بالاماسى جوق جوبا
ەلباسىمىز نۇرسۇلتان نازارباەۆتىڭ تىكەلەي باستاماسىمەن ومىرگە كەلىپ, بۇگىندە ءوزىنىڭ 20 جىلدىق مەرەيتويىن اتاپ وتكەلى وتىرعان «بولاشاق» حالىقارالىق ستيپەندياسى دۇنيەجۇزىندە بالاماسى جوق الەۋمەتتىك-مادەني جوبا بولىپ تابىلادى. باعدارلاما تۇلەكتەرى الەمدىك دەڭگەيدەگى جوعارى وقۋ ورىندارى مەن زەرتتەۋ ورتالىقتارىندا العان ءبىلىم-بىلىگىن قازىرگى تاڭدا ەل يگىلىگىنە جۇمساپ, جەمىستى ەڭبەك ەتۋدە.
بالاماسى جوق جوبا
ەلباسىمىز نۇرسۇلتان نازارباەۆتىڭ تىكەلەي باستاماسىمەن ومىرگە كەلىپ, بۇگىندە ءوزىنىڭ 20 جىلدىق مەرەيتويىن اتاپ وتكەلى وتىرعان «بولاشاق» حالىقارالىق ستيپەندياسى دۇنيەجۇزىندە بالاماسى جوق الەۋمەتتىك-مادەني جوبا بولىپ تابىلادى. باعدارلاما تۇلەكتەرى الەمدىك دەڭگەيدەگى جوعارى وقۋ ورىندارى مەن زەرتتەۋ ورتالىقتارىندا العان ءبىلىم-بىلىگىن قازىرگى تاڭدا ەل يگىلىگىنە جۇمساپ, جەمىستى ەڭبەك ەتۋدە.
ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىنىڭ ۇستازدارى دا سولاردىڭ قاتارىندا. ماسەلەن, باعدارلامانىڭ 2011 جىلعى تۇلەكتەرى ساكەن نۇربەكوۆ پەن قارلىعا مىساەۆا بۇگىندە فاكۋلتەتتىڭ وقۋ-تاربيە جانە عىلىمي جۇمىس جونىندەگى باعىت-باعدارىنا باسشىلىق ەتىپ, وزىق ۇلگىلەردى ومىرگە ەنگىزۋدە. ال, ۇستىمىزدەگى جىلى امەريكا قۇراما شتاتتارىنان ورالعان ايگەرىم ءالجانوۆا عىلىمي تاعىلىمدامادا يگەرگەن ءىس-تاجىريبەسىن ارىپتەستەرىمەن ءبولىسۋ ۇستىندە.
پولشانىڭ ىرگەلى جوعارى وقۋ ورىندارىنىڭ ءبىرى – ادام ميتسكەۆيچ اتىنداعى پوزنان ۋنيۆەرسيتەتىنىڭ وسى جولداردىڭ اۆتورى – عىلىمي تالىمگەرگە بەرگەنى مول, ۇيرەتكەن, كوڭىلگە توقىتقان تۇستارى كوپ بولدى. ۋنيۆەرسيتەت سولتۇستىك-باتىس پولشاداعى ەجەلگى دە ەڭ ءىرى مەملەكەتتىك وقۋ ورنى بولىپ تابىلادى. ۋنيۆەرسيتەتتىڭ 15 فاكۋلتەتىندە بۇگىندە 47 مىڭنان استام ستۋدەنت وقيدى. وقۋ ورنى ەۋروپالىق وداقتىڭ «ەرازمۋس» جوباسىنا, قازاقستاندىق «بولاشاق» باعدارلاماسىنا مۇشە بولىپ تابىلادى. مۇندا دۇنيەجۇزىنىڭ تۇكپىر-تۇكپىرىنەن كەلگەن جاستار پولياك مادەنيەتىنەن سۋسىنداۋ ۇستىندە. پولياك ءتىلى جانە كلاسسيكالىق فيلولوگيا فاكۋلتەتى شەتەلدىكتەرگە پولياك ءتىلىن ارنايى باعدارلاما بويىنشا وقىتىپ-ۇيرەتەدى.
