ەلگە بەلگىلى سپورت قايراتكەرى, داڭقتى سپورتشى, حالىقارالىق دەڭگەيدەگى جاتتىقتىرۋشى, اتى اڭىزعا اينالعان تۇلعا مۇستافا وزتۇرىك قازاقستاندا تاەكۆوندو مەكتەبىنىڭ نەگىزىن قالاۋشى عانا ەمەس, اتالعان سپورت سالاسىندا ادال ءىزباسارلارىن تاربيەلەگەن الاشتىڭ ايماڭداي ازاماتتارىنىڭ ءبىرى. رۋحى مىقتى, ءوز يدەيالارىنا شىن بەرىلگەن مۇستافا وزتۇرىكتىڭ بەينەسى كومپوزيتور شولپان قورعانبەكتى «تارلان» اسپاپتىق تۋىندىسىن شىعارۋعا شابىتتاندىردى. ايتۋلى شىعارمادا مۇستافا وزتۇرىكتىڭ بەينەسى كەڭ اۋقىمدا ءارى اسەم كوركەمدەلگەن. دومبىرا ۇنىندەگى ليريكالىق باستاما كەيىپكەردىڭ تۋعان جەرى تۋرالى, ءوزىنىڭ بارلىق ءبىلىمى مەن داعدىلارىن تۋعان حالقىنا قالاي جەتكىزۋگە بولاتىندىعى جونىندەگى ويلارىن جەتكىزەدى. بۇكىل انسامبلمەن ورىندالاتىن شىعارمانىڭ تاسقىندى بولىگى مۇستافا وزتۇرىكتىڭ ەرىك-جىگەر, رۋح كۇشى, باتىلدىق, ادالدىق سياقتى قاسيەتتەرىن اشا وتىرىپ, جىگەرلى, ەكپىندى شىرقالادى.
– قازاقستاننىڭ اتى اڭىزعا اينالعان ەرەكشە تۇلعالارى مەنى ءاردايىم جىگەرلەندىرەدى, شابىتتاندىرادى. ولار ءبىزدىڭ قۋاتتى جانە باي شەجىرەمىزدى قۇرايتىن تۇلعالار دەپ ايتۋعا بولادى. سوندىقتان بولسا كەرەك, مەنىڭ شىعارماشىلىعىمنىڭ نەگىزگى بولىگىن تۇلعالارعا ارناعان پورترەتتىك تۋىندىلار قۇرايدى. اتاپ ايتسام, ءال-فارابي, اباي, سۇلتان بەيبارىس, شىڭعىسحان, كەيكى باتىر, باۋىرجان مومىش ۇلى, بەكزات ساتتارحانوۆ سياقتى ءبىرتۋارلار بەينەسىن مۋزىكا تىلىندە سويلەتۋ ماعان قاي كەزدە دە قىزىق. مۇستافا وزتۇرىكتىڭ تۇلعاسى دا مەنى مۋزىكالىق ارناۋ جازۋعا شابىتتاندىردى. مىقتى ادامنىڭ ومىرلىك بەينەسى مەن قىزمەتىنە دەگەن قىزىعۋشىلىقتى, جالپى تۇلعانىڭ قايراتكەرىك ءھام ۇلتجاندىلىق قىرىن مۋزىكا تىلىندە ءدۇيىم جۇرتقا جەتكىزگىم, دارىپتەگىم كەلدى. بۇل ماقتانىش پەن تاڭدانۋ سەزىمى! تىڭداۋشى اۆتورلىق تۋىندىمدى ريزاشىلىقپەن قابىلدايدى دەگەن سەنىمدەمىن», – دەيدى شىعارما اۆتورى, كومپوزيتور شولپان قورعانبەك.
ايتۋلى كۇي قازاقستاننىڭ گيننەسس رەكوردتار كىتابىنا ەنگەن «قورقىت» ەتنو-ءانسامبلىنىڭ ورىنداۋىندا تىڭدارمانىمەن قاۋىشتى.
