اقتوبە وبلىسىندا ءتارتىپ ساقشىلارى زاڭسىز اڭ اۋلاۋ فاكتىسى بويىنشا كۇدىكتىلەردەن قىزىل كىتاپقا ەنگىزىلگەن كيىكتىڭ 167 دانا ءمۇيىزىن, بەس كيلوگرامم ەتىن, اڭشىلىق مىلتىق پەن 12 پاتروندى تاركىلەدى.
قازىرگى تاڭدا پوليتسيا قىزمەتكەرلەرى كيىكتەردىڭ ءمۇيىزىن ساتىپ الۋ جانە ولاردى شەت ەلگە وتكىزۋمەن اينالىساتىن ازاماتتاردى ىزدەستىرۋدە. ال قىزىلوردا وبلىسىندا پوليتسەيلەر قاراقۇيرىقتى اتىپ ولتىرگەن براكونەردى قاماۋعا الدى. ءتارتىپ ساقشىلارى كۇدىكتى كورىنگەن موتوتسيكل جۇرگىزۋشىسىن تەكسەرۋ ماقساتىندا توقتاتقان. كولىك قۇرالىن تەكسەرۋ بارىسىندا ولار قاراقۇيرىقتىڭ ۇشاسىن, پىشاق پەن مىلتىقتى تاپتى.
سونداي-اق تۇركىستان وبلىسىنىڭ اۋماعىندا “براكونەر” جەدەل الدىن الۋ ءىس-شاراسى وتكىزىلگەن ءبىر ايدا تابيعاتتى قورعاۋ زاڭناماسى سالاسىندا ءۇش ەكولوگيالىق قىلمىس جانە 159 اكىمشىلىك قۇقىق بۇزۋشىلىق اشىلدى. پوليتسيا براكونەرلەردەن 152 كيلوگرامم زاڭسىز اۋلانعان بالىقتى, ءۇش قايىقتى جانە 200 مەتردەن استام بالىق اۋلاۋ تورلارىن تاركىلەدى.
تابيعاتتى قورعاۋ پوليتسياسىنىڭ قىزمەتكەرلەرى كەلەس اۋداندىق پوليتسيا ءبولىمىنىڭ ۋچاسكەلىك ينسپەكتورلارىمەن بىرگە سىرداريا وزەنىندە ەلەكتر توعىنىڭ كومەگىمەن بالىق اۋلاۋمەن اينالىسقان جەرگىلىكتى تۇرعىندى ۇستادى.
ەكى كۇننەن كەيىن ولار “قىتاي تورلارىمەن” بالىق اۋلاعان تاعى ەكى براكونەردى قۇرىقتادى. بارلىق فاكتىلەر بويىنشا سوتقا دەيىنگى تەرگەۋ امالدارى جۇرگىزىلۋدە.
