كوكجىرا اۋىلىنىڭ شەت جاعىنداعى بۇل ۇيەڭكىگە قىزىقتاپ كەلۋشىلەر كوپ بولعانىمەن, اۋىلدىقتار وزدەرى كوپ ءمان بەرە بەرمەيدى. ال كونەكوز قاريالاردىڭ ايتۋىنشا, بۇل اعاشقا ەكى عاسىردان استام ۋاقىت بولعان. بولسا بولعانداي-اق. اينالا تۇرىپ, التى ادام قۇشاعىن جايسا دا جەتپەيدى. تابيعاتتىڭ عاجابى دەرسىز. زايساندىق ولكەتانۋشى فەميستوكول تۇسىپبەك ۇلىنىڭ ايتۋىنشا, شىعىستى شىر اينالساڭ دا ءدىڭى جۋان مۇنداي اعاش كەزدەسپەيدى. كوكجىرا اۋىلى وزەننىڭ اڭعارىندا ورىن تەپكەندىكتەن ۇيەڭكى اعاشى كوپ. ەرەكشەلەنىپ وسكەنى بىرەۋ عانا. ول ۇيەڭكىنىڭ ءدىڭى جۋان بولعانىمەن, ورتا تۇسىنان سالالانىپ كەتەدى.
جالپى, جەر بەتىندە ۇيەڭكىنىڭ 150-دەن اسا ءتۇرى بولسا, قازاقستاندا جەتى-اق ءتۇرى كەزدەسەدى ەكەن. ونىڭ ەكى ءتۇرى وزەن بويىندا, ساي-سالالاردا وسەتىن جابايى ۇيەڭكىلەر. ال قالعانى وزەندىك, شاعانجاپىراق, ءشىنارتۇس سىندى ۇيەڭكىلەر قولدان وسىرىلەدى. وسكەن ورتاسىنىڭ كليماتىنا قاراي ءساۋىر, ماۋسىم ايلارىندا گۇلدەپ, تامىز, قازاندا جەمىس بەرەدى. جاپىراعىندا 5-7 پايىز قانت بولعاندىقتان, شىرىنى ءتاتتى. ەرتە كەزدە امەريكالىقتار ۇيەڭكىدەن قانت وندىرگەن دە ەكەن. سوندىقتان دا شىعار, ۇيەڭكىنىڭ جاپىراعى كانادانىڭ ۇلتتىق سيمۆولى.
شىعىس قازاقستان وبلىسى,
زايسان اۋدانى
