سول جىلى جاز ەرتە شىقتى, العاشقى كۇندەرىنەن باستاپ جاۋىندى بولدى. سونداعى جاۋعان جاۋىن ەرەكشە ەسىمىزدە قالىپتى. نەشە كۇن كۇندىز-ءتۇنى جاۋعان جاۋىننىڭ اسەرىنەن بۇقتىرما وزەنى ات قۇلاعىنا شىعا تاسىپ, كاتونقاراعاي جۇرتشىلىعىن ءبىرتالاي ابىگەرگە تۇسىرگەنى دە ەسىمىزدە. اۋا رايىنىڭ قولايسىزدىعىنا بايلانىستى تىكۇشاقتىڭ ۇشۋى مۇمكىن بولماعاندىقتان ن.ءا.نازارباەۆ باستاعان دەلەگاتسيا راحمان قاينارلارىنا دەيىن اۆتوموبيلمەن ءجۇرىپ وتەتىنىن ەستىپ-ءبىلىپ وتىردىق. دەلەگاتسيا مىنگەن اۆتوموبيلدەر كورتەجى كاتونقاراعاي – اققاينار (سول كەزدە چەرنوۆايا) – جامبىل – راحمان قاينارلارى باعىتىنداعى ءاسفالتى جوق جولمەن ءجۇرىپ ءوتتى.
جول بويىنداعى اۋىلداردىڭ تۇرعىندارى پرەزيدەنت مىنگەن كولىكتەردى الىستان بولسىن كورىپ قالۋ ءۇشىن سورعالاعان جاۋىننىڭ استىندا ساعاتتاپ تۇرعان ەدى. ەرتەڭگى كۇنى تاڭەرتەڭ كۇن شايداي اشىلىپ ن.ءا.نازارباەۆ باستاعان دەلەگاتسيا تىكۇشاقپەن بەرەل اۋىلىنىڭ ماڭىنداعى مارال قىستاعىنىڭ جانىنا كەلىپ قونىپ, كاتونقاراعاي مارال كەڭشارىنىڭ ەڭبەككەرلەرىمەن كەزدەستى. مىنا سۋرەت سول كەزدەن قالعان ەستەلىك.
ن.ءا.نازارباەۆ قازاقستان رەسپۋبليكاسىنىڭ ەگەمەندىگىن جاريالاپ, تاۋەلسىزدىك العاننان باستاپ, تاۋەلسىزدىكتى الۋدان گورى ونى قورعاپ, ساقتاپ قالۋ اسا قىمبات ەكەندىگىن باسا ايتا وتىرىپ, ونى دۇرىس دامۋ جولىنا تۇسىرە ءبىلدى. ناتيجەسىندە, قازاقستان رەسپۋبليكاسى ءوزىن بۇكىل الەمگە پاش ەتتى, وركەنيەتتى مەملەكەتتەر قاتارىنا قوسىلدى. باسقا جەتىستىكتەرىمىزدى ايتپاعاننىڭ وزىندە, ىشكى تۇراقتىلىقتىڭ ارقاسىندا سىرتقى ساياساتىمىز بەكىپ, الەم مەملەكەتتەرى اراسىندا بەدەلى ارتا ءتۇستى. وتكەن جىلدار ىشىندەگى ەلباسىنىڭ ەلىمىز ءۇشىن جاساعان ەرەن ەڭبەكتەرى ەل جادىندا ماڭگى قالارى ءسوزسىز.
توقسانىنشى جىلدارداعى توقىراۋ كەزەڭىنىڭ اۋىرتپالىعى از بولمادى, وسى اۋىرتپالىقتاردى حالىقپەن بىرلەسە وتىرىپ ەڭسەرىپ, الدىمەن مەملەكەتتىك رامىزدەرىمىز اسپان تۇستەس كوك تۋىمىزدى, ورتاق شاڭىراق بەينەلەنگەن ەلتاڭبامىزدى, شىرقاعاندا جۇرەگىڭدى جىگەرلەندىرەتىن گيمندى بەكىتىپ, بار الەمگە پاش ەتتى. ۇلتتىق ۆاليۋتامىز – تەڭگە اينالىمعا شىقتى. رەسەي, قىتاي, وزبەكستان, تۇرىكمەنستان جانە قىرعىزستان ەلدەرىمەن اراداعى شەكارامىز بەكىتىلدى.
ءيا, ءبىر قاراعاندا بۇل يگىلىكتەرگە وپ-وڭاي قول جەتكەن سياقتى بولىپ كورىنۋى مۇمكىن. ال شىندىعىنا كەلگەندە, بۇل – ناعىز جانكەشتى ەرلىككە تۇراتىن ەلباسىنىڭ سۇڭعىلا دا سىندارلى سىرتقى ساياساتىنىڭ جەمىسى ەكەندىگىندە كۇمان جوق. بۇلايشا ايتۋعا ۇلكەن نەگىز بار. ايتا بەرسەك, مۇنداي مىسالدار وتە كوپ. وڭدى وزگەرىستەردى ءار وبلىس پەن اۋدان ومىرىنەن كورۋگە بولادى, ويتكەنى, تاۋەلسىزدىك شۇعىلاسى كەڭ-بايتاق قازاق دالاسىن قامتىدى. ايتۋعا عانا وڭاي وسى جاڭارۋلار مەن دامۋلاردىڭ استارىندا ەل بىرلىگى مەن تىرلىگىنىڭ, ەلباسىمىزدىڭ ەسەلى ەڭبەگى مەن ماڭداي تەرىنىڭ قانشاما سىرى جاتىر دەسەڭىزشى...
دۇيسەن برالينوۆ
شىعىس قازاقستان وبلىسى,
كاتونقاراعاي اۋدانى
