سالتاناتتى جيىندى اشقان اقپارات جانە قوعامدىق دامۋ ءمينيسترى ايدا بالاەۆا ۇشكۇندىك شارانىڭ وتاندىق اقپارات سالاسىنىڭ الەمدىك باسەكەگە قابىلەتتى ەكەنىن كورسەتكەنىن اتاپ ءوتتى.
ء«ۇش كۇنگە سوزىلعان Astana Media Week جوباسى حالىقارالىق جۋرناليستيكانىڭ نازارىن ەلوردامىزعا اۋدارعان ەرەكشە ءىس-شارا بولدى. بۇگىندە بۇكىل الەمدى ابىگەرگە سالعان پاندەميا جاعدايىندا الەم جۋرناليستەرى ءبىر ارنادا توعىسىپ, ءوز كاسىپتەرىنە دەگەن ادالدىقتى كەزەكتى رەت دالەلدەپ وتىر. ونلاين فورماتتاعى پلاتفورمادا الەمنىڭ 16 مەملەكەتىنىڭ كورەرمەندەرى ءۇشىن 50-دەن استام حالىقارالىق مەديا ساراپشى ءوز تاجىريبەلەرىن ورتاعا سالدى. جانە ەڭ باستىسى – ءبىزدىڭ وتاندىق جۋرناليستيكا دەڭگەيى دە الەمدىك باسەكەگە قابىلەتتىلىگىنە كوز جەتكىزدىك», دەدى مينيستر.
قاتىسۋشىلار اقش, ۇلىبريتانيا, شۆەتسيا, ساۋد ارابياسى, رەسەي سەكىلدى ەلدەردەن قوسىلعان بىلىكتى ساراپشىلاردان سالاداعى سوڭعى وزگەرىستەر مەن ترەندتەر تۋرالى اقپارات الىپ, پاندەميا سالدارىنان وزگەرىسكە ۇشىراعان مەديانىڭ بولاشاعى تۋرالى ورامدى ويلارىن تىڭدادى.
«وسىنداي ورتاق الاڭدا ءوزارا تاجىريبە الماسىپ, وزىق ۇلگىلەردى ۇيرەنۋ جۋرناليستەردىڭ بىلىكتىلىگىن جەتىلدىرىپ, ونى جاڭا دەڭگەيگە كوتەرەتىنى انىق. سونىڭ ىشىندە وتاندىق مەديا سالانىڭ ودان ءارى دامۋىنا ۇلكەن سەرپىن بەرەدى دەپ سەنەمىز. «ۇركەر» ۇلتتىق بايگەسىنىڭ ماراپاتتاۋ ءراسىمى Astana Media Week اپتالىعى اياسىندا ءوتىپ وتىر», دەپ اتاپ ءوتتى ۆەدومستۆو باسشىسى.
قوعامداعى ءار سالانىڭ وزىندىك ورنى بارىن باسا ايتقان ا.بالاەۆا, سونىڭ ىشىندە جۋرناليستيكانىڭ قوعام ءۇشىن اتقارىپ وتىرعان ەڭبەگىن جوعارى باعالادى. ونىڭ ايتۋىنشا, ءاربىر قىزمەت لايىقتى باعاسىن الۋى كەرەك. مينيستر قازىلار القاسى جۇزدەن جۇيرىك شىققاندارعا لايىقتى باعاسىن بەرگەنىنە سەنىمدى ەكەنىن جەتكىزدى.
اقپارات سالاسىنداعى ۇلتتىق سىيلىق بيىل ءتورتىنشى رەت تابىستالىپ وتىر. بيىلعى بايقاۋدىڭ جاڭالىعى – قازاق جۋرناليستيكاسىنىڭ جامپوزى شەرحان مۇرتازا اتىنا ارنايى اتالىم تاعايىندالعانى بولدى.
«شەرحان اعامىزدىڭ وتاندىق جۋرناليستيكانى دامىتۋدا اتقارعان ەڭبەگى مەن قوسقان ۇلەسى ولشەۋسىز. سوندىقتان دا قازاق جۋرناليستيكاسىنىڭ اسقار شىڭى سانالاتىن شەراعا اتىنداعى ماراپاتقا يە بولۋ – كىم ءۇشىن دە زور مارتەبە, بيىك جەتىستىك دەپ بىلەمىن», دەدى ايدا بالاەۆا. اتالعان اتالىم بويىنشا مۇسىنشە مەن 1 ميلليون تەڭگەنى قازاق جۋرناليستيكاسىنىڭ اقتاڭگەرى, پۋبليتسيست قاينار ولجاي جەڭىپ الدى.
سالتاناتتى جيىندا بارلىعى 11 اتالىم بويىنشا ۇزدىكتەر انىقتالدى. «جىلدىڭ ۇزدىك فوتوسۋرەتى» اتالىمىنا تاۋەلسىز ەكولوگيالىق شولۋشى ساكەن دىلداحمەت, ال «ۇزدىك رەپورتاج» اتالىمىندا Kyzylorda-news.kz پورتالىنىڭ قىزمەتكەرى نۇرسۇلتان مىقتىباەۆتىڭ جۇمىسى جوعارى باعاعا يە بولدى. ودان بولەك, «جىلدىڭ ۇزدىك اناليتيكالىق ماتەريالى» بويىنشا Strategy2050.kz پورتالىنان كايرات جاندىباەۆ, «ۇزدىك جۋرناليستىك زەرتتەۋ» اتالىمىندا «ۆرەميا» گازەتىنىڭ ءجۋرناليسى ميحايل كوزاچكوۆ, «ۇزدىك تانىمدىق ماتەريال» بويىنشا Sputnik كازاحستان اقپارات اگەنتتىگىنەن تيمۋر نيتاليەۆ ماراپاتتالدى. ال «Egemen Qazaqstan» گازەتىنىڭ ءتىلشىسى گۇلبارشىن ساباەۆا «جىلدىڭ ۇزدىك سۇحباتى» اتالىمىندا جەڭىسكە جەتتى. سونداي-اق ۇزدىك ماراپاتقا شىعارماشىلىق ۇجىمدار دا يە بولدى. «Atyray» راديوستانساسىنداعى «ەفيردە 102 FM» باعدارلاماسى «راديوستانساداعى ۇزدىك جوبا», TengriNews پورتالى «ۇزدىك جاڭالىقتار پورتالى», جامبىلدىق «AQ JOL» گازەتى «جىلدىڭ ۇزدىك گازەتى», «جۇلدىز» جۋرنالى «جىلدىڭ ۇزدىك جۋرنالى» دەپ تانىلدى.
جەڭىمپازدارعا سەرتيفيكات, «ۇركەر» ەستەلىك مۇسىنشەسى مەن 1 ميلليون تەڭگە اقشالاي سىيلىق تابىستالدى.
قاۋىپسىزدىك شارالارىنا بايلانىستى كورەرمەندەر ماراپاتتاۋ ءراسىمىن تىكەلەي ەفيردە كورۋگە مۇمكىندىك الدى. بيىل بارلىعى 470 ءوتىنىم كەلىپ ءتۇستى. اقپارات سالاسىنىڭ ۇزدىكتەرىن بەدەلدى قايراتكەرلەر, شىعارماشىلىق زيالى قاۋىم وكىلدەرى جانە تانىمال قازاقستاندىق جۋرناليستەردەن قۇرالعان قازىلار القاسى تاڭداعان.
Astana Media Week شاراسىنىڭ بيىلعى فورماتى قاتىسۋشىلار مەن قوناقتارعا جاڭا مۇمكىندىكتەر اشتى. بىلىكتى ساراپشىلاردىڭ قاتىسۋىمەن وتكەن پانەلدىك سەسسيالاردى سايت ارقىلى 25 مىڭ, الەۋمەتتىك جەلىلەر ارقىلى 10 مىڭعا جۋىق ادام تاماشالاعان. ورتا ەسەپپەن 1 پانەلدىك سەسسياعا 2500-گە جۋىق قاتىسۋشى قاتىستى. مينيستر ا.بالاەۆا شارانى وفلاين ۇيىمداستىرعان كەزدە زالعا وسىنشاما ادامدى سىيعىزا الماس ەدىك دەيدى. سونداي-اق ونىڭ ايتۋىنشا, قاتىسۋشىلاردىڭ گەوگرافياسى دا كەڭەيگەن. شارانى قازاقستان تۇرعىندارى عانا ەمەس, الەمنىڭ 16 ەلىنەن تاماشالاعان. مينيستر Astana Media Week شاراسىنىڭ حالىقارالىق دەڭگەيدە وتكەنىن ايتا كەلە, الداعى ۋاقىتتا دا وسىنداي فورماتتى قولدايتىنىن جەتكىزدى.
