قازاقستان • 03 قاراشا، 2020

ءورت ءسوندىرۋ بولىمشەسىنىڭ كوبى ەلدى مەكەندەردەن قاشىقتا ورنالاسقان

17 رەت كورسەتىلدى

حالىقتىڭ قاۋىپسىزدىگىن قامتاماسىز ەتۋ بويىنشا جالپى سيپاتتاعى جۇيەلى پروبلەمالار ءالى دە شەشىمىن تاپپاي كەلەدى. بۇل تۋرالى توتەنشە جاعدايلار ءمينيسترى يۋري يلين ءمالىم ەتتى، دەپ حابارلايدى Egemen.kz

ايىم ءداۋىت

"بىرىنشىدەن، ءورت ءسوندىرۋ بولىمدەرىنىڭ ەلدى مەكەندەردەن قاشىقتىعى. قىسقى كەزەڭدە جەكە تۇرعىن ۇيدە ءورتتىڭ شىعۋ قاۋىپ-قاتەرى ارتادى، اۋا رايى جاعدايلارى (كوكتايعاق، جولدى قار باسۋ، بوران جانە ت.ب.) كۇردەلەنەدى، بۇل ءورت ءسوندىرۋ توپتارىنىڭ كەلۋى ۋاقىتىنا اسەر ەتەدى"، دەدى مينيستر ۇكىمەت وتىرىسىندا.

ۆەدومستۆو مالىمەتىنشە، ءورت قاۋىپسىزدىگىنە قويىلاتىن جالپى تالاپتارعا سايكەس، ءبىرىنشى ءورت بولىمشەسىنىڭ شاقىرۋ ورنىنا كەلۋىنىڭ نورماتيۆتىك ۋاقىتى قالالاردا − 10 مينۋتتى، اۋىلدىق جەرلەردە 20 مينۋتتى قۇرايدى. بۇل رەتتە قازىرگى كەزدە قالالاردا اتالعان ءىس-قيمىلدار ۋاقىتى شامامەن 11 مينۋتتى، اۋىلدىق اۋدانداردا 30 مينۋت جانە ودان دا كوپ ۋاقىتتى قامتىپ تۇر. رەسپۋبليكا بويىنشا تجم-ءنىڭ 413 ءورت ءسوندىرۋ ءبولىمى بار. ولار جىل سايىن ورتا ەسەپپەن ءورت شارپىعان نىساندارداعى 40 مىڭعا جۋىق شاقىرتۋعا بارادى. ءورت ءسوندىرۋ توپتارىنىڭ ۋاقتىلى كەلۋىن قامتاماسىز ەتۋ ءۇشىن 122 ءورت ءسوندىرۋ دەپوسى قاجەت.

"وڭىرلەردىڭ اكىمدىكتەرىمەن بىرلەسىپ، ءبىزدىڭ بولىمشەلەرىمىز جوق ەلدى مەكەندەردە ءورت ءسوندىرۋ بەكەتتەرىن قۇرۋ ارقىلى ماسەلەنى شەشۋگە تىرىسىپ جاتىرمىز. ءۇش جىلدا 153 بەكەت جاساقتالدى. قازىرگى كەزدە ەلىمىز بويىنشا بارلىعى 396 بەكەت قىزمەت ەتۋدە، بۇل جالپى حالىق سانى ءبىر ميلليوننان (1،2 ملن) استام 1 200 (1 189) اۋىل مەن كەنتتىڭ قورعالۋىن قامتاماسىز ەتتى. سونىمەن قاتار، سوڭعى ءۇش جىلدا جوسپارلى كورسەتكىشتەر 60 پايىزدان اسپايدى. وڭىرلەردىڭ اكىمدەرىنە ءورت ءسوندىرۋ بەكەتتەرىنىڭ ءتيىمدى گەوگرافيالىق ورنالاسۋىن ەسكەرە وتىرىپ، ولاردى قۇرۋدى قامتاماسىز ەتۋ تالاپ ەتىلەدى"، دەدى يۋ. يلين.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز