شارۋاعا ىڭعايلى جەر بولسا دا وتىن-سۋدىڭ تاپشىلىعىنان, جول قاتىناسىنىڭ قيىندىعىنان بىرنەشە جىل بۇرىن بوزتوبەنىڭ حالقى جان-جاققا كوشىپ كەتىپ, ءبىراز ءۇي قاڭىراپ قالدى. ادامى كەتىپ اۋىلدىڭ كۇيى تايعاندا امانگەلدى باقىتجان ۇلى «تۋىپ-وسكەن بوزتوبەمدى تاستامايمىن» دەگەن ۇيعارىمعا كەلگەن. ول كوپشىلىكپەن اقىلداسا كەلە ءىرى قارا, قوي وسىرۋگە شەشىم قابىلداپ, «اقجان» شارۋا قوجالىعىن قۇرىپ, كۇندىز-ءتۇنى تىنىم تاپپاي جۇمىس ىستەدى. ەگىن ەكتى, ءشوپ شاپتى, كوكونىس ءوسىرىپ, ونى ەرتە كوكتەمنەن كۇز تۇسكەنشە باپتادى. قوجالىقتىڭ جۇمىسىن جالعىز ادام شارۋالاي المايدى. كومەككە كۇندىز-ءتۇنى, قىسى-جازى بەل شەشپەي ەڭبەك ەتەتىن جۇمىسكەر جاندار كەرەك. امانگەلدى اقپانوۆتىڭ ەرجەتكەن بالالارى اكەسىنە سۇيەۋ بولدى. قىسى-جازى بىتپەيتىن تىرلىكتەن قاجىعاندا, قولدى ءبىر سىلتەپ, مالدى ساتىپ, قالاعا كەتىپ قالۋعا مۇمكىندىكتەرى بولسا دا, بۇل اۋلەتتىڭ بالالارى قيىندىقتى ەڭسەرە ءجۇرىپ ابدەن شىڭدالدى.
اقتوبە وبلىسىنىڭ ىشكەرى اۋداندارىنا قاراعاندا, سولتۇستىك بەتتەگى قارعالى مەن مارتوك اۋداندارىندا مال ۇستاۋ وتە قيىن. ويتكەنى بۇل جاقتا مال قازاننىڭ ورتاسىنان باستاپ قوراعا كىرەدى دە, سودان ءساۋىردى ورتالاي بەرە جايىلىمعا ءبىر-اق شىعادى. دالا قارا سۋىق, جەر بالشىق. اسىرەسە التى اي قورادا بايلانعان ءىرى قاراعا قانشاما جەمشوپ كەرەك؟ ەسەپتەي كەلگەندە ءبىر ءىرى قارانىڭ جەمشوبىنە جۇمسالاتىن قارجى ونى ساۋدالاعانداعى باعاسىنان بىرنەشە ەسە اسىپ تۇسەدى. جەمشوپ شىعىنىن ازايتۋ ءۇشىن امانگەلدىنىڭ بالالارى كوكتەم شىعا وسى شارۋاعا كىرىسەدى. ۇلكەن بالاسى سۇلتان – اكەسىنىڭ وڭ قولى. ول قىسى-جازى شارۋاشىلىقتىڭ باسى-قاسىندا ءجۇرىپ, ەگىن ەگۋ مەن ونى جيناۋدى جاقسى ۇيىمداستىرادى. قازىرگى كەزدە بۇل ءۇيدىڭ وتاناسى مەن كەلىندەرى ءسۇتتى جاقسى ۇقساتادى. ولار مال جايىلىمعا شىققان كەزدەن باستاپ وزدەرى ساۋعان سۇتتەن ماي, قۇرت, ىرىمشىك جاساپ, قارعالى اۋدانىنىڭ ورتالىعى بادامشا مەن اقتوبە قالاسىنىڭ بازارلارىندا ساۋداعا شىعارىپ ءجۇر.
قوجالىقتىڭ 708 گەكتار جەرى بار. ونىڭ 600 گەكتارى جايىلىمدىق ماقساتتا پايدالانىلادى, 108 گەكتار جەرگە ارپا, بيداي, تارى ەگىلەدى. سەگىز جىلدا شارۋاشىلىقتىڭ شەڭبەرى كەڭەيىپ, ليزينگكە جاڭا تەحنيكالار ساتىپ العان. جاڭا تەحنيكانىڭ كومەگىمەن سۋارمالى شارۋاشىلىققا كوشتى. كۇزگى جيىن-تەرىم ۋاقىتىندا ءوز كومباينى, تراكتورلارى, ءشوپ شاباتىن جانە تىعىزدايتىن, بۋاتىن تەحنيكالارى دا ىسكە قوسىلادى. شارۋاشىلىق اۋماعى كەڭەيگەن سوڭ بوزتوبە اۋىلىنىڭ ەكى تۇرعىنىن تۇراقتى جۇمىسقا الدى. ال ماۋسىمدىق جۇمىستار قىزعان كەزدە, اسىرەسە كۇزگى جيىن-تەرىم باستالعاندا باسقا دا اۋىل تۇرعىندارىنا جۇمىس تابىلادى.
«اقجان» شارۋا قوجالىعى جىل سايىن وبلىس ورتالىعىندا تۇراقتى تۇردە وتكىزىلەتىن اۋىل شارۋاشىلىعى جارمەڭكەلەرىندە 2,5 مىڭ تونناعا جۋىق ەت ساتادى. قوجالىقتىڭ ءوز بورداقىلاۋ الاڭى بار. بۇل شارۋاشىلىقتىڭ باسقا جاققا ءىرى قارا ەتىن ساۋدالاۋعا سەپتىگىن تيگىزىپ وتىر. فەرمەردىڭ ايتۋىنشا, وتكەن جىلى 16-18 اي بويى ەرەكشە كۇتىممەن باعىلعان 15 باس ءىرى قارانىڭ ارقايسىسىنان 200 كيلودان استام ەت الىنعان.
بۇل اۋلەت قازىر اۋىلداستارىنا ۇلگى. اششىلىساي اۋىلدىق وكرۋگىنىڭ اكىمى اسىلبەك بيمانباەۆتىڭ ايتۋىنشا, توڭىرەكتەگى اۋىلداردا تۇراتىن مۇقتاج وتباسىلاردىڭ ۇيلەرىنە قىستىق سوعىم ەت, كومىر, تامىزىق وتىن ءتۇسىرىپ بەرىپ كومەكتەسىپ وتىرادى ەكەن.
اقتوبە وبلىسى,
قارعالى اۋدانى
