بۇل تۋرالى ول بەينەكونفەرەنتسيا فورماتىندا وتكەن ازيا پارلامەنتشىلەرى فورۋمى اتقارۋشى كوميتەتىنىڭ 89-شى وتىرىسىندا سويلەگەن سوزىندە مالىمدەدى.
گۇلميرا يسيمباەۆانىڭ ايتۋىنشا, ۇيىم قىزمەت ەتكەن جىلدار ىشىندە تۇراقتى دامۋ ماقساتتارىن ىسكە اسىرۋ بويىنشا زاڭنامالىق بازانى قالىپتاستىرۋ جانە كەڭەيتۋ ماسەلەلەرى بويىنشا كوپتەگەن جۇمىس اتقاردى. بۇل پارلامەنت وكىلدەرىنىڭ ازيا وڭىرىندەگى حالىق سانى مەن دامۋ پروبلەمالارىن شەشۋگە قوسقان قوماقتى ۇلەسى.
جيىن بارىسىندا ءماجىلىس توراعاسىنىڭ ورىنباسارى پارلامەنتشىلەردىڭ جاستاردى قولداۋ ماسەلەلەرىنە ەرەكشە نازار اۋدارعانىنا توقتالىپ, 2018 جىلى قازاقستان استاناسىندا «جاستارعا – ينۆەستيتسيا» اتتى حالىقارالىق كونفەرەنتسيا ۇيىمداستىرعانىن اتاپ ءوتتى.
ءماجىلىس ۆيتسە-سپيكەرى قازاقستاننىڭ ۇلتتىق, وڭىرلىك جانە جاھاندىق دەڭگەيدە حالىقتىڭ قونىستانۋى مەن ورنىقتى دامۋ پروبلەمالارىمەن اينالىساتىن بارلىق حالىقارالىق ۇيىمدارمەن بەلسەندى ىنتىماقتاستىق ورناتقانىنا نازار اۋداردى.
گۇلميرا يسيمباەۆا ازيا-تىنىق مۇحيتى ءوڭىرىنىڭ حالىق سانى مەن دەموگرافياسى ماسەلەلەرى بويىنشا دەرەكتەر بازاسىن قۇرۋ, ورتاق زاڭدىلىقتار مەن ەرەكشەلىكتەردى انىقتاۋ, دەموگرافيالىق پروبلەمالاردى شەشۋدە تاجىريبە الماسۋ جانە جيناقتاۋ مەملەكەتتەرگە الدىن الۋ شارالارىن قابىلداۋعا جانە سول ارقىلى كوپتەگەن الەۋمەتتىك پروبلەمانى بولدىرماۋعا مۇمكىندىك بەرەتىنىنە توقتالدى.
ءماجىلىس توراعاسىنىڭ ورىنباسارى پاندەميا كەزىندەگى كۇردەلى ەكونوميكالىق جاعدايدا الەۋمەتتىك-ەكونوميكالىق باعدارلامالار قازاقستانداعى مەملەكەتتىك ساياساتتىڭ باسىم باعىتى بولىپ وتىرعانىنا نازار اۋداردى. وسىعان سايكەس مەملەكەت باسشىسى قاسىم-جومارت توقاەۆتىڭ تاپسىرماسى بويىنشا حالىقتىڭ الەۋمەتتىك قورعالماعان توپتارىنا قولداۋ كورسەتۋ جانە جۇمىس ورىندارىن ساقتاۋ ءۇشىن شارالار كەشەنى ازىرلەنگەنىن اتاپ ايتتى.
بەينەكونفەرەنتسيا فورماتىندا وتكەن وتىرىستا ازيا پارلامەنتشىلەرى فورۋمىنىڭ توراعاسى كەيزو تاكيمي جانە ۇيىمنىڭ ۋاقىتشا اتقارۋشى ديرەكتورى كيوكو يكەگامي قۇتتىقتاۋ ءسوز سويلەدى.
جيىن بارىسىندا قاتىسۋشىلار ۇيىمنىڭ قىزمەتى تۋرالى ەسەپتى, سونداي-اق الداعى كەزەڭگە ارنالعان جوسپارلاردى تالقىلادى, دەپ حابارلادى ءماجىلىستىڭ ءباسپاسوز قىزمەتى.
