س.سەيفۋللين اتىنداعى قازاتۋ مال شارۋاشىلىعى, بالىق شارۋاشىلىعى, شىرىن ءوندىرىسى جانە سۋدى باسقارۋ سالاسىنداعى قىزمەتكەرلەردىڭ بىلىكتىلىگىن ارتتىرۋ ماقساتىندا تۇرىك ىنتىماقتاستىق جانە ۇيلەستىرۋ اگەنتتىگىمەن (TIKA) الداعى ۋاقىتتا ءبىلىم-عىلىم سالاسى بويىنشا ىنتىماقتاستىق ورناتپاق. وسىعان دەيىن اگەنتتىكتىڭ قولداۋىمەن حالىقارالىق مال شارۋاشىلىعىن زەرتتەۋ جانە وقىتۋ ورتالىعىمەن (انكارا, لاللاحان) ارىپتەستىك بايلانىس جاسالعان-دى. ونىڭ اياسىندا دوكتورانت اقنۇر مولداشەۆا تاماق ونىمدەرىن قايتا وڭدەۋ تەحنولوگياسى بويىنشا عىلىمي تاعىلىمدامادان ءوتىپ, جاس مامان قوي سۇتىنەن الىناتىن ونىمدەر بويىنشا ءتۇرلى زەرتتەۋلەر جۇرگىزىپ, تازا ءونىم الۋدىڭ جاڭالىعىن ۇيرەنىپ كەلدى.
«جوباعا سايكەس, قوي سۇتىنەن الىناتىن ونىمدەرگە ارنالعان تەحنولوگيانى جانە ازىرلەنگەن ونىمدەرگە قاجەتتى نورماتيۆتىك-تەحنيكالىق قۇجاتتامانى دايىنداۋ كوزدەلگەن. اشىعان ءسۇت ونىمدەرىن, جۇمساق ىرىمشىكتى جانە ۇلتتىق ءونىم قۇرتتى ازىرلەۋ مەن وندىرۋگە باعىتتالعان جۇمىستار پىسىقتالادى», دەدى ۋنيۆەرسيتەت وكىلدەرى.
ۋنيۆەرسيتەتتىڭ باسقارما توراعاسى قايرات ايتۋعانوۆتىڭ ايتۋىنشا, بىرلەسكەن عىلىمي جوبانىڭ كەلەشەكتە مامان دايارلاۋ جولىندا پايداسى كوپ. الداعى ۋاقىتتا اتالعان كەشەن شارۋاشىلىقتاردا وندىرىسكە ەنگىزىلىپ, قويدىڭ ءسۇتىن ۋنيۆەرسيتەت زەرتحانالارىندا ساراپتامادان وتكىزۋمەن قاتار ءونىم رەتىندە شىعارىلادى.
حالىقارالىق مال شارۋاشىلىعى عىلىمي-زەرتتەۋ ورتالىعى بۇل جوباعا قىزىعۋشىلىق تانىتىپ, تۇرىك ىنتىماقتاستىق جانە ۇيلەستىرۋ اگەنتتىگى قۇرال-جابدىقتاردى وقۋ ورنىنا اقىسىز تۇردە بەرۋ جونىندە شەشىم قابىلدادى. بۇل جابدىقتى قۇراستىراتىن تۇرىك كومپانياسى ترەنينگ وتكىزىپ, جىلجىمالى جۇيەمەن جۇمىس ىستەۋدى جانە الىناتىن ونىمدەر تەحنولوگياسى بويىنشا كەڭەستەر بەردى.
