحىن ءوز قولىمەن جاساعان تەگەۋرىندى تۇلعا! ەلباسىمىز الەمنىڭ ەڭ ازۋلى ەلدەرىنىڭ باسشىلارى مەن ساياسي قايراتكەرلەرى قۇرمەت تۇتاتىن بيىككە كوتەرىلىپ, ەلىمىز حالىقارالىق قوعامداستىقتىڭ بەلدى دە بەدەلدى مۇشەسىنە اينالدى. بۇل – كۇرمەۋى قيىن كۇردەلى كەزدەردە حالىقتى اۋىزبىرشىلىك پەن تاتۋلىققا جۇمىلدىرىپ, ەسكى تۇسىنىكتەن نارىقتىق قوعامعا وتكىزگەن جانە الەمدىك ەكونوميكانىڭ بەلسەندى قاتىسۋشىسىنا اينالدىرعان نۇرسۇلتان نازارباەۆ فەنومەنى» دەپ ۇلكەن تەبىرەنىسپەن اتاپ ءوتتى.
ويلانىپ قاراساق, نۇرسۇلتان نازارباەۆتىڭ لاۋازىمىنداعى «تۇڭعىش» ءسوزىنىڭ ءتۇپ-توركىنى مەن تاريحي مازمۇنى دا تەرەڭدە جاتىر. بىرىنشىدەن, «جولباسشى» ۇعىمىمەن ۇندەسەدى. 1991 جىلى قازاقستان حالقىن نە كۇتىپ تۇرعانىن بولجاي المايتىن كەزەڭدە ەلباسى ەلدى دامىتۋ جولدارىن ايقىنداۋدىڭ العاشقى باتىل قادامدارىن جاسادى. تىڭعا تۇرەن سالۋدىڭ قانشالىقتى قيامەت ەكەنىن تەك «تۇڭعىش» قانا بىلەدى, «تۇڭعىش» قانا تۇسىنەدى.
قازىرگى ساتتە «تۇڭعىش» ءسوزى «قازاقستان جولى» ۇعىمىمەن دە تىعىز بايلانىستىرىلادى, ياعني بۇل – سەمەي يادرولىق پوليگونىنىڭ جابىلۋى, بۇرىنعى كەڭەستىك رەسپۋبليكالاردىڭ ىدىراۋى كەزەڭىندە جاريالانعان ەۋرازيالىق يدەيا, الەمدىك ءداستۇرلى دىندەر ليدەرلەرىنىڭ سەزى, ازياداعى ءوزارا ءىس-قيمىل جانە سەنىم شارالارى جونىندەگى كەڭەس, سونداي-اق بۇكىل الەم كۇتكەن ەقىۇ ءسامميتى جانە قازىردىڭ وزىندە ىسكە اسىرىلعان «قازاقستان-2030» ستراتەگياسى, ەكسپو-2017, تاعى باسقا شارالاردىڭ ءتول شەجىرەسى.
«تۇڭعىش» ءسوزىنىڭ تاعى ءبىر ماعىناسى – ء«بىرىنشى بولۋ», ياعني «كوشباسشىلىق». تاۋەلسىزدىكتىڭ بارلىق كەزەڭىندە نىساناعا ءدال تيەتىن سوزدەر مەن يدەيالار تابا ءبىلۋ, ادامداردى توپتاستىرۋ جانە سوڭىنان ەرتە ءبىلۋ – بۇنىڭ بارلىعى ەلباسىنىڭ ساياسي قولتاڭباسىنىڭ ايرىقشا بەلگىسىنە اينالدى.
«تۇڭعىش» ءسوزىن – «جەڭىمپاز, چەمپيون» دەپ تە قاراستىرۋعا بولادى. ويتكەنى جەڭىسكە جەتۋ – ساياساتكەردىڭ ايرىقشا ونەرى جانە كوشباسشىنىڭ ەڭ ماڭىزدى قاسيەتى.
قازاقستان ءوزىنىڭ وسىنداي كوپ قىرلى, سان سالالى, بەساسپاپ تۇڭعىش كوشباسشىسىمەن اسقار اسۋلار مەن بيىك بەلەستەردى باعىندىردى.
