الەمدىك وركەنيەتتىڭ كوشىنە ىلەسۋدىڭ جالعىز جولى ۇلتتىڭ ينتەللەكتۋالدىق الەۋەتىن ارتتىرۋ. جاس ۇرپاق جاڭا زامان ءبىلىمىن مەيلىنشە مەڭگەرىپ, ءار سالاسىنان سۋسىنداپ جاتسا, ەل ەرتەڭى جارقىن بولارىنا ەشكىم ءشۇبا كەلتىرمەس. شۇكىر دەيمىز! بۇل باعىتتا بىزدە بارلىق جاعداي جاسالعان. كەڭەستىك ءبىلىم بەرۋ جۇيەسىنىڭ كەندىرىنە شىرمالىپ قالعان كەيبىر مەملەكەتتەرگە قاراعاندا كوشىمىز بويىن باياعىدا-اق تۇزەدى. وسى ورايدا, قازاقستاندىق ورتا ءبىلىمنىڭ وزىق ۇلگىسىن قالىپتاستىرىپ وتىرعان نازارباەۆ زياتكەرلىك مەكتەپتەرىنىڭ جاسامپاز جۇمىسى ماقتاۋعا تۇرارلىق. قۇرىلعانىنا كوپ ۋاقىت بولا قويماعان زياتكەرلىك مەكتەپتەرى قىسقا مەرزىم ىشىندە وزىق ويلى ۇستازدار مەن وزات وقۋشىلاردى ءبىر ورتاعا توپتاستىرىپ, زاماناۋي ءبىلىم جۇيەسى نەگىزىندە وقىتۋ ىسىنە باتىل كىرىسىپ كەتتى.
الەمدىك وركەنيەتتىڭ كوشىنە ىلەسۋدىڭ جالعىز جولى ۇلتتىڭ ينتەللەكتۋالدىق الەۋەتىن ارتتىرۋ. جاس ۇرپاق جاڭا زامان ءبىلىمىن مەيلىنشە مەڭگەرىپ, ءار سالاسىنان سۋسىنداپ جاتسا, ەل ەرتەڭى جارقىن بولارىنا ەشكىم ءشۇبا كەلتىرمەس. شۇكىر دەيمىز! بۇل باعىتتا بىزدە بارلىق جاعداي جاسالعان. كەڭەستىك ءبىلىم بەرۋ جۇيەسىنىڭ كەندىرىنە شىرمالىپ قالعان كەيبىر مەملەكەتتەرگە قاراعاندا كوشىمىز بويىن باياعىدا-اق تۇزەدى. وسى ورايدا, قازاقستاندىق ورتا ءبىلىمنىڭ وزىق ۇلگىسىن قالىپتاستىرىپ وتىرعان نازارباەۆ زياتكەرلىك مەكتەپتەرىنىڭ جاسامپاز جۇمىسى ماقتاۋعا تۇرارلىق. قۇرىلعانىنا كوپ ۋاقىت بولا قويماعان زياتكەرلىك مەكتەپتەرى قىسقا مەرزىم ىشىندە وزىق ويلى ۇستازدار مەن وزات وقۋشىلاردى ءبىر ورتاعا توپتاستىرىپ, زاماناۋي ءبىلىم جۇيەسى نەگىزىندە وقىتۋ ىسىنە باتىل كىرىسىپ كەتتى.
