"ەلدى-مەكەندەردە جۇمىستار بىركەلكى جۇرگىزىلىپ جاتىر. قالانىڭ شەتكى ايماقتارىندا جولدار سالىنىپ, كارىز, ەلەكتر, سۋمەن جابدىقتاۋ جەلىلەرى تارتىلىپ, پوليورتالىق قاراي ىڭعايلانىپ جاسالۋدا. تۇرعىندارعا قولايلى ءارى جايلى ورتالاردىڭ قالىپتاسۋى ارقىلى ەلدى-مەكەندەردىڭ وزىندىك ءستيلى ايقىندالىپ كەلەدى. مىسالى, كوكتال ەلدى-مەكەنىندە ۇزىندىعى 16 گەكتارعا جۋىق جاڭا ساياباق, ءوندىرىس ەلدى-مەكەنىندە تىنىمباق, سونىمەن بىرگە ەلدى-مەكەندەردە ءتورت بىردەي ۇلكەن دەنە شىنىقتىرۋ-ساۋىقتىرۋ كەشەنىنىڭ قۇرىلىسى جۇرگىزىلىپ جاتىر. جەكە سەكتور تۇرعىندارىنىڭ تۇرمىس ساپاسىن ارتتىرۋ ماقساتىندا گاز تاراتۋ جەلىلەرىن جۇرگىزەمىز.
جەلەزنودوروجنىي ەلدى-مەكەنىندە ورنالاسقان ۇيلەر قاراشا ايىنىڭ باسىندا گازعا قوسىلا باستادى. ۇيىنە گاز قوسقىسى كەلەتىن ادامداردىڭ سانىنىڭ ارتقانىن بايقادىق. بۇل ءبىزدى قۋانتادى. ويتكەنى گازعا كوشىرۋدىڭ كوپتەگەن ارتىقشىلىعى بار. ناتيجەسىندە قورشاعان ورتاعا زياندى زاتتاردىڭ تارالۋى ازايىپ, ەكولوگيا جاقسارادى. سونىمەن بىرگە ەندى تۇرعىندارعا كومىردى ساتىپ الۋ, ونى ساقتاۋ, ساپاسى تۋرالى ويلانۋدىڭ, كۇنىنە بىرنەشە رەت ءۇيدى جىلىتۋدىڭ قاجەتى جوق.
"جەلەزنودوروجنىي" ەلدى-مەكەنىنىڭ تۇرعىندارىمەن كەزدەستىم. ولاردىڭ قاتارىنادا جاقىندا عانا گازعا كوشكەن تۇرعىندار دا بولدى. جەرگىلىكتى ازاماتتارمەن ەلدى-مەكەندى دامىتۋ ماسەلەلەرىمەن قاتار 2021 جىلدىڭ جوسپارىن تالقىلادىق.
سونىمەن بىرگە پرومىشلەننىي, كوكتال-2, اگروگورودوك ەلدى-مەكەنىنىڭ ءبىر بولىگىندە قۇرىلىس-مونتاجداۋ جۇمىستارى اياقتالسا, قازىر سىعىمداۋ جۇمىستارى جۇرگىزىلىپ جاتىر. ولاردى وسى جىلدىڭ جەلتوقسان ايىنا دەيىن گازعا قوسۋدى جوسپارلاپ وتىرمىز. وسى جىلدىڭ سوڭىنا دەيىن كوكتال-1 ەلدى-مەكەنىنىڭ تۇرعىندارىندا دا گازعا قوسىلا الادى.
700-دەن استام تۇرعىن تەحنيكالىق شارتتاردى السا, 3,5 مىڭنان استام تۇرعىنعا فرونت-وفيستەردە كەڭەس بەرىلدى. ءبىر تەكشە مەتر گازدىڭ باعاسى 45 تەڭگەدەن 34,6 تەڭگەگە دەيىن تومەندەدى.
گازبەن قامتۋ – ەلباسىنىڭ ستراتەگيالىق جوباسى. تۇڭعىش پرەزيدەنتتىڭ 5 الەۋمەتتىك باستاماسى اياسىندا سالىنعان "سارىارقا" ماگيسترالدىق گاز قۇبىرى ورتالىق قازاقستان مەن ەلوردانى ەلىمىزدىڭ بىرىڭعاي گاز تاسىمالداۋ جەلىسىمەن بايلانىستىرادى.
قالانى گازداندىرۋ ءۇش كەزەڭدە جۇرگىزىلەدى. بۇل پروتسەسس مەملەكەت باسشىسىنىڭ ءاردايىم باقىلاۋىندا.
سونىمەن قاتار, وسى ايدا جەو-1 جانە جەو-2 سۋ جىلىتۋ قازاندىقتارىنىڭ ءبىر بولىگى گازعا اۋىستىرىلدى", دەپ جازدى التاي كولگىنوۆ.