قازىر وتىز جىل ارتقا شەگىنىپ, تاۋەلسىزدىك شەجىرەسىنە ۇڭىلگەندە ازاتتىق العان قازاقستاننىڭ اياققا تۇرىپ كەتەرىنە كۇماندانعان, سىناي قاراعانداردىڭ كوپ بولعانى ەسكە تۇسەدى. كەرىسىنشە, تىلەۋلەس بولعان, جاناشىرلىق تانىتقان جانە داڭقى ارتقان قازاق ەلىن ءوز كوزىمەن كورۋگە اسىققان, ەلباسىمەن كەزدەسۋگە قۇشتار مەملەكەت باسشىلارى دا جەتەرلىك ەدى. سولاردىڭ ءبىرى قازاقستان تاۋەلسىزدىگىن جاريالاعاندا تاڭنىڭ اتقانىن كۇتپەي, سول كۇنى ەڭ ءبىرىنشى قۇتتىقتاعان سول ۋاقىتتاعى تۇركيا رەسپۋبليكاسىنىڭ پرەزيدەنتى تۇرعىت ءوزال-تۇعىن. تۇركيا باسشىسى العاشقىلاردىڭ ءبىرى بولىپ ەلىمىزگە ارنايى ساپارمەن كەلىپ, ەلباسىمەن بىرگە الماتى قالاسىنداعى تۇڭعىش 5 جۇلدىزدى «انكارا» قوناقۇيىنىڭ ىرگەتاسىن قالادى. قوجا احمەت ياساۋي كەسەنەسىنە زيارات ەتىپ, تۇركىستان قالاسىنداعى حالىقارالىق قازاق-تۇرىك ۋنيۆەرسيتەتىن اشۋ تۋرالى كەلىسىمگە قول قويدى.
اتاتۇرىكتىڭ ء«بىزدىڭ كورشىمىز, كەڭەس وداعى كۇندەردىڭ كۇنى قۇلايدى. بىراق ول جەردە ءبىزدىڭ قانداس باۋىرلارىمىز بار. ءبىز ولارمەن بايلانىستى ۇزبەۋىمىز كەرەك. ءبىز سوعان دايىن بولۋعا ءتيىسپىز. ءتىل دەگەن – ءبىر كوپىر, تاريح – ءبىر كوپىر, مادەنيەت دەگەن – ءبىر كوپىر, وسى كوپىرلەردى قۇلاتپاۋىمىز قاجەت. سول باۋىرلارىمىزبەن ءبىز وتە جاقىن قارىم-قاتىناستا بولۋعا مىندەتتىمىز», دەگەن اماناتى جۇزەگە استى.
قازاقستان رەسپۋبليكاسى پرەزيدەنتى پروتوكولىن باسقارعان جىلدارى نۇرسۇلتان ءابىش ۇلىنىڭ كۇن دەمەي, ءتۇن دەمەي جۇمىس ىستەپ, قازاقستان اتتى جاس مەملەكەتتى الەمدىك قاۋىمداستىققا ەنگىزۋ جولىنداعى تىنىمسىز ساتتەرىنە سان مارتە كۋا بولدىم. ءتىپتى رەسمي كەزدەسۋلەردەن كەيىن دە كۇردەلى كەلىسسوزدەر جۇرگىزىپ, جەكە سىيلاستىعى مەن دوستىعىنىڭ ارقاسىندا قيۋى قاشقان ماسەلەلەردىڭ قيسىنىن كەلتىرەتىن. الايدا الپاۋىت ەلدەردىڭ باسشىلارىنا ءسوزىن وتكىزۋ, ورتاق شەشىمگە, مامىلەگە كەلۋ, ولاردى ەل بولاشاعىنا سەندىرۋ وڭاي ەمەستىگىن بايقايتىنبىز. مەملەكەت ليدەرىنىڭ يىعىنا تۇسكەن جۇكتىڭ ءزىل-باتپان اۋىرلىعى مەن تاريحي جاۋاپكەرشىلىگى بىزگە دە سەزىلەتىن.
