سەنات توراعاسىنىڭ ورىنباسارى اسقار شاكىروۆ ءوز سوزىندە كوتەرىلگەن تاقىرىپ ءاربىر قازاقستاندىق ءۇشىن ومىرلىك ماڭىزى بار ءارى ۇلتتىق قاۋىپسىزدىكتىڭ اجىراماس بولىگى رەتىندە قاراستىرىلاتىنىن اتاپ ءوتتى. ادامداردىڭ ءومىر ءسۇرۋ ساپاسى مەن ەكولوگيالىق سۋ جۇيەسىنىڭ ساقتالۋى ساپالى اۋىز سۋدىڭ قولجەتىمدى بولۋىنا, گيدروقۇرىلىستاردىڭ جاي-كۇيىنە, سۋ رەسۋرستارىن ۇتىمدى پايدالانۋعا بايلانىستى بولادى.
"پرەزيدەنت قاسىم-جومارت توقاەۆ اعىمداعى جىلدىڭ اقپان ايىندا ەكولوگيا, گەولوگيا جانە تابيعي رەسۋرستار مينيسترلىگىنە «سۋ رەسۋرستارىن باسقارۋ جونىندەگى ءتيىستى باعدارلامالاردى ازىرلەۋ كەزىندە ەلىمىزدىڭ سۋ قاۋىپسىزدىگىنىڭ بارلىق ماسەلەلەرىن مۇقيات تالداۋدى» تاپسىرعان بولاتىن. قازىرگى كەزدە جاڭا ەكولوگيالىق كودەكستىڭ جوباسى قر پارلامەنتى ءماجىلىسىنىڭ قاراۋىندا جاتىر. مەملەكەت باسشىسىنىڭ ول تاپسىرماسى وسى قۇجاتتا ءتيىستى كورىنىس تاپتى دەپ ۇمىتتەنەمىز", دەدى اسقار شاكىروۆ.
ترانسشەكارالىق سۋ پايدالانۋ ماسەلەلەرىنىڭ ماڭىزىن ەسكەرە وتىرىپ, وسى سالانىڭ حالىقارالىق-قۇقىقتىق نەگىزىن قالىپتاستىرۋ ۇسىنىلىپ وتىر. سونداي-اق سۋ شارۋاشىلىعى وبەكتىلەرى مەن قۇرىلىستارىن تولىق كولەمدە پاسپورتتاۋدى جۇرگىزۋ, ولاردىڭ تەحنيكالىق جاي-كۇيىن ەسەپكە الۋ قاجەتتىگى اتاپ ءوتىلدى.
ۇكىمەت ساعاتىنىڭ جۇرگىزىپ وتىرعان سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى مۇحتار قۇل-مۇحاممەد سۋدىڭ تاسۋى مەن توپان سۋ جىل سايىنعى پروبلەما بولىپ تابىلاتىنىن اتاپ ءوتتى.
"مەملەكەت دەڭگەيىندە تابيعي اپات زارداپتارىمەن كۇرەس جانە ونىڭ سالدارىن جويۋ نەگىزگى مىندەتى بولىپ تابىلاتىن جەكە مينيسترلىك قۇرىلدى. وتكەن اپتادا عانا ازاماتتىق قورعاۋ ماسەلەلەرى بويىنشا كەڭەيتىلگەن وتىرىس بارىسىندا الدىن الۋ جۇمىستارىنىڭ باسىمدىققا يە ەكەنى اتاپ ءوتىلدى», - دەدى مۇحتار قۇل-مۇحاممەد.
ەكولوگيا, گەولوگيا جانە تابيعي رەسۋرستار ءمينيسترى م.مىرزاعاليەۆ سۋ تۋرالى زاڭنامانى جەتىلدىرۋ ماسەلەلەرىنە توقتالدى.
«كوپتەگەن ساراپشىلاردىڭ باعالاۋى بويىنشا سۋ زاڭناماسى ودان ءارى جەتىلدىرۋدى تالاپ ەتەدى. قولدانىستاعى كودەكسكە ون جەتى جىل ىشىندە 62 رەت وزگەرىستەر مەن تولىقتىرۋلار ەنگىزىلدى (جىلىنا ورتا ەسەپپەن – 3 رەتتەن ءسال ارتىق). ناتيجەسىندە قۇقىق قولدانۋ رەتتىلىگىنىڭ جوعالۋى بايقالادى, بۇل تۇتاستاي العاندا سۋ شارۋاشىلىعىنىڭ بارلىق دەڭگەيلەرىندەگى جاعدايدىڭ ناشارلاۋىنا اكەلەدى. وسىنى ەسكەرە وتىرىپ, 2021 جىلعا جاڭا سۋ كودەكسىنىڭ جانە "گيدروتەحنيكالىق قۇرىلىستاردىڭ قاۋىپسىزدىگى تۋرالى" زاڭىنىڭ تۇجىرىمدامالارىن ازىرلەۋ جوسپارلانعان", دەدى ول.
شارا بارىسىندا بۇۇ باس حاتشىسىنىڭ ورتالىق ازيا بويىنشا ارناۋلى وكىلى, بۇۇ-نىڭ ورتالىق ازياعا ارنالعان پرەۆەنتيۆتى ديپلوماتيا جونىندەگى وڭىرلىك ورتالىعىنىڭ باسشىسى ناتاليا گەرمان ءسوز سويلەدى.
"ورتالىق ازيا وڭىرىندە تولىققاندى ءارى تۇراقتى ەكونوميكالىق جانە الەۋمەتتىك دامۋ تۇرعىسىندا سۋ جانە ەكولوگيالىق پروبلەمالار وزەكتى بولىپ قالا بەرەتىنىن اتاپ وتكىم كەلەدى. سوڭعى جىلدارى بۇۇ باس اسسامبلەياسىندا ورتالىق ازيا ەلدەرىنىڭ باستاماسى بويىنشا ىنتىماقتاستىقتى نىعايتۋعا, سونىڭ ىشىندە سۋ-ەكولوگيالىق ماسەلەلەرگە باعىتتالعان بىرقاتار ماڭىزدى قارارلار قابىلداندى", دەدى ول.
سونىمەن قاتار, ءسوز الۋشىلار ەلىمىزدەگى سۋ رەسۋرستارىنىڭ جاي-كۇيى, ازاماتتىق قورعانىس سالاسىنداعى الدىن الۋ جۇمىستارىن جاقسارتۋ ماسەلەلەرىنە توقتالدى. تۇركىستان وبلىسىنىڭ اكىمى ومىرزاق شوكەەۆ وزبەكستانداعى بوگەتتىڭ بۇزىلۋىنان زارداپ شەككەن ماقتاارال اۋدانىنداعى ەلدى مەكەندەردى قالپىنا كەلتىرۋ بويىنشا جۇرگىزىلىپ جاتقان جۇمىستار تۋرالى حابارلادى.
وتىرىس قورىتىندىسى بويىنشا سەناتورلار ورتالىق جانە جەرگىلىكتى اتقارۋشى ورگانداردىڭ اقپاراتىن, دەپۋتاتتاردىڭ, حالىقارالىق ۇيىمدار وكىلدەرىنىڭ, عالىمدار مەن مامانداردىڭ سوزدەرىن تىڭداي كەلىپ ۇكىمەتكە جىبەرىلەتىن جانە ولاردىڭ ورىندالۋ ماسەلەلەرىن تۇراقتى باقىلاۋدا ۇستايتىن ۇسىنىمدار ازىرلەدى.
