قورداي اۋدانى گۆاردەيسكي اۋىلىندا ورنالاسقان اتالعان زاۋىت پرەزيدەنت تاپسىرماسىنا سايكەس سالىنۋدا. بۇل جوبا تۇرعىنداردىڭ ءومىرىن قاۋىپتى ىندەتتەن قورعاۋ ماقساتىندا قولعا الىنىپ وتىر. زاۋىتتىڭ قۇرىلىس-مونتاجداۋ جۇمىستارى وسى جىلى اياقتالادى. قازىرگى ۋاقىتتا نىسانعا بارلىق ينجەنەرلىك كوممۋنيكاتسيالار جەلىسى جۇرگىزىلگەن. بۇل جەردە جۇمىسقا 145 ادام كۇشى مەن 30 بىرلىك تەحنيكا تارتىلعان. زاۋىت ءوز جۇمىسىن كەلەسى جىلدىڭ ءبىرىنشى توقسانىندا باستايدى دەپ جوسپارلانۋدا. مۇندا الەمدىك ستاندارتتارعا سايكەس يممۋنوبيولوگيالىق پرەپاراتتار, ونىڭ ىشىندە كوروناۆيرۋس ىندەتىنە, تۇماۋعا, تۋبەركۋلەزگە, برۋتسەللەزگە, نودۋليارلىق دەرماتيتكە جانە باسقا دا ينفەكتسيالىق اۋرۋلارعا قارسى ۆاكتسينالار شىعارىلادى. جىل سايىن بيوپرەپاراتتاردىڭ 30-60 ملن دوزاسىن ءوندىرۋ جوسپارلانعان.
قازىرگىدەي كۇردەلى كەزەڭدە مەملەكەتتىڭ قولداۋى مەديتسينا سالاسىنا تىڭ سەرپىن بەرۋدە. ناتيجەسىندە, وڭىردە قاۋىپتى ىندەتپەن كۇرەس كۇشەيگەن. ىندەتتىڭ قايتالانۋى ىقتيمال ەكىنشى كەزەڭىنە دە دايىندىق باستالىپ كەتتى. كەزىندە پەريناتالدىق ورتالىق بولعان عيمارات كۇردەلى جوندەۋدەن ءوتىپ, بۇگىندە تاراز قالالىق كوپبەيىندى اۋرۋحاناسى بولىپ قايتا جابدىقتالعان. اتالعان مەكەمەگە 200 مەديتسينالىق كوپفۋنكتسيونالدى توسەك, كومپيۋتەرلىك توموگراف, 20 وكپەنى جاساندى جەلدەتۋ اپپاراتى, 2 دەفيبريللياتور, قانداعى گازدار مەن ەلەكتروليتتەردى انىقتايتىن اۆتوماتتاندىرىلعان اناليزاتور, وتتەگى ستانساسى جانە 30 رەانيماتسيالىق توسەك ساتىپ الىنعان.
وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا, وڭىردە ينفەكتسيالىق ستانتسيوناردان بۇگىندە 4 149 ادام ساۋىعىپ شىققان. الايدا وسى ۋاقىتقا دەيىن تاۋلىگىنە 10 ادام قاۋىپتى ىندەتتى جۇقتىرعان بولسا, ازىرگە سول كورسەتكىش قايتالانۋدا. كوروناۆيرۋسپەن كۇرەستە جەرگىلىكتى بيۋدجەتتەن قوماقتى قاراجات قاراستىرىلعان. ماسەلەن, مەديتسينالىق ماقساتتاعى قۇرال-جابدىقتاردى ساتىپ الۋعا 1,6 ملرد تەڭگە بولىنگەن. ول قاراجاتقا 2 ەكستروكورپارالدى مەمبراندى وكسيگەناتسيا اپپاراتى, 100 كوپفۋنكتسيونالدى كەرەۋەت, 14 وكپەنى جاساندى جەلدەتۋ اپپاراتى, 4 تسيفرلى رەنتگەن اپپاراتى, 4 وتتەگى ستانساسى جانە تاعى دا باسقا مەديتسينالىق جابدىقتار الىنۋدا. سونىمەن قاتار رەسپۋبليكالىق بيۋدجەتتەن جامبىل وبلىسىنىڭ جەدەل جاردەم ستانساسىنا 66 مەديتسينالىق كولىك ليزينگ بويىنشا بەرىلگەن. وسى ۋاقىتقا دەيىن وڭىردەگى جەدەل جاردەم كولىكتەرىنىڭ توزىعى جەتكەنى تۋرالى ءتۇرلى دەڭگەيدە ماسەلە كوتەرىلگەن بولاتىن. ەندى سول ولقىلىقتىڭ ورنى تولىپ, جەدەل جاردەم كولىكتەرى دە جاڭارتىلدى.
سونداي-اق بۇگىندە 53 وكپەنى جاساندى جەلدەتۋ اپپاراتى, 8 جىلجىمالى مەديتسينالىق كەشەن الىنعان. باسقارما باسشىسى قازىرگى كەزدە وڭىردەگى 78 مەديتسينالىق ۇيىمعا 6 ملرد تەڭگە كولەمىندە دارىلىك زاتتار مەن مەديتسينالىق بۇيىمدار جەتكىزىلگەنىن ايتتى. «ال مەديتسينالىق ۇيىمدار بويىنشا ايتار بولساق, ولاردىڭ 34-ءى باسقارماعا قارايدى. سونىمەن قاتار 35 ۇيىم – جەكەمەنشىك, قالعان 9 ۇيىم – اسكەري-مەديتسينالىق ۇيىمدار. اتالعان
6 ملرد تەڭگەنىڭ 1,1 ملرد تەڭگەسى كوروناۆيرۋس ىندەتىمەن اۋىرعانداردى ەمدەۋ جانە الدىن الۋ ءۇشىن دارىلىك زاتتار مەن مەديتسينالىق بۇيىمدار الۋعا ارنالعان», دەيدى ءا.قاليەۆ.
ال قازىر مەديتسينالىق بۇيىمداردى ءىرى جەتكىزۋشىلەردىڭ ءبىرى سانالاتىن «Super-pharm» جاۋاپكەرشىلىگى شەكتەۋلى سەرىكتەستىگىنىڭ زاۋىتى دا قاۋىپتى ىندەتپەن كۇرەسكە ءوز ۇلەسىن قوسۋدا. اتالعان نىسان ەلىمىزدىڭ ۇدەمەلى يندۋستريالىق-يننوۆاتسيالىق دامىتۋ باعدارلاماسى اياسىندا 2011 جىلى پايدالانۋعا بەرىلگەن. وبلىس ورتالىعىنىڭ ىرگەسىندەگى جامبىل اۋدانىندا ورنالاسقان كاسىپورىننىڭ وندىرىستىك قۋاتى جىلىنا شامامەن 200 ملن مەديتسينالىق ماقساتتاعى بۇيىم شىعارۋعا جەتەدى. ءوندىرىس ورنىندا 480 ادام جۇمىس ىستەيدى. ەندى جىل سوڭىنا دەيىن جۇمىسشىلار سانىن 600-گە دەيىن ارتتىرۋ جوسپارلانۋدا. كاسىپورىن ءبىر رەتتىك ماسكالار, ءبىر رەتتىك توسەكتىك ورىن جاپقىش-جيىنتىقتارىن, باحيلالار, كومبينەزوندار مەن باس كيىمدەر, وپەراتسيالىق حالاتتار سەكىلدى بارلىعى 300-گە جۋىق بۇيىم ءتۇرىن شىعارادى.
جامبىل وبلىسى