اقش-تىڭ بۇرىنعى پرەزيدەنتى دجوردج بۋش ءبىر سوزىندە قازاقستاننىڭ ساياسي جانە ەكونوميكالىق رەفورمالاردا ۇلكەن تابىستارعا قول جەتكىزگەنىن ايتا كەلە, بۇل جەتىستىكتەر ەلباسىنىڭ ماڭداي تەرىنىڭ اقتالعانىن كورسەتەتىنىن اتاپ وتكەن ەدى.
قازىرگى تاڭدا تاۋەلسىزدىكتى بىزبەن قاتار العان 15 وداقتاس مەملەكەتتىڭ ساياسي جاعدايى مەن ەكونوميكالىق دامۋىنا, حالىقارالىق ارەناداعى ابىروي-بەدەلى مەن حالقىنىڭ تۇرمىسىنا قاراپ, ەلباسى ەڭبەگىنىڭ شىن مانىندە وتەلگەنىنە جانە بۇگىنگى ۇرپاق جەمىسىن كورىپ وتىرعانىنا قۋانامىز.
اسىرەسە قازاقستاننىڭ تۇركياداعى توتەنشە جانە وكىلەتتى ەلشىسى قىزمەتىمدە باۋىرلاس تۇركيا رەسپۋبليكاسىنىڭ بارشا ساياساتكەرلەرى مەن ساراپشىلارى, ىسكەر ازاماتتارى ەلباسىمىزدى تۇرىك ۇلتىن تورگە شىعارعان اتاتۇرىكپەن سالىستىرىپ, تۇركى الەمىنىڭ داناگويىنە, ماقتانىشىنا بالاپ جاتاتىنىن ءجيى ەستىدىك.
جالپى, تۋىستاس ەلدەر تۇڭعىش پرەزيدەنتىمىزدىڭ «اق تەڭىزدەن التايعا دەيىنگى ۇلكەن كەڭىستىكتە ءومىر ءسۇرىپ جاتقان تۇركى حالىقتارى 200 ميلليونعا جۋىق. ولار بىرىگىپ, تاتۋ بولىپ, ىنتىماقتاستىعىن ارتتىرسا, وزدەرىن الەمگە ابدەن تانىتا الادى» دەگەن ۇستانىمىن ايرىقشا قاستەرلەيدى.
2016 جىلعى تۇركيا مەن رەسەي اراسىنداعى داعدارىستا اراعايىندىق جاساپ, بىتىمگەرلىك تانىتۋى وسى جاعدايعا الاڭداپ وتىرعان جان-جاقتاعى جۇرتشىلىقتىڭ كۇپتى كوڭىلىن باسىپ, كەرىسىنشە سەنىمىن ەسەلەپ ءوسىرىپ جىبەردى. باۋىرلاس حالىقتىڭ بىلتىر تۇركىتىلدەس مەملەكەتتەر ىنتىماقتاستىعى كەڭەسىنىڭ ءومىر بويعى قۇرمەتتى توراعاسى مارتەبەسىن بەرۋى – ەلباسىنىڭ ساياسي جانە تاريحي ءرولىن تالاسسىز مويىنداۋى دەپ قابىلداۋعا بولادى.
