جيىندا وبلىس بويىنشا سانيتارلىق-ەپيدەميالىق قاداعالاۋ دەپارتامەنتى باسشىسىنىڭ مىندەتىن اتقارۋشى نەيليا مۋليكوۆا وتكەن ايدا جامبىل وبلىسىندا كوروناۆيرۋستىق ينفەكتسيانىڭ 60 جاعدايى تىركەلگەنىن, ول الدىڭعى ايمەن سالىستىرعاندا اۋرۋشاڭدىق دەڭگەيىنىڭ 1,4 ەسەگە وسكەنىن كورسەتەتىنىن حابارلادى. ونىڭ ايتۋىنشا, جاعدايلاردىڭ كوبى تاراز قالاسى, شۋ, بايزاق جانە قورداي اۋداندارىندا انىقتالعان. الايدا, 31 ينفەكتسيا وشاقتارىندا قورىتىندى دەزينفەكتسيالىق شارالار جۇرگىزىلىپ, بايلانىستا بولعان 230 ادام ءۇي كارانتينىنە وقشاۋلانعان.
اعىمداعى جىلعى 10 قازان مەن 6 قاراشا ارالىعىندا مونيتورينگتىك توپتار 9125 نىساندى قامتىپ, 1328 رەيدتىك تەكسەرىستەر جۇرگىزگەن. ناتيجەسىندە, كارانتيندىك رەجىمنىڭ 530 بۇزىلۋ دەرەگى انىقتالىپ, 17 ميلليون 852 مىڭ 840 تەڭگەگە 163 حاتتاما تولتىرىلعان. بۇل رەتتە نەيليا مۋليكوۆا بايزاق, شۋ, تالاس, سارىسۋ اۋداندارى مەن تاراز قالاسىنىڭ ءموبيلدى توپتارىنىڭ جۇمىسىن جانداندىرۋ قاجەتتىگىن ايتتى. جيىن بارىسىندا جامبىل وبلىسىنىڭ اكىمى بەردىبەك ساپارباەۆ مونيتورينگتىك توپتارعا تۇرعىندار مەن كاسىپكەرلىك سۋبەكتىلەرىنىڭ شەكتەۋ جانە كارانتيندىك شارالاردىڭ ساقتالۋىنا باقىلاۋ جۇرگىزۋ جۇمىستارىن كۇشەيتۋدى تاپسىردى.
"وبلىس ورتالىعىنداعى توپتار 3000-نان استام نىساندى تەكسەرىپ, تەك 174 بۇزۋشىلىقتى انىقتاعان. وسى ۋاقىتقا دەيىن تەك 60 ماتەريال كەلىپ تۇسكەن. كەيبىر اۋداندارداعى جاعداي دا وسىعان ۇقساس. كوپتەگەن رەيدتىك تەكسەرىستەن ناتيجە جوق", دەدى اكىم.
ال وبلىستىق پوليتسيا دەپارتامەنتىنىڭ باستىعى, گەنەرال-مايور جانات سۇلەيمەنوۆ تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ قىزمەتكەرلەرىن اتالعان رەيدتىك شارالارعا قاتىسۋعا شاقىردى. سونداي-اق نەيليا مۋليكوۆا وبلىس اۋداندارىنداعى بارلىق ۆەدومستۆولاردىڭ جەدەل ءوزارا ءىس-قيمىلىن ۇيىمداستىرۋ ءۇشىن ۇيلەستىرۋ ورتالىقتارىن قۇرۋدى ۇسىندى. وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ تۇرعىنداردى تۇماۋعا قارسى ۆاكتسيناتسيالاۋ بارىسى تۋرالى باياندادى.
بۇگىندە وبلىستا 345 مىڭنان استام ادام ۆاكتسيناتسيادان وتكەن. حالىقتى قامتۋ كورسەتكىشى 30 پايىزدى قۇراعان. جۇقتىرۋ قاۋپى جوعارى توپتاعى ادامدارعا ۆاكتسينا اقىسىز ەگىلۋدە. بۇل تىزىمگە مەديتسينا قىزمەتكەرلەرى, جۇكتى ايەلدەر, 14 جاسقا دەيىنگى بالالار جانە زەينەتكەرلەر كىرەدى ەكەن.