ۋنيۆەرسيتەتتىڭ ماڭدايالدى فاكۋلتەتتەرىنىڭ ءبىرى ساياسي عىلىمدار جانە جۋرناليستيكا فاكۋلتەتى, جۋرناليستيكا, ساياساتتانۋ, حالىقارالىق قاتىناستار ماماندىقتارى بويىنشا كادرلار دايارلايدى. «جۋرناليستيكا جانە كوممۋنيكاتسيا», «ساياساتتانۋ», «ۇلتتىق قاۋىپسىزدىك», «حالىقارالىق قاتىناستار» سياقتى 4 كافەدرا جۇمىس ىستەيدى. «جۋرناليستيكا جانە قوعامدىق قاتىناستار» ماماندىعى بويىنشا ستۋدەنتتەر «جۋرناليستيكا», «قازىرگى زامانعى باق», «جارناما جانە پروموتسيا», «بيزنەستەگى اقپاراتتى باسقارۋ» كاسىپتەرىن تاڭداي الادى.
وقۋ ورداسىندا 90-نان استام وقىتۋشى, سونىڭ ىشىندە 31 دوكتور مەن پروفەسسور جۇمىس ىستەيدى. سونداي-اق, وزگە فاكۋلتەتتەردەن, پوزناننىڭ وزگە جوعارى وقۋ ورىندارىنان عالىمدار مەن كاسىپتىك ورتا وكىلدەرى ساباق بەرۋگە شاقىرىلادى. پراكتيكتەر اراسىندا بەلگىلى جۋرناليستەر, جارناما اگەنتتىكتەرىنىڭ ماماندارى مەن ءباسپاسوز حاتشىلارى جەتەرلىك. «جۋرناليستيكا, اقپارات جانە قوعامدىق بايلانىستار سالاسىنداعى كوممۋنيكاتسيا» ماماندىعىندا وندىرىستىك ساباقتار كوپ. ستۋدەنتتەر ينتەرنەت-راديو مەن تەلەديدار حابارلارىن جۇرگىزەدى, قوعامدىق تەلەديدار ءۇشىن اپتا سايىن 15 مينۋتتىق باعدارلاما ازىرلەيدى. وقۋدى ءتامامداۋ ءۇشىن رەداكتسيالارداعى 6 اپتالىق پراكتيكادان كەيىن مىندەتتى تۇردە سىناق تاپسىرۋ كەرەك بولادى.
وقۋ عيماراتىندا باي كىتاپحانا بار, مۇنداعى كىتاپ قورى 28000 دانا. كىتاپتاردى ەسەپكە الۋ ەلەكتروندىق تاسىلمەن جۇرگىزىلەدى. ستۋدەنتتەر زالداعى تۇراقتى كومپيۋتەرلەردى, سونداي-اق, ءوز نوۋتبۋكتەرىن پايدالانا الادى. ۆاي-فاي جۇمىس ىستەيدى. مۇندا وزگە شەتەل تىلدەرىندە, سونىڭ ىشىندە قازاق تىلىندە دە كىتاپتار مەن گازەت-جۋرنالدار بار. فاكۋلتەت 28 شەتەلدىك وقۋ ورىندارىمەن بايلانىس ورناتقان. ولار نەگىزىنەن العاندا ەۋروپالىق وقۋ ورىندارى, سونداي-اق, وڭتۇستىك كورەيادا, تايۆاندا, تۇركيادا, اقش پەن برازيليادا دا ارىپتەستەرى بار. مۇنداي ىنتىماقتاستىق ورتاق جاريالانىمدار ازىرلەۋ, ارىپتەس وقۋ ورنىندا تاعىلىمدامادان ءوتۋ جانە ورتاق كونفەرەنتسيالار ۇيىمداستىرۋ مەن زەرتتەۋ توپتارىن قۇرۋعا نەگىزدەلەدى. تيىسىنشە پوزناندىق ستۋدەنتتەر ەۋروپالىق باعدارلامالار اۋقىمىندا ستۋدەنتتىك الماسۋ شارالارىنا قاتىسا الادى. بۇل تاڭداپ الىنعان ۋنيۆەرسيتەتتە ءبىر سەمەستر نەمەسە تۇتاس وقۋ جىلىندا ءبىلىم الۋعا مۇمكىندىك بەرەدى. ەكىجاقتى كەلىسىمدەر نەگىزىندە ستۋدەنتتەر ءوز جۇمىستارىن وسى مەرزىمدە ەۋروپالىق وداق اۋقىمىنان تىس جەرلەردە دە قورعاي الادى.
فاكۋلتەت ماڭىزدى عىلىمي باسقوسۋلار وتكىزىپ تۇرادى. بىلتىرعى قىركۇيەكتە مۇندا ەكىنشى بۇكىلپولشالىق ساياساتتانۋ كونگرەسى بولىپ ءوتتى. پولياك عىلىمى ءۇشىن اسا ءماندى وقيعا بولعان كونگرەسكە ساياسات, حالىقارالىق قاتىناستار, ەۋروپالىق ينتەگراتسيا, باق جانە بۇقارالىق كوممۋنيكاتسيا سالالارىن زەرتتەۋشىلەر مەن ماماندار جينالدى.
جىل سايىنعى ءداستۇرلى عىلىمي جيىندار دا بار, مىسالعا سلۋبيتسا قالاسىندا اقپاننىڭ العاشقى ونكۇندىگىندە وتەتىن حالىقارالىق كونفەرەنتسيانى الايىق. بۇل القالى عىلىمي جيىن 14 جىلدان بەرى وتكىزىلىپ كەلەدى. كونفەرەنتسيانىڭ جۇمىس ءتىلى پولياكشا بولعانىمەن, تالقىلاۋلار اعىلشىن تىلىنە ىلەسپە اۋدارما ارقىلى جۇرگىزىلدى. باعدارلامادا, سونداي-اق, اعىلشىن جانە ورىس تىلدەرىندەگى پانەلدەر بولدى. بيىلعى كونفەرەنتسيا داعدارىس سياقتى وتە ماڭىزدى تاقىرىپقا, ەۋروپالىق وداقتى عانا ەمەس, قۇرلىق رەتىندە بۇكىل ەۋروپانى شارپىعان قازىرگى داعدارىس تاقىرىبىنا ارنالدى.
پوزنان ۋنيۆەرسيتەتىندە عىلىمي تاعىلىمدامادان وتكەن جانە ءبىلىم الىپ جاتقان قازاقستاندىقتار سانى جىلدان-جىلعا وسە تۇسۋدە. ساياسي عىلىمدار جانە جۋرناليستيكا فاكۋلتەتىندە بيىلعى وقۋ جىلىندا «بولاشاق» باعدارلاماسىنىڭ ءبىر تاعىلىمداماشىسى جانە اكادەميالىق الماسۋ بويىنشا كەلگەن ءتورت ستۋدەنت ءبىلىم كوتەرۋدە. تمد ەلدەرىنەن كەلگەن وقۋشىلار ىشىندە قازاقستاندىق ستۋدەنتتەر سانى جاعىنان ۋكراينالىقتاردان كەيىن ەكىنشى ورىن الادى.
جەتپىسباي بەكبولات ۇلى,
«بولاشاق» باعدارلاماسىنىڭ ستيپەندياتى, ءال-فارابي اتىنداعى قازۇۋ پروفەسسورى.
قانات قاتايتقان قامقورلىق
مەن ءوز باسىمنان كوز جەتكىزگەندەي, ءبىزدىڭ ەلىمىزدە تالاپتى جاستارعا الەمنىڭ ۇزدىك وقۋ ورىندارىندا ءبىلىم تەرەڭدەتىپ, بىلىكتىلىك شىڭداۋعا مەملەكەتتىك قامقورلىق قۇشاعى كەڭ. سونىڭ جارقىن دالەلى رەتىندە ەلباسىنىڭ تىكەلەي باستاماشىلىعىمەن قۇرىلىپ, زامان تالابىنا ساي العا ۇمتىلۋعا قۇشتار زامانداستارىم ارمان-ماقساتىنا جول اشۋشى «بولاشاق» حالىقارالىق باعدارلاماسىن ايتۋعا بولار ەدى. بۇدان ەكى جىل بۇرىن سول بويىنشا كاسىپتىك بەيىندى بەرىكتىرۋ ماڭدايىما بۇيىرعان تۇلەكتەرىنىڭ ءبىرى ەكەنىمدى ماقتانىش تۇتامىن. انگليادا ماگيستراتۋرادا «بولاشاقتىڭ» ستيپەندياسى ارقىلى وقىپ, «ءبىلىم بەرۋ سالاسىن باسقارۋ» ماگيسترى دارەجەسىن الۋىم بۇگىندە ءبىلىم بەرۋ جۇيەسىندە بەلسەندىلىكپەن قىزمەت ەتۋىمە شاپاعاتىن مولىنان تيگىزىپ ءجۇر. «ءبىر كۇندىگىن ويلاعان – كۇرىش ەگەدى, ون جىلدىعىن ويلاعان – اعاش ەگەدى, ءجۇز جىلدىعىن ويلاعان – ادام تاربيەلەيدى» دەيدى حالىق دانالىعى. «بولاشاق» باعدارلاماسىنىڭ ءمان-ماڭىزىن وسى ءسوز ايقىن تانىتادى.
مەكتەپ قابىرعاسىنان اعىلشىن ءتىلىن ۇيرەنۋگە بۇيرەك بۇرىلعان بولاتىن. اكادەميك ە.ا.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ اتالعان فاكۋلتەتىندە وقۋدى قالاۋىما وسى قۇشتارلىق يتەرمەلەگەن-ءدى. ونى ۇزدىك بىتىرۋىمە بايلانىستى ۇستازدارىم قاتارىنا قوسىلۋىما مۇمكىندىك بولعانمەن, ءبىلىمنىڭ باستاۋ وشاعى – مەكتەپتەن ەڭبەك جولىمدى باستاعاندى ءجون كوردىم. قاراعاندىداعى №68 مەكتەپ-ينتەرنات بالالار باقشاسىندا, ودان سوڭ دۋبوۆكا سەلوسىنداعى مەكتەپتە ساباق بەرۋ ماماندىق جاعىنان تاجىريبە تولىستىرۋمەن بىرگە, جەتكىنشەكتەردى تاربيەلەۋ ىسىندەگى بىلىكتىلىكتى ۇشتادى. نەگە ەكەنىن ىشتەي سەزىنەمىن, قازىر كەيبىر جاس ارىپتەستەرىم بىردەن جايلى ورىنعا جايعاسۋعا قۇمار. ناعىز ۇستاز بولعىسى كەلگەن جانعا ەڭ الدىمەن وقۋشىلار ورتاسىنان تابىلىپ, بىتە قايناسقان وسىنداي جولدان ءوتۋ ۇلكەن ومىرلىك مەكتەپ بولىپ قالماقتىعىن ايتار ەدىم.
