سوڭعى ۋاقىتتا ىندەت جۇقتىرعانداردىڭ كوبەيگەنى مەن ۆيرۋستىڭ مۋتاتسيالانعان ءتۇرى پايدا بولدى دەگەن ۇرەيلى حابارلار قاپتاپ كەتكەن-ءدى. پاندەميانى اۋىزدىقتاۋ جولىنداعى جالعىز ءۇمىت وسى ۆاكتسينادا ەدى. Pfizer جانە BioNTech ازىرلەگەن ۆاكتسينانىڭ الدىن الا ناتيجەلەرى COVID-19-دان قورعانۋدا 90 پايىز ءتيىمدى ەكەنىن كورسەتتى. بۇل – سىناقتىڭ ءۇشىنشى كەزەڭىندەگى ۆاكتسينالار اراسىنداعى العاشقى دەرەك. ەكسپەريمەنتتىك كەزەڭدە كەيبىر ۇمىتكەرلەردىڭ ساتسىزدىككە ۇشىراۋى زاڭدى ەكەنىن ەسكەرسەك, بۇل – سالاداعى ۇلكەن جەتىستىكتىڭ ءبىرى ەكەنىن اڭعارۋ قيىن ەمەس. ۆاكتسينا يممۋندىق جۇيەنى كۇرەسكە دايىنداۋ ءۇشىن اعزاعا ۆيرۋستىڭ گەنەتيكالىق كودىنىڭ ءبىر بولىگىن ەنگىزەدى. قازىرگە دەيىن شامامەن 43 مىڭ ادام الىپ ۇلگەرگەن. ناتيجەسىندە, قاۋىپسىزدىك بويىنشا ەشقانداي ماسەلەنىڭ بولماعانى ايتىلادى. Pfizer جىل سوڭىنا دەيىن 50 ملن دوزا ازىرلەۋدى كوزدەپ وتىر. ال 2021 جىلدىڭ سوڭىنا قاراي شامامەن 1,3 ملرد دوزا ۆاكتسينا دايىن بولۋى كەرەك.
قاراشا ايىنىڭ ءۇشىنشى اپتاسىندا كومپانيا بيلىككە ءوز ءونىمىن بەكىتۋ تۋرالى ۇسىنىس جاساماق. العاشقىلاردىڭ ءبىرى بولادى دەپ سەنگەن وزگە ۆاكتسينالار ءالى ارتتا كەلەدى. وسىعان دەيىن ۇزدىك دەپ تانىلعان تاعى ءبىر امەريكالىق Moderna كومپانياسى جۇرگىزگەن سىناق ناتيجەسى 25 قاراشادا عانا بەلگىلى بولادى. ال كوپ ءۇمىت كۇتتىرگەن AstraZeneca مەن وكسفورد ۋنيۆەرسيتەتىنىڭ ورتاق ءونىمى جىل سوڭىنا دەيىن ناتيجە كورسەتۋى كەرەك.
جالپى, اقش-تىڭ ازىق-ت ۇلىك جانە ءدارى-دارمەكتەردى باسقارۋ اكىمشىلىگى COVID-19 ۆاكتسيناسىن بەكىتۋ ءۇشىن ءونىمنىڭ سىناق كەزىندە 50 پايىز تيىمدىلىكتى كورسەتۋىن تالاپ ەتەدى. ال Pfizer جانە BioNTech كومپانيالارىنىڭ ءونىمى بۇل مەجەدەن الدەقايدا اسىپ, 90 پايىز ءتيىمدى ەكەنىن دالەلدەدى. دۇنيەجۇزىلىك دەنساۋلىق ساقتاۋ ۇيىمىنا سەنسەك, ەشبىر ۆاكتسينا تولىق 100 پايىز ءتيىمدى بولا المايدى.
جاقسى جاڭالىقتان كەيىن Pfizer اكتسيالارى نيۋ-يوركتەگى نارىققا دەيىنگى ساۋدا-ساتتىقتا شامامەن 15%-عا, ال NASDAQ بيرجاسىندا تىركەلگەن BioNTech كومپانياسىنىڭ اكتسيالارى 25%-عا وسكەن.
