"تۇركىستان قالاسىن تۇركى الەمىنىڭ مادەني-رۋحاني ورتالىعى رەتىندە دامىتۋ جونىندەگى باس جوسپار تۇجىرىمداماسىن ماقۇلداۋ تۋرالى» ەلباسىنىڭ 2018 جىلعى 29 قىركۇيەكتەگى № 762 جارلىعى نەگىزىندە تۇركىستان قالاسىنىڭ باس جوسپارى جوباسى ازىرلەندى. باستاپقى قالا اۋماعى 19 627 گەكتار بولسا, قالا شەكاراسىنا وزگەرىستەر ەنگىزۋ ارقىلى جوبالاۋ اۋماعى 22 370 گەكتارعا وزگەرتىلەدى", دەدى ومىرزاق شوكەەۆ.
باس جوسپار بويىنشا, بىرقاتار جوبالىق كەزەڭ قابىلدانعان: باستاپقى جىل – 2018 جىل, ءبىرىنشى كەزەڭ – 2025 جىل جانە ەسەپتىك مەرزىم – 2035 جىل. قالا حالقى 2018 جىلى 165 مىڭ ادامدى قۇراسا, قازىر – 176,2 مىڭ ادام تۇرادى. باس جوسپارعا سايكەس, 2025 جىلعا – 250 مىڭ ادام, 2035 جىلعا – 350 مىڭ ادام جانە 2050 جىلعا – 500 مىڭ تۇرعىن جوسپارلانعان.
"قالا جوباسى اكىمشىلىك-ىسكەرلىك ورتالىق, رۋحاني-مادەني ورتالىق, تۇرعىن الاپتارى, جاڭا قۇرىلىس الاڭدارى, وندىرىستىك جانە تابيعي-رەكرەاتسيالىق اۋماقتار بولىپ بىرنەشە بولىككە بولىنەدى. قالانىڭ شىعىس باعىتىنداعى جاڭا اكىمشىلىك-ىسكەرلىك ورتالىق 1450 گا اۋماقتى قامتيدى. وندا ءبىلىم بەرۋ, دەنساۋلىق ساقتاۋ, مادەني جانە سپورت نىساندارى, حالىققا قىزمەت كورسەتۋ ورتالىقتارى, تۇرعىن ءۇي كەشەندەرى, اكىمشىلىك عيماراتتار كەشەنى, بيزنەس ورتالىقتارى, كەڭسەلەر, بانكتەر جانە باسقا دا نىساندار سالۋ كوزدەلگەن. بۇگىندە اكىمشىلىك ىسكەرلىك ورتالىعىندا جوسپارلانعان 14 نىسان تولىق اياقتالىپ, قالا كەلبەتىنە ساۋلەتتىك ديزاين بەرۋدە", دەپ اتاپ ءوتتى وبلىس باسشىسى.
تۇركىستان قالاسىنىڭ مادەني-رۋحاني ورتالىعى 290 گا القاپتى قۇرايدى. وندا ازىرەت سۇلتان قورىق مۇراجايى, كەرۋەن ساراي, تۇڭعىش پرەزيدەنت ساياباعى, ن.نازارباەۆ اللەياسى جانە جەكە سالىمشىلار تاراپىنان بەس جۇلدىزدى ءۇش قوناق ءۇي سىندى ءىرى جوبالار سالىنىپ جاتىر.
"بۇگىنگى تاڭدا مادەني-رۋحاني ورتالىقتا باس جوسپاردا جوبالانعان 10 نىساننىڭ التاۋى تولىق اياقتالدى, قالعان نىساندار بەكىتىلگەن جوسپارعا سايكەس قولدانىسقا بەرىلەدى. اتالعان نىساندار قالانىڭ تاريحي وتكەنى مەن زاماناۋي بۇگىنگى تۇرلەنگەن كەلبەتىن كورسەتەدى. ورتالىق قالاعا كەلۋشى تۋريستەر مەن قالا قوناقتارى تاماشالايتىن نەگىزگى تۋريستىك باعىت بولادى", دەدى ءو.شوكەەۆ.
قالا اۋماعىنداعى كوگالداندىرۋ كولەمى ازىرگە 187 گا جەتىپ وتىر. ەسەپتىك مەرزىمگە قاراي 1539 گا نەمەسە 44 م2/ادام دەڭگەيىنە جەتكىزۋ جوسپارلانعان.
"تۇجىرىمداماعا سايكەس, قالانىڭ كليماتتىق جاعدايىن ەسكەرە وتىرىپ, قالا سىرتىندا كوگالداندىرۋدىڭ ۇزدىكسىز جۇيەسىن جانە سىرداريا وزەنىنىڭ تابيعي وسىمدىكتەر دۇنيەسىمەن بىرىگۋدى قامتاماسىز ەتەتىن جاسىل بەلدەۋ قالىپتاستىرۋ كوزدەلگەن. بۇدان باسقا, قالا تۇرعىندارىن ءومىر ءسۇرۋ دەڭگەيى مەن ساپاسىن جاقسارتۋ ماقساتىندا قاجەتتى ينجەنەرلىك ينفراقۇرىلىم جۇيەلەرى مەن تالاپقا ساي الەۋمەتتىك نىساندار بوي كوتەرەتىن بولادى", دەدى ءوڭىر باسشىسى.