تۇڭعىش پرەزيدەنتىمىزدىڭ جارلىعىمەن تۇركىستان وبلىسىنىڭ قۇرىلىپ, كيەلى تۇركىستان قالاسىنىڭ قايتا جاڭعىرۋى دا – تۇركى دۇنيەسىن ەلەڭ ەتكىزگەن وزگەرىستىڭ ءبىرى. ەلباسىمىزدىڭ ۇزاق جىلدان بەرى «تۇركىستان – تۇركى دۇنيەسىنىڭ ورتالىعى بولۋى ءتيىس» دەگەن وي-پىكىرىنىڭ بىرتىندەپ ورىندالىپ, از عانا ۋاقىتتىڭ ىشىندە تۇرعىزىلعان كوركەم شاھار تۇگەل تۇركىنىڭ تورىنە, رۋحاني ورتالىعىنا اينالار كۇن الىس ەمەس. الداعى جىلعا جوسپارلانعان تۇركىستاندا وتەتىن تۇركىتىلدەس ەلدەردىڭ ءسامميتى ورتالىق ازيا ەلدەرىنىڭ ينتەگراتسياسىن بەكەمدەي تۇسپەك. قازىردىڭ وزىندە حالىقارالىق ساراپشىلار ەۋرازيانىڭ كىندىگىندە ورنالاسقان قازاقستاندى گەوساياسي جانە ستراتەگيالىق تۇرعىدان تۇركى دۇنيەسى قاۋىپسىزدىگىنىڭ كەپىلى دەپ سانايدى. ەۋروپا جانە قىتاي اراسىنداعى نەگىزگى ترانزيتتىك ءدالىز عانا ەمەس, باتىس پەن شىعىستى, سولتۇستىك پەن وڭتۇستىكتى بايلانىستىرىپ وتىرعان شەشۋشى ەل دەپ ەسەپتەيدى. ويتكەنى ن.نازارباەۆ ساياساتى كورشى مەملەكەتتەردىڭ دە مۇددەسىن كوزدەپ, كۇرمەۋى كوپ ايماقتىق جانە حالىقارالىق احۋالدىڭ شەشۋشى الاڭىنا اينالدىردى. سوندىقتان بولسا كەرەك, شەتەلدىك ساياساتكەرلەر ن.نازارباەۆتى تۇركى ەۋرازيالىعىنىڭ اسا كورنەكتى يدەولوگى دەپ باعالايدى. ءتىپتى الىس-جاقىن شەت مەملەكەتتەردىڭ قاي-قايسىندا قاقتىعىس ورىن الا قالسا, ءبىزدىڭ ەلباسى نە دەيدى دەپ اۋەلى ءالىپتىڭ ارتىن باعاتىن ءۇردىس قالىپتاستى. تاتۋلىقتى تۋ ەتكەن قازاقستاننىڭ ىشكى تۇراقتىلىعى مەن ايرانداي ۇيىعان ىنتىماعىنا قىزىعاتىندار كوبەيدى.
كەزىندە بۇۇ باس حاتشىسى كوفي انناننىڭ «قازاقستان – تمد مەملەكەتتەرىنىڭ ىشىندە اۋىزبىرلىگىمەن, تاتۋلىعىمەن ەرەكشەلەنەدى. سونداي-اق بۇل مەملەكەتتە ەكونوميكالىق ءوسۋ بايقالادى. قازاقستان ءتۇرلى ۇلت وكىلدەرى تاتۋ-ءتاتتى ءومىر سۇرەتىن مەملەكەتتىڭ ۇلگىسىنە اينالا الادى. 1991 جىلى قازاقستاننىڭ يادرولىق قارۋدان ءوز ەركىمەن باس تارتۋى جانە سىناق پوليگونىن جابۋى يادرولىق قارۋسىزداندىرۋ مەن ونى تاراتپاۋ بويىنشا جاھاندىق تالپىنىستارعا ەلەۋلى ۇلەس قوستى» دەپ بەرگەن باعاسى مەن ارتقان سەنىمى شىندىققا اينالدى.
ەلباسى سىرتقى ساياساتپەن قاتار, ەلدەگى تۇراقتىلىق پەن ەتنوسارالىق كەلىسىمدى باستى نازاردا ۇستاپ كەلەدى. وتكەن جىلى ەلىمىزگە رەسمي ساپارمەن كەلگەن ەۋروپاداعى قاۋىپسىزدىك جانە ىنتىماقتاستىق جونىندەگى ۇيىمعا قاتىسۋشى مەملەكەتتەردىڭ تۇراقتى وكىلدەرى قازاقستان حالقى اسسامبلەياسى جۇمىسىمەن تانىسىپ, تاڭعالىستارىن جاسىرا المادى.