شاكىرتتەرىمە ساباق بەرە جۇرە ءبىلىم جەتىلدىرە تۇسۋگە وزىندىك ىزدەنىس-تالپىنىستان ءبىر ءسات قول ۇزبەۋىمنىڭ ارقاسىندا شەتەلدەردە ارناۋلى كۋرستاردا وقۋعا قول جەتكىزىپ, اقىرىندا كوپتەن بەرگى تۇپكى تىلەگىم «بولاشاق» باعدارلاماسى اياسىندا حالىقارالىق ستاندارتقا سايكەس مامان اتانۋىم ەڭبەك جولىمداعى زور بەلەس دەپ ەسەپتەيمىن. وسىنى ماقسات ەتۋشى تالاپكەر زامانداستارىما جاعداي جاسالىپ, قولداۋ كورسەتىلۋدەگى مەملەكەتتىك قامقورلىققا ريزالىق شەكسىز. ءبىزدىڭ تاراپىمىزدان ەندىگى بيىك مىندەت, مەرەيلى پارىز-سەنىمدى اقتاي ءبىلۋ. سوعان تالپىنامىن.
انگليادا ماگيستراتۋرا بىتىرگەن سوڭ بولاشاقتىقتاردىڭ قاي ورىندا دا اسىعا كۇتىلىپ وتىرعاندىعى كوڭىل ءوسىردى. استاناداعى «اقپاراتتىق-ساراپتامالىق ورتالىق» اق ورتا ءبىلىم بەرۋ بولىمىندە ساراپشى بولىپ قىزمەت ەتتىم. وسى ۋاقىتتا قاراعاندىدا حيميا-بيولوگيا باعىتىنداعى نازارباەۆ زياتكەرلىك مەكتەبى اشىلىپ, سوعان شاقىرىلدىم.
وقۋ, ءبىلىم – ودان ارتىق نە بايلىق بار دەسەڭىزشى. بۇگىندە ۋاقىت ىلەسپەس كەرەمەت وزگەرىستەر زامانىندا وقۋ ۇستىنە وقۋ تالاپقا اينالىپ وتىر ەمەس پە. جاقىندا انگليادا تاعى دا ءبىر ءبىلىم ۇشتاۋدىڭ ءساتى ءتۇستى. وسىلايشا, وسە تۇسكەن ءبىلىمىم مەن تاجىريبەمدى مەكتەبىمىزدە زاماناۋي ءبىلىم بەرۋدى قالىپتاستىرۋعا, وقىتۋدىڭ ساپالى جۇيەسىن قۇرۋعا, شاكىرتتەر دارىنىن دامىتۋعا ارناۋدامىن.
بايقاعانىمداي, شەتەلدەردە قازاقستاندىق جاستاردى الدىڭعى قاتارلى وقۋ ورىندارىندا كوپتەپ وقىتۋعا دەگەن ىنتا-ىقىلاسقا ءسۇيسىنىس ەرەكشە. وسىنى باعالاي ءبىلۋىمىز كەرەك.
شىرىن جۇمابەكوۆا,
قاراعاندىداعى حيميا-بيولوگيا بەيىندەگى نازارباەۆ زياتكەرلىك مەكتەبى ديرەكتورىنىڭ سىرتقى بايلانىستار جونىندەگى ورىنباسارى.
زەردەلى جاس باسپالداعى
شەتتە وقىپ, وزگە جات جەردە ءبىلىمىڭدى شىڭداۋ, وزگە ەلگە قازاق ەكەنىڭدى, «قازاقستان» اتتى مەملەكەتتىڭ بالاسى ەكەنىڭدى كورسەتۋ – ەكىنىڭ بىرىنە بۇيىرا بەرمەيتىن باق بولسا كەرەك. الايدا, وسىناۋ باق مەنىڭ ماڭدايىما جازىلعان ەكەن.
ءوزىم 2010 جىلى ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىن باكالاۆر دارەجەسىمەن ءبىتىردىم.
