بۇگىنگى تاڭدا سانيتارلىق-كارانتيندى پوستاردا ەپيدەميولوگتار پتر-تەست انىقتاماسىنىڭ بار-جوعىن ءجىتى تەكسەرىپ جاتىر.
"2020 جىلدىڭ 13 قاراشاسىندا نۇر-سۇلتانعا دۋبايدان 129 جولاۋشى ۇشىپ كەلدى. ونىڭ ىشىندە 125 ادام پتر-تەست انىقتاماسى بولعانىمەن, 4-ءى انىقتاماسىز كەلدى. پتر-تەست انىقتاماسى جوق قازاقستان ازاماتتارى ءتارتىپ بويىنشا ترانزيتپەن ىشكى رەيستەرگە وتىرۋ ءۇشىن پتر-تەستەن ءوتۋ ءۇشىن كارانتينگە جاتقىزىلدى. 13 قاراشادا نۇر-سۇلتان اۋەجايىنا قازاقستان ازاماتى كەلىپ, ترانزيتپەن الماتىعا ۇشپاق بولعان. پتر-اناليزدەن وتكەنى تۋرالى انىقتامانى وتكىزگەن. ەپيدەميولوگتار اتالمىش انىقتامانى تەكسەرۋ بارىسىندا قورىتىندىدا COVID-19 بويىنشا وڭ (positive) ناتيجە دەپ كورسەتىپ تۇرعانىن كوردى. وسىلايشا كوروناۆيرۋس جۇقتىرعان ايەل جولىنان قالىپ, ەلورداداعى كارانتيندىك ستاتسيونارعا جاتقىزىلدى", دەدى سادۋاقاس بايعابىلوۆ.
كوروناۆيرۋس جۇقتىرعان ايەل دۋبايدان ۇشىپ كەلگەن سوڭ 20 مينۋتتان كەيىن الماتىعا باعىت العان ۇشاققا وتىرماق بولعان. الايدا ەپيدەميولوگ جولاۋشىعا ساپاردى جالعاستىرۋعا رۇقسات بەرمەي, ىشكى رەيستەردەگى جولاۋشىلاردىڭ اۋرۋ جۇقتىرۋ قاۋپىنە توسقاۋىل قويعان.
قازىرگى تاڭدا حالىقارالىق اۋە رەيستەرىمەن قازاقستانعا كوروناۆيرۋس جۇقتىرىپ اكەلۋدىڭ 54 جاعدايى تىركەلگەن. اتاپ ايتقاندا نۇر-سۇلتانعا كوروناۆيرۋس جۇقتىرعان 12, الماتىعا 40, شىمكەنتكە 2 ادام شەتەلدەن ۇشىپ كەلگەن.