دەلەگاتسيا قۇرامىندا اۋعانستان, البانيا, اۋستريا, بەلگيا, ەستونيا, ۆەنگريا, يسلانديا, يتاليا, ليتۆا, چەرنوگوريا, پورتۋگاليا, رۋمىنيا, رەسەي, سەربيا, سلوۆاكيا, يسپانيا, شۆەتسيا, تاجىكستان, وزبەكستان سەكىلدى 20-عا جۋىق ەلدىڭ وكىلدەرى بولدى. ولار كەتەرىندە ەلباسى نۇرسۇلتان نازارباەۆتىڭ بەيبىتشىلىك پەن تولەرانتتىلىق مودەلىن ۇلگى ەتە وتىرىپ, قازاقستان حالقى اسسامبلەياسىنىڭ قىزمەتى مەن قۇرىلىمىن ءوز ەلدەرىندە ەنگىزۋ تۋرالى باستاما كوتەرەتىندىكتەرىن جەتكىزدى. سونىمەن قاتار قازاقستان حالقى اسسامبلەياسىنىڭ قىزمەتىن ەۋرازيا كەڭىستىگىندە كەڭ ناسيحاتتايتىندىقتارىن ايتا كەلە, ەقىۇ-عا قاتىسۋشى مەملەكەتتەر ءۇشىن ن.ءا.نازارباەۆتىڭ بىرەگەي مودەلى ەڭ ءتيىمدى جول ەكەنىن جەتكىزدى. جاقىندا رەسەي پرەزيدەنتى ۆلاديمير ءپۋتيننىڭ «رەسەي حالقى اسسامبلەياسىن» قۇرۋ تۋرالى جارلىققا قول قويۋى – قازاقستاننىڭ تۇڭعىش پرەزيدەنتى ن.ءا.نازارباەۆتىڭ بەيبىتشىلىك پەن كەلىسىم ساياساتىن ۇزدىك دەپ تانىپ, ۇلگىگە الۋى دەپ ەسەپتەۋگە تولىق نەگىز بولا الادى.
بيىلعى اسسامبلەيانىڭ 25 جىلدىعىنىڭ باستى وقيعاسى – نۇرسۇلتان نازارباەۆتىڭ توراعالىعىمەن وتكەن اسسامبلەيا كەڭەسى بولدى. ەلباسى قازاقستان حالقى اسسامبلەياسىنىڭ توراعاسى رەتىندە تاۋەلسىزدىكتىڭ بۇكىل كەزەڭىندەگى بىرلىك پەن كەلىسىم ساياساتىن ساراپتاپ بەردى.
«اسسامبلەيا ازاماتتىق قوعامنىڭ امبەباپ قۇرىلىمىنىڭ بارلىق ۇزدىك سيپاتتاماسىنا يە بولىپ, دوستىق, بەيبىتشىلىك, تىنىشتىق پەن سەنىم – قازاقستاننىڭ قوعامدىق ءومىرىنىڭ اجىراماس بولىگىنە اينالۋى ءۇشىن ماڭىزدى ۇلەس قوستى. تاۋەلسىزدىگىمىزدىڭ دامۋى مەن ۇلتتىڭ قالىپتاسۋىنىڭ جولىندا ءدال وسىلار نەگىزگى العىشارت بولدى», دەپ اتاپ ءوتتى. «وتباسىنىڭ اماندىعى, بىرلىك, قوناقجايلىق جانە ەڭبەكسۇيگىشتىك, ىنتىماق پەن قۇرمەت, ءبىر-ءبىرىمىزدى قولداۋعا جانە ءوزارا كومەككە دايىن بولۋ» سياقتى قازاقستان حالقىنىڭ ورتاق قۇندىلىقتارىنا توقتالدى. «رۋحاني جاڭعىرۋ» باعدارلاماسىنىڭ جاڭا جاعدايعا ساي حالقىمىزدىڭ ساناسىن, اقىل-ويىن, ءومىر سالتىن وزگەرتۋگە, جاڭعىرتۋعا باعىتتالعانىنا باسا ءمان بەردى.
مەملەكەتتىك ءتىل ەتنوستاردى بىرىكتىرۋشى جانە ۇيىستىرۋشى فاكتور رەتىندە اسسامبلەيا كەڭەسىندە قاراستىرىلعان نەگىزگى ماسەلەلەردىڭ ءبىرى بولدى. القالى جيىندا انا تىلىمەن قاتار مەملەكەتتىك ءتىلدى ەركىن مەڭگەرگەن ءتۇرلى ەتنوس وكىلدەرىنىڭ ءسوز سويلەۋى مەملەكەتتىك ءتىلدىڭ مارتەبەسىن اسىرىپ, اسسامبلەيانىڭ وسى باعىتتاعى ناتيجەلى جۇمىسىن كورسەتتى.