ۋنيۆەرسيتەتتى تامامداعان سوڭ, مەن دە وزگە قازاق بالاسى سياقتى بار بىلگەنىمدى ءارى قاراي شىڭداۋ ماقساتىندا «بولاشاق» باعدارلاماسىنا قۇجاتتار تاپسىرىپ كوردىم. ابىروي بولعاندا سىناقتان سۇرىنبەي ءوتىپ, شۆەيتساريا مەملەكەتىندە ءبىلىمىمدى جالعاستىرۋعا مۇمكىندىك الدىم. وسىناۋ جىلدار مەن ءۇشىن ۇلكەن سىناق بولدى. ەلباسىنىڭ, ەلىمنىڭ ءۇمىتىن اقتاۋ – مەنىڭ باستى پارىزىم دەپ ءبىلدىم. ءبىلىم مەن بىلىگىمدى ۇشتاستىرىپ وزگە ەلدىڭ ماماندارىنان مول تاجىريبە جيناپ كەلدىم. بۇگىندە سول بىلگەنىمدى, وزگە جەردە ءجۇرىپ كوكەيگە تۇيگەنىمدى ەلىمە كەلىپ ىسكە اسىرىپ جاتىرمىن. ەلىمنىڭ ەرتەڭى ءۇشىن نۇرلى بولاشاق جولىندا قىزمەت جاساۋ مەنىڭ ەندىگى مىندەتىم.
ەلباسىنىڭ «بولاشاق» باعدارلاماسى قازاقستاندى الەمگە تانىتتى. ءبىلىمدى جاستاردىڭ ورداسى, تالانتتى دا تالاپتى ازاماتتاردىڭ ەلى ەكەنىن كورسەتتىك. بۇدان وزگە, بىلىممەن قاتار, بىلىكتىلىگىڭدى شىڭداۋ, تاجىريبە جيناۋ, ەل, جەر كورۋ, ءوزىڭدى بولاشاققا شىڭداۋ – مۇنىڭ ءبارى باعدارلى «بولاشاق» باعدارلاماسىنىڭ ارقاسىندا جۇزەگە استى.
«بولاشاق» باعدارلاماسى – زەردەلى جاستىڭ ەرتەڭىنە سارا جول اشار باسپالداق بولدى. سوندىقتان دا مەملەكەت باسشىسى ن.نازارباەۆتىڭ تىكەلەي باستاماسىمەن قۇرىلعان باعدارلامانىڭ الاتىن اۋقىمى, ونداعى يدەيا كوكجيەگى دە تەرەڭدە جاتىر. ەلباسىنىڭ كەشەگى ارمان-ماقساتى بۇگىن ورىندالدى.
سوندىقتان, بولاشاعىنان ءۇمىت كۇتەتىن بارلىق قازاق جاستارى ەشتەڭەدەن تايسالماي «بولاشاق» باعدارلاماسىندا باقتارىن سىناپ, ەل ەرتەڭىنە ادال قىزمەت ەتۋى ءتيىس دەپ بىلەمىن. جاس وسكىن ۇرپاق, قازاق بالاسى, ءبىز ءبىلىمدى جاستار بىرىكسەك, ەرتەڭىمىز جارقىن, كەلەشەگىمىز كەمەل بولادى.
دۋلات جاقسىبەكوۆ.
«بولاشاق» باعدارلاماسىنىڭ تۇلەگى, «Nazarbayev University Graduate School of Education» دەكانىنىڭ اسسيستەنتى.
