مىسالى, بىلتىر الپاۋىت كاسىپورىننىڭ باسشىلىعى ۇيىندە ءتورت جانە ودان دا كوپ بالا تاربيەلەنىپ جاتقان جۇمىسشىلارىنا 10 پاتەر سىيعا تارتقان بولاتىن.
تاياۋدا اتالعان كومپانيا 41 كوپ بالالى وتباسىنا جاڭا پاتەرلەردىڭ كىلتىن تابىس ەتتى. بۇل يگى باعدارلاما بيزنەستىڭ جاۋاپكەرشىلىگىن ارتتىرۋدى دامىتۋ تۋرالى «قازاقمىس حولدينگ» جشس, ەڭبەك جانە حالىقتى الەۋمەتتىك قورعاۋ مينيسترلىگى جانە قاراعاندى وبلىسىنىڭ اكىمدىگى اراسىندا قول قويىلعان ءۇش جاقتى مەموراندۋم اياسىندا جۇزەگە اسىرىلدى.
باسپانامەن قامتىلعان وتباسىنىڭ ءبىرى سىزدىقوۆتار شاڭىراعى بولدى. وتاعاسى قۋانىش سىزدىقوۆ «قازاقمىس» كومپانياسىندا 26 جىلدان بەرى ەڭبەك ەتىپ كەلەدى ەكەن. زايىبى ەكەۋىنىڭ تاربيەسىندە بەس بالا بار.
– كۇنى كەشەگە دەيىن بىزگە پاتەر سىيلايتىنىن بىلگەن جوقپىن. بۇل جاڭالىق مەن ءۇشىن ۇلكەن توسىنسىي بولدى. بۇعان دەيىن ءبىز اتا-انامنىڭ ۇيىندە سىعىلىسىپ تۇرىپ كەلدىك. ەندى مىنە, ىشىندە جيھازى, تۇرمىستىق تەحنيكانىڭ ءبارى بار ءتورت بولمەلى پاتەرگە يە بولدىق. «قازاقمىس» كومپانياسىنا ايتار العىسىم شەكسىز! – دەيدى كەنشى قۋانىشىن جاسىرا الماي.
باقىتتى جاندارعا پاتەر كىلتتەرىن "قازاقمىس" كورپوراتسياسى" جشس باسقارما توراعاسىنىڭ ورىنباسارى ادىلەت بارمەنقۇلوۆ پەن "قازاقمىس" كورپوراتسياسى" جشس-ءنىڭ دامۋ جونىندەگى ديرەكتورى باقتيار قىرىقپىشەۆ تابىس ەتتى.
– ءبىز كۇردەلى كەزەڭدە ءوزىمىزدىڭ قىزمەتكەرلەرىمىزدى قيىن جاعدايدا قالدىرمايمىز, ولارعا جان-جاقتى كومەك كورسەتەمىز دەپ الدىمىزعا زور مىندەتتەر قويعانبىز. ءبىزدىڭ كومپانيا الەۋمەتتىك جاۋاپكەرشىلىكتى ءاردايىم سەزىنىپ كەلگەن, ءارى قاراي دا وسى جولدان تايمايتىن بولامىز, – دەيدى باقتيار قىرىقپىشەۆ.
جالپى, بيىلدىڭ وزىندە كومپانيانىڭ كوپبالالى 102 وتباسى ىشىندە بارلىق جاعدايى جاسالعان ءۇش-ءتورت بولمەلى پاتەرلەرمەن جانە ءبىر جەر ۇيمەن قامتاماسىز ەتىلدى. ال جىلدىڭ سوڭىنا دەيىن "قازاقمىس" كورپوراتسياسىنىڭ جوسپارى بويىنشا جەزقازعان, ساتباەۆ قالالارى جانە قاراعاندى مەن بالقاش وڭىرلەرىندە تۇراتىن 133 وتباسى باسپانالى بولادى ەكەن.
قاراعاندى وبلىسى