ەلباسى تۇركىستان وبلىسىنىڭ ارىس جانە ماقتاارال اۋداندارىنا, پاندەميا كەزىندە از قامتىلعان وتباسىلارعا, دارىگەرلەرگە, مەكتەپ وقۋشىلارىنا ەتنو-مادەني بىرلەستىكتەردىڭ كورسەتكەن كومەگىن مىسالعا كەلتىرىپ, اسسامبلەيانىڭ الەۋمەتتىك ءرولىن دە نازاردان تىس قالدىرمادى. قوعامدىق كەلىسىم مەن بىرلىكتىڭ قازاقستاندىق ۇلگىسىن ودان ءارى جەتىلدىرۋدىڭ ستراتەگيالىق باعىتتارىن بەلگىلەدى. «جاڭا جاعدايداعى قازاقستان: ءىس-قيمىل كەزەڭى» جولداۋىن ىسكە اسىرۋدا قازاقستان پرەزيدەنتى قاسىم-جومارت توقاەۆتى تولىعىمەن قولدايتىنىن جەتكىزدى.
تۇڭعىش پرەزيدەنت «وتانعا دەگەن سۇيىسپەنشىلىگىمىزدى ۇنەمى قاستەرلەپ وتىرۋ, ونىڭ تاريحي تاعدىرى ءۇشىن ورتاق جاۋاپكەرشىلىگىمىزدى نىعايتۋ» قاجەتتىگىن تاپسىردى.
بۇل اسسامبلەيا كەڭەسىن اسا ماڭىزدى ساياسي وقيعاعا اينالدىردى جانە قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ ەلدەگى ەتنوسارالىق ۇدەرىستەر قارقىنىن ءجىتى قاداعالايتىنىن جانە ءوزىنىڭ «كەمەنىڭ قاي جاعالاۋعا بەت العانىن» بىلەتىنىنىڭ تاعى ءبىر ايقىن دالەلى بولدى. مۇنى اسسامبلەيا كەڭەسىنىڭ بارلىق قاتىسۋشىلارى ەرەكشە سەزىندى, ءار وبلىستان كەلگەن سپيكەرلەر ەلباسىنا قازاقستاننىڭ وركەندەۋى ءۇشىن جاساعان بارلىق ءىس-ارەكەتتەرى ءۇشىن شىنايى العىستارىن ءبىلدىردى.
تۇڭعىش پرەزيدەنت كۇنى ەلىمىزدىڭ بارلىق ازاماتتارى وسى ريزاشىلىققا قوسىلادى جانە ەلباسىنا ۇزاق ءومىر, قازاقستان حالقىنا قىزمەت ەتۋ جولىندا كۇش-قۋات تىلەيدى.
ەلباسى وتكەن جىلى پرەزيدەنتتىك وكىلەتتىگىن توقتاتقانىمەن, ەل ومىرىنەن الىستاماي, مەملەكەت باسقارۋ ىسىندەگى مول تاجىريبەسىمەن ءبولىسىپ, ءار سالانى ءجىتى باقىلاپ, وسىلاي باعىت-باعدار بەرىپ وتىرعانى – ناعىز كەمەڭگەرلىكتىڭ كورىنىسى. ال قازاقستان رەسپۋبليكاسىنىڭ تۇڭعىش پرەزيدەنتى كۇنى – جىل سايىن ەلباسىنىڭ ساياسي فەنومەنى مەن كوشباسشىلىق تۇلعاسىن ايشىقتاي تۇسۋگە جانە وسكەلەڭ ۇرپاققا تاريحي تاعىلىمىن تانىتۋعا جول اشادى.
جانسەيىت تۇيمەباەۆ,
قازاقستان حالقى اسسامبلەياسى توراعاسىنىڭ ورىنباسارى – پرەزيدەنت اكىمشىلىگى قحا حاتشىلىعىنىڭ مەڭگەرۋشىسى
