ق.توقاەۆ پورتۋگاليالىق ساياساتكەردى بۇۇ باسشىسى لاۋازىمىنا سايلانۋىمەن قۇتتىقتادى جانە ءتاجىريبەلى ديپلومات, ساياساتكەر ءارى باسقارۋشى رەتىندە ونىڭ ۇيىمعا قوسىمشا سەرپىن بەرەتىنىنە سەنىم ءبىلدىردى. سەنات توراعاسى ا.گۋتەرريشتىڭ شتاب-پاتەرى جەنەۆادا ورنالاسقان بۇۇ بوسقىندار جونىندەگى جوعارعى كوميسسارى لاۋازىمىنداعى ءتيىمدى قىزمەتىن اتاپ ءوتتى. ق.توقاەۆتىڭ پىكىرىنشە, ا.گۋتەرريش بوسقىندار سانى ادام ايتقىسىز (60 ميلليونعا دەيىن) ۇلعايۋىنا اكەلىپ سوققان حالىقارالىق داعدارىستار مەن قاقتىعىستاردىڭ بارلىق قاتەرىنە تابىستى تۇردە قارسى تۇردى.
ق.توقاەۆ قازاقستان ديپلوماتياسى بۇۇ قاۋىپسىزدىك كەڭەسىنىڭ تۇراقتى ەمەس مۇشەسىنىڭ كۇردەلى ميسسياسىن ابىرويمەن اتقارادى دەپ سەنەدى. بۇۇ قاۋىپسىزدىك كەڭەسىندەگى ءبىزدىڭ ەلىمىزدىڭ قىزمەتى بەيبىتشىلىكتى قامتاماسىز ەتۋ, ورنىقتى دامۋ جانە ادام قۇقىقتارىن قورعاۋ جولىنداعى وسى جاھاندىق ۇيىمنىڭ الەۋەتىن نىعايتۋعا ىقپال جاسايدى. قازاقستان تەررورمەن كۇرەس, قاقتىعىستاردى رەتتەۋ, ورنىقتى دامۋدى قامتاماسىز ەتۋ جانە قازىرگى زامانداعى كوپتەگەن ماسەلەلەردى بۇۇ جۇيەسىنىڭ ۇيلەسىمدى جۇمىسىن جانە بارلىق مۇشە مەملەكەتتەردىڭ ءبىرلەسكەن كۇش-جىگەرىن تالاپ ەتەدى. سوندىقتان ءبىزدىڭ ەلىمىز بۇۇ-نىڭ جاڭا باس حاتشىسى ا.گۋتەرريشتىڭ قىزمەتىن قولدايتىن بولادى.
باس حاتشى لاۋازىمىنا كىرىسەر قارساڭدا ا.گۋتەرريش بۇۇ قاۋىپسىزدىك كەڭەسىنە تۇراقتى مۇشە بەس ەلدىڭ استانالارىنا جانە قازاقستاننىڭ ەلورداسىنا ساپارلاپ وتىر. «قازاقستان بۇۇ قاۋىپسىزدىك كەڭەسىنىڭ تاعى ءبىر جاي تۇراقتى ەمەس مۇشەسى بولىپ قانا قويمايتىنى انىق. ءسىزدىڭ ەلىڭىزدىڭ بىتىستىرۋشىلىك پەن ۇنقاتىسۋ ورناتۋدا ۇلكەن ءداستۇرى بار. قازاقستان حالىقارالىق ارەنادا ىنتىماق كوپىرىن ورناتۋدا ماڭىزدى ءرول اتقارادى. بۇگىندە الەمدەگى ءىرى ەلدەردە, سونداي-اق, ايماقتىق دەرجاۆالار اراسىندا ءبىرى-بىرىنە ءوزارا سەنىمسىزدىك باسىم بولىپ تۇرعان كەزدە, بۇل بىرىككەن ۇلتتار ۇيىمى ءۇشىن ەرەكشە مانگە يە, – دەپ اتاپ ءوتتى ا.گۋتەرريش.
جاڭا سايلانعان بىرىككەن ۇلتتار ۇيىمى باس حاتشىسىنىڭ ايتۋىنشا, قازاقستان حالىقارالىق شيەلەنىستى ازايتۋدا جانە قاجەتتى شەشىمدەرگە قول جەتكىزۋدە كومەكتەسە الادى. ا.گۋتەرريش قازاقستان مەن بىرىككەن ۇلتتار ۇيىمىنىڭ بىرلەسكەن ءىس-قيمىلىنىڭ نەگىزگى باعىتتارى قارۋسىزدانۋ, لاڭكەستىككە قارسى كۇرەس, دىندەر اراسىنداعى ۇنقاتىسۋ, ەكونوميكالىق دامۋ, تاعى باسقا دا ماسەلەلەر بولۋى ءتيىس دەپ سانايدى. سوندىقتان, استاناعا ساپارى اياسىندا جاڭا باس حاتشى قازاقستانمەن ىنتىماقتاستىقتىڭ جۇمىس الاڭىن قۇرۋعا نيەتتى.