بيىككە شىعارار جول
«وتان وتباسىنان باستالادى» دەپ بابالارىمىز قالاي ورىندى ايتقان. ەس جيىپ, ەتەك جيناي باستاعان كەزدە ماماندىعى ەكونوميست اكەم مالىك مۇحامەتقالي ۇلى «باي بولماساڭ بولما, بىراق ونەر مەن بىلىمگە ساي بول!» دەگەن اقىل-كەڭەسىن قۇلاققا قۇيىپ وتىرۋشى ەدى. جوعارى ساناتتى ۇستاز, قازىر دە وتباسىمىزدىڭ ۇيىتقىسى انام حابيبا قاليقىزى «ەلىمىزدىڭ باقىتىنا بىتكەن ەلباسى ن.نازارباەۆ تەحنيكالىق ماماننىڭ مايتالمانى مەتاللۋرگ بولىپ, تەمىرتاۋ قالاسىندا ءبىلىمى مەن بىلىكتىلىگىن شىڭداعان, سەن دە مەتاللۋرگ بولساڭ, قاتارىڭنان قالمايسىڭ», دەيتىن. جاستايىمنان ماتەماتيكاعا, فيزيكا مەن حيمياعا قىزىعۋشىلىعىم ارتا ءتۇستى.
اسا ءبىر قۋاناتىن ءساتىم, 2009 جىلى تۇڭعىش پرەزيدەنت ن.نازارباەۆتىڭ «بولاشاق» باعدارلاماسىنىڭ ستيپەندياتى اتانۋىم ەدى. اتى ايتىپ تۇرعانداي, «بولاشاق» باعدارلاماسى جاستارىمىزعا تىڭ كۇش-سەرپىن سىيلاپ, العا جەتەلەدى. قابىلەتى بار جاستار تالپىنىپ, ءبىلىم جولىندا سايىستارعا قاتىناسىپ, باسەكەگە تۇسەتىن بولدى. 20 جىلدىڭ ىشىندە 9250 ستيپەنديا تاعايىندالىپ, 5714 ادام 33 شەت مەملەكەتتە ءبىلىمىن تولىقتىرىپ, ەلىنە امان-ەسەن كەلىپ, ەڭبەك ەتىپ جاتقانى بەلگىلى. وقىپ جاتقانى قانشاما.
وزىمە كەلەتىن بولسام, كەندى التايداعى زىريان قالاسىنداعى تەحنيكالىق ليتسەيدە وقىپ, وسكەمەندەگى د.سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىن «قىزىل ديپلومعا» ءتامامداپ, «وسكەمەن تيتان-ماگني كومبيناتىنا جۇمىسقا شاقىرىلدىم دا, 3 جىل ەڭبەك ەتىپ, تاجىريبە جيناقتاعان سوڭ «بولاشاق» باعدارلاماسىنا قۇجاتتارىمدى تاپسىردىم. رەسەيدىڭ ورتالىعى ماسكەۋ قالاسىنداعى بولات جانە قورىتپا ينستيتۋتىنىڭ (ميسيس) ماگيستراتۋراسىن قىزىل ديپلومعا ءتامامدادىم. رەسەيدە وقۋ مەن ءۇشىن ەشقانداي قيىندىق تۋعىزعان جوق. قازاقستانداعى ءبىلىمىمدى دالەلدەي تۇسكەندەي بولدىم. رەسەيدىڭ عالىمدارى ءبىلىمدى ءارى سونداي قاراپايىم, قازاقستاندىق ماگيسترانتتاردىڭ بىلىمىنە ءتانتى بولدى. بىتىرگەن سوڭ دوكتورانتۋراعا قالۋدى ءوتىندى, بىراق وتباسىلىق جاعدايىما بايلانىستى وقۋدى جالعاستىرا المادىم.
اتاعى جەر جارعان ءبىزدىڭ ۇجىمدى شيرەك عاسىر بويى قازاقستاننىڭ ەڭبەك ەرى باعدات شاياحمەتوۆ باسقارعانى بەلگىلى. تۇلعالى ازاماتتىڭ قامقورلىعىن كوپ كورگەندەردىڭ ءبىرى مەنمىن. ول كىسى ماسكەۋگە اتتانىپ بارا جاتقاندا مەنى قابىلداپ, «بىزگە ءبىلىمدى دە بىلىكتى مەتاللۋرگ ماماندار كەرەك. وقۋدى بىتىرگەن سوڭ كومبيناتقا كەل. جۇمىس ارقاشان تابىلادى» دەگەن ەدى. بارلىق تسەحتارداعى اتقارىلاتىن جۇمىستى بىرتىندەپ كوزىممەن كورىپ, قولىممەن ۇستاپ دەگەندەيىن, ىسكە كىرىسىپ, تاجىريبە جيناقتادىم. ەندى, العان ءبىلىمىمدى ەل يگىلىگىنە جاراتا السام, ماقساتتىڭ ورىندالعانى.