– جاڭا عاسىر ءبىزدى جاڭاشا ويلاۋعا مىندەتتەيدى. بۇدان بىلاي تەك ءبىلىمدى ادامدى تاربيەلەپ شىعارۋمەن شەكتەلمەگەن ابزال. بالالارىمىز عۇمىر بويى بىلىمگە ۇمتىلاتىنداي بولۋى كەرەك. مىندەتىمىز – سوعان قول جەتكىزۋ, – دەيدى نازارباەۆ زياتكەرلىك مەكتەپتەرى دەربەس ءبىلىم بەرۋ ۇيىمىنىڭ باسقارما ءتورايىمى كۇلاش شامشيدينوۆا. ۇيىمنىڭ ۇيىمداستىرۋىمەن استانادا وتكەن «بىلىمدەگى جوعارى ساپا مەن كوشباسشىلىق – 2013» حالىقارالىق كونفەرەنتسياسى بارىسىندا وسى باعىتتا جاسالىپ جاتقان جۇمىستاردىڭ جاي-جاپسارى ءۇش كۇن بويىنا تالقىعا ءتۇستى. شاراعا قازاقستاننىڭ جەتەكشى ۇستازدارىمەن بىرگە, الەمنىڭ 14 مەملەكەتىنەن كەلگەن 57 حالىقارالىق ساراپشى قاتىسىپ, شاراپاتتى ويلارىن ورتاعا سالدى. ماماندار «ەرتەڭگى ەل باستايتىن دانالار – بۇگىنگى بالالار», – دەپ ماسەلەنى ارىدەن قوزعاپ, بولاشاق كوشباسشىلاردى تاربيەلەۋدىڭ سان ءتۇرلى تاسىلدەرىن ۇسىندى.
بۇل باعىتتا جەتى قاعيداتتى نەگىزگە العان زياتكەرلىك مەكتەپتەردىڭ باعىت-باعدارى وڭ باعالاندى. ولاردا تاربيە مەن ءبىلىم بەرۋدىڭ بىرتۇتاستىعىن بۇزباۋ, ۇشتىلدىك ساياساتى, وقۋشىنىڭ بىلىمگە دەگەن ىنتاسىن ارتتىراتىن جاڭا باعالاۋ جۇيەسىن ەندىرۋ, «عىلىمعا كىرىسپە», «اقپاراتتىق-بايلانىس تەحنولوگيالارى», «مادەنيەت», «قازاقستان جاڭا الەمدە» اتتى جاڭا پاندەردى باعدارلاماعا ەنگىزە وتىرىپ, وقۋشىلاردىڭ تانىمىن ارتتىرۋ ت.ب. مىندەتتەر كەڭىنەن قامتىلعان.
بۇل ارادا نازارباەۆ زياتكەرلىك مەكتەپتەرىنىڭ ءبىلىم بەرۋ باعدارلامالارىنا توقتالا كەتسەك ارتىق بولماس. بۇگىندە مەكتەپتەر بازاسىندا ءبىلىم بەرۋدىڭ ەكى مودەلى جۇزەگە اسىرىلۋدا. ءبىرىنشىسى – جاراتىلىستانۋ مەن ماتەماتيكا عىلىمدارىن بىرىكتىرگەن ەكسپەريمەنتتى باعدارلاما. ول اپروباتسيادان ءوتىپ, ەندىرىلگەننەن كەيىن ەلدىڭ جالپى ورتا ءبىلىم جۇيەسىنە ترانسلياتسيالاۋعا ۇسىنىلادى. بىرىكتىرىلگەن ءبىلىم بەرۋ باعدارلاماسى ناتيجەگە باعىتتالعان ءبىلىم بەرۋ مودەلىنە اۋىسۋدى قاراستىرادى, ياعني ءبىلىم الۋدان قابىلەتتىلىك پەن بىلىكتىلىكتى مەڭگەرۋگە, وقۋشىلار جەتىستىكتەرىن سۋبەكتيۆتى باعالاۋ جۇيەسىنەن وبەكتيۆتى تۇرىنە اۋىسۋدى بىلدىرەدى.
ەكىنشى ءبىلىم بەرۋ مودەلى حالىقارالىق باكالاۆريات ۇيىمىنىڭ فيلوسوفياسى نەگىزىندە ورتا جانە جوعارعى سىنىپتار باعدارلاماسىن جۇزەگە اسىرادى. 2013 جىلدىڭ 9 ساۋىرىندە استانا قالاسىنداعى نازارباەۆ زياتكەرلىك مەكتەبى ديپلومدىق باعدارلاما بويىنشا حالىقارالىق باكالاۆرياتتىڭ الەمدىك مەكتەبى رەتىندە ماقۇلداندى. ديپلومدىق باعدارلاما وقۋشىلارعا حالىقارالىق تالاپتارعا ساي ساپالى ءبىلىم الۋعا جانە الەمنىڭ الدىڭعى قاتارلى جوعارى وقۋ ورىندارىنىڭ ستۋدەنتتەرىنە قوسىلۋعا مۇمكىندىك بەرەدى.
