ۇكىمەت باسشىسى ساۋدا سالاسىنداعى ىنتىماقتاستىقتى ساپالى كۇشەيتۋ, شىۇ اياسىنداعى تاۋار اينالىمىنىڭ كولەمى مەن تەرەڭدىگىن ارتتىرۋ ءۇشىن ءوزارا مۇمكىندىكتەردى زەردەلەۋ قاجەتتىگىن اتاپ ءوتتى.
قر پرەمەر-ءمينيسترى شىۇ-نىڭ ازىق-ت ۇلىك قاۋىپسىزدىگى جونىندەگى ىنتىماقتاستىق باعدارلاماسىن قايتا قاراپ, ونى اوك سالاسىنداعى ينۆەستيتسيالىق جانە يننوۆاتسيالىق ىنتىماقتاستىقتى ارتتىرۋ جونىندەگى ناقتى شارالارمەن تولىقتىرۋدى ۇسىندى. ونىڭ ايتۋىنشا, قۇجاتتى شىۇ-عا مۇشە مەملەكەتتەردىڭ ارقايسىسىنىڭ باسەكەلەستىك ارتىقشىلىقتارىن, سونداي-اق سىرتقى جانە ىشكى شوكتارعا سەنىمدى, قولجەتىمدى جانە تۇراقتى لوگيستيكالىق ينفراقۇرىلىمدى قامتاماسىز ەتۋدىڭ جاڭا تاسىلدەرىن ەسكەرە وتىرىپ كۇشەيتۋ قاجەت.
ۇكىمەت باسشىسى شىۇ اياسىندا ونەركاسىپتىك جانە ينۆەستيتسيالىق ىنتىماقتاستىقتى ارتتىرۋ قاجەتتىگىن اتاپ ءوتتى.
«بىرلەسكەن ينۆەستيتسيالىق جوبالاردى ىسكە اسىرۋ ۇلتتىق ەكونوميكالاردىڭ ينتەگراتسيا دەڭگەيىن كۇشەيتۋگە, وندىرىستىك پروتسەستەردىڭ باعىتتارىن ارتاراپتاندىرۋعا جانە ولاردىڭ تۇراقتىلىعىن ارتتىرۋعا, شىۇ-عا مۇشە مەملەكەتتەر قۇراتىن قۇننىڭ ءوزارا نارىقتارعا دا, سىرتقى نارىقتارعا دا قولجەتىمدىلىگىن كەڭەيتۋگە, باسەكەلىك ارتىقشىلىقتار ەسەبىنەن ەكونوميكالاردىڭ الەۋەتىن بارىنشا ارتتىرۋعا, سىرتقى كۇيزەلىستەردىڭ اسەرىن ازايتۋعا مۇمكىندىك بەرەدى», — دەدى ا. مامين.
وتىرىسقا ءۇندىستان ۆيتسە-پرەزيدەنتى ۆەنكاي نايدۋ, قحر مەملەكەتتىك كەڭەسىنىڭ پرەمەرى لي كەتسيان, رەسەي پرەمەر-ءمينيسترى ميحايل ميشۋستين, تاجىكستان پرەمەر-ءمينيسترى كوحير راسۋلزودا, وزبەكستان پرەمەر-ءمينيسترى ابدۋللا اريپوۆ, قىرعىزستان پرەمەر-ءمينيسترىنىڭ م. ا. ارتەم نوۆيكوۆ, پاكىستان پارلامەنتىنىڭ سىرتقى بايلانىستار جونىندەگى حاتشىسى اندليب ابباس, اۋعانستاننىڭ ءبىرىنشى ۆيتسە-پرەزيدەنتى امرۋللا سالەح, بەلارۋس پرەمەر-ءمينيسترى رومان گولوۆچەنكو, يران ءبىرىنشى ۆيتسە-پرەزيدەنتى دجاحانگيري ەسحاك, موڭعوليا ۆيتسە-پرەمەرى يانگۋگين سودباتار, تۇرىكمەنستان مينيسترلەر كابينەتى توراعاسىنىڭ ورىنباسارى – سىرتقى ىستەر ءمينيسترى راشيد مەرەدوۆ, سونداي-اق شىۇ حاتشىلىعىنىڭ, اتقق اتقارۋشى كوميتەتىنىڭ, شىۇ ىسكەرلىك كەڭەسىنىڭ جانە بانكارالىق بىرلەستىگىنىڭ باسشىلىعى قاتىستى.
شىۇ-عا مۇشە مەملەكەتتەر اراسىنداعى ساۋدا-ەكونوميكالىق جانە ينۆەستيتسيالىق سالالارداعى, ونىڭ ىشىندە COVID-19 پاندەمياسىنىڭ سالدارىن ەڭسەرۋ اياسىنداعى ىنتىماقتاستىقتى تەرەڭدەتۋ جونىندەگى شارالار تالقىلاندى. شىۇ ىسكەرلىك كەڭەسى مەن بانكارالىق بىرلەستىگىنىڭ 2019-2020 جىلدارداعى قىزمەتى, شىۇ-نىڭ وتكەن جىلعى بيۋدجەتىنىڭ اتقارىلۋى تۋرالى ەسەپ, ۇيىمنىڭ 2021 جىلعا ارنالعان بيۋدجەتى قارالدى.
وتىرىس قورىتىندىسى بويىنشا بىرلەسكەن كومميۋنيكە مەن شىۇ-نىڭ 2021-2025 جىلدارعا ارنالعان كوپجاقتى ساۋدا-ەكونوميكالىق ىنتىماقتاستىق باعدارلاماسىن ىسكە اسىرۋ جونىندەگى ءىس-شارالار جوسپارى قابىلداندى.
شىۇ ۇبك كەلەسى وتىرىسىن 2021 جىلعى قاراشا ايىندا نۇر-سۇلتان قالاسىندا وتكىزۋ جوسپارلانىپ وتىر.
