بۇل پروباتسيا ينسپەكتورلارى مەن جەرگىلىكتى اتقارۋشى ورگاندار وكىلدەرىنىڭ بىرلەسىپ اتقارعان جۇمىستارىنىڭ ناتيجەسى. جۋىردا قارماقشى اۋداندىق پروباتسيا ەسەبىندە تۇراتىن جوسالىلىق جىگىت جاساندى تاس شىعاراتىن كاسىپ اشتى. ال جۇبايى مال شارۋاشىلىعىمەن اينالىسىپ, وتباسىلىق كاسىپتى دامىتىپ وتىر.
سوتتالعان ازامات بيىل "ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017 – 2021 جىلدارعا ارنالعان باعدارلاماسى" بويىنشا "باستاۋ بيزنەس" جوباسى اياسىندا وقۋ كۋرسىن اياقتاعان بولاتىن. كۋرستى اياقتاعان سوڭ بيزنەس جوسپارىن قۇرىپ, كوميسسياعا ۇسىندى. كوميسسيانىڭ وڭ شەشىمىن العاننان كەيىن وعان مەملەكەت تاراپىنان قايتارىمسىز گرانت نەگىزىندە 555 666 تەڭگە كولەمىندە سەرتيفاكات تابىستالدى. وسى قارجىعا جاساندى تاس شىعارۋعا قاجەتتى زاتتاردى الىپ, كاسىبىن باستاپ تا كەتتى.
– بىردە الەۋمەتتىك جەلىلەردى شولىپ وتىرعانىمدا وسى كاسىپ جايلى ءبىلدىم. بۇل مەنى بىردەن قىزىقتىردى. مەملەكەت تاراپىنان بەرىلگەن قايتارىمسىز گرانتقا قاجەتتى زاتتاردى الدىم. جاساندى تاس گيپستەن جاسالادى, گيپستى قاتايتۋ ءۇشىن پلاستيفيكاتور قولدانىلادى. تاستى ءار تۇسكە بوياۋعا بولادى. بۇل ونىمگە سۇرانىس وتە كوپ. اۋدانداعى جاساندى تاس شىعاراتىن جالعىز كاسىپكەر مەن بولعاندىقتان, جۋىردا وبلىستا وتەتىن كورمەگە قاتىسقالى وتىرمىن, – دەدى ەسەپتەگى ازامات.
جىل باسىنان پروباتسيا ەسەبىندەگى 4 سوتتالعان "باستاۋ بيزنەس" جوباسى اياسىندا كاسىپكەرلىك نەگىزىندە وقۋ كۋرسىن اياقتاپ, ەكەۋى مال شارۋاشىلىعىن, تاعى ەكەۋى تاۋىق ءوسىرۋ جانە جاساندى تاس جاساۋ جەكە كاسىبىن اشتى.
– ەسەپتەگى ازاماتتارعا الەۋمەتتىك-قۇقىقتىق كومەك تۇرلەرىن كورسەتۋ بارىسىندا وتباسىلىق جاعدايىن دا زەردەلەيمىز. تۇرمىس جاعدايى تومەن وتباسىلارعا ءتيىستى الەۋمەتتىك كومەك كورسەتىلەدى, – دەيدى اۋداندىق پروباتسيا قىزمەتىنىڭ اعا ينسپەكتورى, ادىلەت مايورى ج.ءجۇنىسوۆ