1991 جىلى قابىلدانعان «قازاقستاننىڭ تيتان-ماگني ونەركاسىبىن دامىتۋ باعدارلامالارىن» ىسكە اسىرعاننان كەيىن, «وسكەمەن تيتان-ماگني كومبيناتى» اق (بۇدان ءارى – «وتمك» اق) جوعارى ۇستەمە باعامەن شيكىزاتتى وندىرۋدەن باستاپ ءونىمدى شىعارۋعا دەيىن دۇنيەجۇزىندەگى جالعىز تولىعىمەن ينتەگرالدانعان تيتان ءوندىرۋشىسى اتاندى. كومبيناتتىڭ ءونىمى دۇنيەجۇزىنىڭ اۋە عارىشتىق سالالارىنىڭ بارلىق وندىرۋشىلەرىمەن سەرتيفيكاتتالعان. «وتمك» اق ەكولوگيالىق جانە ونەركاسىپتىك قاۋىپسىزدىگىنىڭ ساپا مەنەدجمەنتى «ISO 14001» جانە «OHSAS 18001» حالىقارالىق ستاندارتتارىنىڭ تالاپتارىنا ساي. قازىرگى كەزەڭدە «وتمك» اق تيتان ءونىمىنىڭ 100 پايىزىن ونەركاسىبى گۇلدەنگەن ەلدەرگە ەكسپورتقا شىعارادى. دۇنيەجۇزىلىك نارىقتاعى قازاقستاندىق تيتاننىڭ ۇلەسى شامامەن 11 پايىز, ال اۋەعارىشتىق سالادا 17 پايىزدان استام.
كومبينات 2012 جىلى «2012-2022 جىلدارداعى «وتمك» اق-تىڭ دامۋ باعدارلاماسىن» جاساپ شىعاردى جانە ديرەكتورلار كەڭەسى ونى بەكىتتى, ونىڭ قۇرامىنا ءوندىرىستى مودەرنيزاتسيالاۋ, سوزىلا تۇسكەن داعدارىس جاعدايىنداعى دۇنيەجۇزىلىك نارىقتا قازاقستاندىق تيتان ۇلەسىن ساقتاۋ, سونىمەن قاتار, ىشكى نارىقتا تيتاندى قولدانۋ اياسىن كەڭەيتۋ بويىنشا ستراتەگيالىق جوسپارلار كىرەدى.
پرەزيدەنت ن.نازارباەۆتىڭ «بولاشاق» باعدارلاماسى مەنىڭ جەكە ومىرىمە دە اسەرىن تيگىزبەي قويعان جوق. ميسيس-تە وقۋدا ءجۇرىپ, ءوزىمنىڭ جەرلەسىم گۇلفات اقىلجانقىزىمەن تانىسىپ, وقۋىمىزدى بىتىرگەن سوڭ ۇيلەندىك. ول دا ماگيستراتۋرانى ويداعىداي اياقتادى. قازىر ەكەۋمىز دە تمك-دا ەڭبەك ەتەمىز. سۇلتانا اتتى قىزىمىزدى تاربيەلەۋدەمىز.
مۇحامەتجان مالىكوۆ,
ماسكەۋدەگى بولات جانە قورىتپا ينستيتۋتىنىڭ ماگيسترانتى, «وسكەمەن تيتان-ماگني كومبيناتى» اق-تىڭ جەتەكشى ينجەنەرى.
وسكەمەن.