ۆاكتسيناعا تالاستىڭ قىزۋ بولاتىنى ارىدەن بەلگىلى بولدى. كومپانياعا سەنىم بىلدىرگەن كەيبىر ەلدەر الدىن الا تاپسىرىس بەرىپ ۇلگەرگەن. اقش 100 ملن دوزا ۆاكتسينا الۋى مۇمكىن, وعان قوسا تاعى 500 ملن دوزاسىن الۋدى جوسپارلاپ وتىر ەكەن. ۇلىبريتانيا ازىرگە 30 ملن دوزا ۆاكتسيناعا قول جەتكىزەدى. ەۋروپالىق وداق 200 ملن دوزا ۆاكتسينا الۋ ءۇشىن كومپانيالارمەن كەلىسسوز جۇرگىزىپ جاتقان كورىنەدى. ۆيرۋسپەن كۇرەس ءتيىمدى بولۋى ءۇشىن ءار ادامعا ەكى دوزادان سالىنادى.
دەگەنمەن, ۆاكتسينا تابىلعانىمەن, بوساڭسۋعا بولمايدى. سەبەبى حالىقتىڭ ءبارىن بىردەن ەگۋ مۇمكىن ەمەس. جىل سوڭىنا دەيىن ۆاكتسيناعا قول جەتكىزگەن ەلدەر ەڭ الدىمەن دەنساۋلىق ساقتاۋ سالاسىنىڭ قىزمەتكەرلەرىنەن باستاپ ۆيرۋس جۇقتىرۋعا بەيىم, دەنساۋلىعى ناشار ەگدە جاستاعى تۇرعىندار مەن سوزىلمالى اۋرۋلارى بار ناۋقاستاردىڭ قاۋىپسىزدىگىن قامتاماسىز ەتەدى. بۇل جونىندە وسىعان دەيىن دە تالاي ايتىلعان.
ماماندار ءدال وسى ۆاكتسيناعا كۇمانمەن قاراعاندارىن ەكى ءتۇرلى سەبەپپەن ءتۇسىندىردى. ۇلىبريتانياداعى رەدينگ ۋنيۆەرسيتەتىنىڭ ۆيرۋسولوگيا پروفەسسورى يان دجونس ءوندىرىس اۋقىمىنا قاتىستى ماسەلەلەرمەن قاتار, اعزاعا تىكەلەي ەنگىزگەن ۆيرۋس بولشەگى ۋىتتى بولۋى مۇمكىن دەگەن قاۋىپتىڭ بولعانىن ايتادى. سىناق ناتيجەلەرى بۇل ەكى ماسەلەدە دە جاقسى ناتيجە كورسەتىپ, ۆيرۋستان ءتيىمدى قورعايتىنىن جانە ەش كەرى اسەرىنىڭ جوقتىعىن دالەلدەپ وتىر.
قازىر سىناقتىڭ سوڭعى كەزەڭىنە جەتكەن باسقا 10 ۆاكتسينا ۇلگىسى بار. ولاردىڭ دا ناتيجەلەرى اي سوڭىنا قاراي بەلگىلى بولا باستايدى. سىناقتان ءوتىپ جاتقان ۆاكتسينالار قاتارىندا اقش, ۇلىبريتانيا, قىتاي, رەسەي, برازيليا سەكىلدى ەلدەردىڭ ونىمدەرى بار.
ەندى رەتتەۋشى ورگانداردىڭ جاڭا ۆاكتسينانى تىركەۋىن كۇتۋ كەرەك. ودان بولەك ۇلكەن كولەمدە ميلليونداعان دوزا ءوندىرىسىن ۇيىمداستىرۋ مىندەتى تۇر. ال بارلىعى دايىن بولعاندا عالامشار تۇرعىندارىنىڭ باسىم بولىگىنە ۆاكتسينا سالۋ ءۇشىن تۋىندايتىن ماتەريالدىق, تەحنيكالىق ماسەلەلەردى شەشۋ عانا قالادى.