زياتكەرلىك مەكتەپتەر ۇستازدارىنىڭ دەنى قازاقستاندىقتار. دەگەنمەن, وقىتۋشىلار اراسىندا ۇلىبريتانيا, اقش, جاڭا زەلانديا, كانادا, وار سەكىلدى وزگە ەلدەردىڭ ماماندارى دا بار. نازارباەۆ زياتكەرلىك مەكتەپتەرىنە وقۋشىلار كونكۋرستىق ىرىكتەۋ ارقىلى قابىلدانادى. العاش رەت 7-سىنىپقا قابىلداۋ 2013 جىلعى ماۋسىمدا نازارباەۆ زياتكەرلىك مەكتەپتەرى دەربەس ءبىلىم بەرۋ ۇيىمىنىڭ Cito جانە CTY-مەن بىرلەسىپ ازىرلەگەن جاڭا جۇيەسى نەگىزىندە وتكىزىلدى. جاڭا كونكۋرستىق ىرىكتەۋ جۇيەسىنىڭ تەستىلىك تاپسىرمالارى ءبىلىمدى تاجىريبەدە قولدانۋ جانە وقۋشىلاردىڭ جاراتىلىستانۋ-ماتەماتيكالىق عىلىمداردى وقىپ ءبىلۋ قابىلەتتەرىن انىقتاۋعا باعىتتالعان.
بيىلعى وقۋ جىلىندا 78 وقۋشى, ياعني نازارباەۆ زياتكەرلىك مەكتەپتەردىڭ ءار التىنشى تۇلەگى جالپى ورتا ءبىلىم تۋرالى ۇزدىك اتتەستاتقا جانە «التىن بەلگىگە» يە بولدى, 135 تۇلەك نازارباەۆ ۋنيۆەرسيتەتىنە, 27 تۇلەك شەتەلدىك جوعارى وقۋ ورىندارىنا جانە تمد ەلدەرىنىڭ ۋنيۆەرسيتەتتەرىنە وقۋعا ءتۇستى.
وزىق وقىتۋ جۇيەسىمەن وتاندىق ۇستازداردى قۋانتىپ وتىرعان وسىناۋ مەكتەپتەردىڭ سانى بۇگىندە 15-كە جەتتى. بيىلدىڭ وزىندە اتىراۋدا, اقتوبەدە, قاراعاندىدا, تارازدا, شىمكەنتتە, قىزىلوردادا جانە پاۆلوداردا 7 جاڭا نازارباەۆ زياتكەرلىك مەكتەبى ەسىكتەرىن ايقارا اشتى. سەمەيدە, وسكەمەندە, تالدىقورعاندا, كوكشەتاۋدا, استانادا جانە ورالدا اشىلعان زياتكەرلىك مەكتەپتەر ءوز جۇمىستارىن جالعاستىرۋدا. الداعى جىلدارى نازارباەۆ زياتكەرلىك مەكتەپتەرى الماتىدا, اقتاۋدا, قوستانايدا جانە پەتروپاۆلدا بوي كوتەرەدى. ءاربىر جاڭا ءبىلىم ۇياسىندا باسقا قالادان كەلگەن وقۋشىلارعا ارناپ 120 ورىندىق دەمالاتىن عيماراتتار دا سالىنۋدا. ال جالپى, ەلىمىز بويىنشا اتالعان زياتكەرلىك ءبىلىم وشاقتارىنىڭ قۇرىلىسىن تولىق اياقتاۋ 2015 جىلعا جوسپارلانىپ وتىر.
دوسىمجان ەرمۇرات.
