بۇعان قوسا حالىقارالىق تاسىمالداۋدى جۇزەگە اسىرۋ كەزىندە تمد-عا قاتىسۋشى مەملەكەتتەردىڭ اۋماقتارىندا كولىك قاۋىپسىزدىگىن قامتاماسىز ەتۋ ستراتەگياسىن ىسكە اسىرۋ جونىندەگى ءىس-شارالار جوسپارى جانە ۇيىمعا مۇشە مەملەكەتتەردىڭ گۋمانيتارلىق ىنتىماقتاستىعى سالاسىنداعى باسىم باعىتتار ايقىندالدى.
قىزمەتتىڭ ءتۇرلى باعىتتارى بويىنشا الدىن الا كەلىسىلگەن بىرقاتار قۇجاتقا, اتاپ ايتقاندا, بەيبىت ماقساتتاردا اتوم ەنەرگياسىن پايدالانۋ, سوعىس ارداگەرلەرى – جەرگىلىكتى جانجالدارعا قاتىسۋشىلار مەن ولاردىڭ وتباسى مۇشەلەرىنىڭ ءومىر ءسۇرۋ ساپاسىن ارتتىرۋ سالاسىنداعى ىنتىماقتاستىق باعدارلامالارىنا, سونداي-اق يننوۆاتسيالارعا تالقىلاۋسىز قول قويىلدى.
سول سەكىلدى قوعامنىڭ تسيفرلى دامۋ سالاسىنداعى ءوزارا ءىس-قيمىلدارىن رەگلامەنتتەيتىن كەلىسىمگە قول قويىلدى. سوعان سايكەس مەملەكەتتەردىڭ بيۋدجەتتەرىنەن قوسىمشا شىعىندار تارتىلمايدى. كاسىپكەرلىك سۋبەكتىلەرىنىڭ قۇقىقتارى شەكتەلمەيتىندەي, قازاقستان زاڭناماسىنا قايشى كەلمەيتىن جانە راتيفيكاتسيالاۋعا جاتپايتىن تۇستارى قاراستىرىلعان دەدى جاۋاپتى ورگان وكىلدەرى.
ىنتىماقتاستىق بىرنەشە باعىتتى قامتيدى. ونىڭ ىشىندە تسيفرلى ەكوجۇيەنى جانە اقپاراتتىق قاۋىپسىزدىكتى دامىتۋ باعىتى, اكت دامىتۋ, كادرلىق دامۋ جانە نورماتيۆتىك-قۇقىقتىق رەتتەۋ بولىگىندە تاجىريبە الماسۋ بويىنشا جۇزەگە اسىرىلاتىن بولادى.
كەلىسىم كۇشىنە ەنگەننەن كەيىن قۇزىرەتتى ورگانداردىڭ تىزبەسىن قالىپتاستىرۋ, اقپاراتتىق ءوزارا ءىس-قيمىل ءتارتىبىن, وسى سالادا ءوزارا ءىس-قيمىلدى جۇزەگە اسىرۋ كەزىندە بەرىلەتىن اقپاراتتىڭ سيپاتىن ايقىنداۋ كوزدەلەدى.
تمد ۇكىمەت باسشىلارى كەڭەسىنىڭ كەلەسى وتىرىسى كەلەسى جىلى 28 مامىردا مينسكىدە وتەدى.
