اتيللا ريحتەر كوپتەگەن ءتۋرنيردىڭ توقتاتىلعانىن جانە كەنەتتەن كەلگەن وزگەرىستەر ادەتتەگى ءومىردىڭ ءبىر بولىگىنە اينالعانىن وكىنىشپەن ايتتى. ول ATP-ءىڭ باتىل شەشىمىنىڭ ناتيجەسىندە كۇنتىزبەدە وسى جىلى قوسىمشا 4 تۋرنير, ونىڭ ىشىندە نۇر-سۇلتان قالاسىنداعى تۋرنير قوسىلعانىنا دا توقتالدى.
– قازاقستان تەننيس فەدەراتسياسىنا, ەڭ الدىمەن فەدەراتسيا پرەزيدەنتى بولات وتەمۇراتوۆقا قازىرگى جاعدايعا قاراماستان, قازاقستان ءۇشىن العاشقى تاريحي ءتۋرنيردى وتكىزۋگە مۇمكىندىك جاساعانى ءۇشىن ۇلكەن العىسىمدى بىلدىرەمىن. ءسىزدىڭ باسشىلىعىڭىزبەن, سوڭعى ونجىلدىقتا, قازاقستاندىق تەننيستىڭ دامۋىندا ۇلكەن سەرپىلىس ورىن الدى. پرەزيدەنت مىرزا, تەننيسكە دەگەن ادالدىعىڭىز بەن قولداۋىڭىز ءۇشىن كوپ راحمەت. 6 اپتا بويى ۇيىمداستىرۋ شارالارىنا قاتىسقان ۇجىمعا جانە ءاربىر اتسالۋشىعا راحمەت, سىزدەردىڭ ەڭبەكتەرىڭىز اقتالىپ, جينالعان قاۋىم ريزا بولدى دەپ سەنەمىن. جارىسقا قاتىسقان بارلىق ويىنشىلارعا ريزامىز. بۇل جاڭا تۋرنير بولدى, الدىن الا بولجام جاساپ, قالاي وتەتىنىن ءدوپ باسىپ ايتۋ مۇمكىن ەمەس ەدى. بارلىعىڭىزدى كەلەسى جىلى نۇر-سۇلتان قالاسىندا كۇتەمىز», دەدى تۋرنير ديرەكتورى اتيللا ريحتەر.
25 قازان مەن 1 قاراشا ارالىعىندا ەلىمىزدىڭ باس شاھارىندا وتكەن Astana Open-2020 تۋرنيرىنە الەمدىك رەيتينگتىڭ العاشقى جۇزدىگىنە ەنگەن 30-دان استام اتاقتى تەننيسشى باق سىنادى. اتاپ ايتار بولساق, فرانتسيالىق بەنۋا پەر (26) مەن ادريان ماننارينو (39), وسى جارىستىڭ تۇڭعىش جەڭىمپازى – دجون ميللمان (43) قاتىستى. سونىمەن قاتار الەمدىك ارەنالاردا ەلىمىزدىڭ نامىسىن ابىرويمەن قورعاپ جۇرگەن قازاقستان ۇلتتىق قۇراماسىنىڭ مۇشەلەرى ميحايل كۋكۋشكين (88), الەكساندر بۋبليك (49), دميتري پوپكو (171), تيموفەي سكاتوۆ (438), دەنيس ەۆسەەۆ (373), اندرەي گولۋبەۆ (89) جانە الەكساندر نەدوۆەسوۆ (333) سىندى تەننيسشىلەر دە اتالعان جارىستا باق سىنادى.
وكىنىشكە قاراي, ءوز جەرىمىزدە وتكەن جارىستا بىردە-ءبىر سپورتشىمىز ۇزدىكتەر قاتارىنان كورىنە المادى. جارىستىڭ ءبىرىنشى كۇنىندە ءبىر ەمەس, ءۇش سپورتشىمىز العاشقى اينالىمنان ارى اسا المادى. دميتري پوپكو الەمدىك رەيتينگتە 90-ورىندا تۇرعان مولدوۆالىق رادۋ البوتتان, تيموفەي سكاتوۆ فينليانديالىق ەميل رۋسۋۆۋوريدەن (84) جەڭىلىپ قالدى. ال ءتۋرنيردىڭ 1/8 فينالىندا الەمنىڭ 28-ءشى, وسى جارىستىڭ ءبىرىنشى راكەتكاسى سانالعان فرانتسيالىق بەنۋا پەردى 2:1 (7:6, 6:7, 1:6) ەسەبىمەن جارىس جولىنان شىعارىپ جىبەرگەن جەرلەسىمىز ميحايل كۋكۋشكين شيرەك فينالدا فينليانديالىق ەميل رۋسۋۆۋوريگە ەكى سەتتە 6:3, 6:1 ناتيجەسىمەن ەسە جىبەردى. ءبىر جارىستا ەكى بىردەي جارىس قوجايىنىن تۋرنيردەن شىعارىپ جىبەرگەن رۋسۋۆۋوري جارتىلاي فينالدا فرانتسيالىق ادريان ماننارينودان (36) ايلاسىن اسىرا المادى. سونداي-اق دەنيس ەۆسەەۆ پەن اندرەي گولۋبەۆ جارىستىڭ ىرىكتەۋ كەزەڭىنەن وتە الماعانىن دا ايتا كەتكەن ءجون.
ATP سەرياسىنىڭ نۇر-سۇلتاندا وتكەن تۇڭعىش جارىسىنىڭ فينالىنا اۋستراليالىق دجون ميللمان مەن فرانتسيالىق ادريان ماننارينو شىقتى. ەكى سەتكە سوزىلعان باسەكەدە اۋستراليالىق تەننيسشىنىڭ مەرەيى ۇستەم بولدى. ەكى تەننيسشى اراسىنداعى كەزدەسۋدىڭ ءبىرىنشى سەتى اسا تارتىستى ءوتتى. ەسەپ 5:5 بولعانعا دەيىن ەكەۋى دە ءوز مۇمكىندىكتەرىن ءتيىمدى پايدالاندى. تەك سوڭعى ەكى دوپ قوسۋ كەزىندە ەپتىلىك تانىتقان ميللمان ءبىرىنشى سەتتە 7:5 ەسەبىمەن باسىمدىق تانىتتى.
ەكىنشى سەتتە فرانتسيالىق سپورتشى باسىمدىقتىڭ ءوز قولىنا الاتىن شىعار دەپ ويلاعانبىز. بىراق دجون ميللمان دا ءوزىنىڭ وڭاي شاعىلاتىن جاڭعاق ەمەس ەكەنىن بىردەن اڭعارتتى. ەكىنشى سەتتە قارسىلاسىنا ءبىر عانا پارتيانى بەرگەن ميللمان كەزدەسۋدى 6:1 ناتيجەسىمەن تۇيىندەدى. وسىلايشا, دجون ميللمان Astana Open تۋرنيرىندەگى جەڭىسى ءۇشىن ATP رەيتينگىندە 250 ۇپايمەن 13 مىڭ دوللار ەنشىلەدى. اۋستراليالىق تەننيسشى ماتچتان سوڭ قارسىلاسىنا, قازاقستان تەننيس فەدەراتسياسىنا العىسىن ءبىلدىرىپ, قىسقا مەرزىمدە ءتۋرنيردى جوعارى دەڭگەيدە ۇيىمداستىرعان ۇجىمعا جىلى لەبىزىن ءبىلدىردى.
– بۇل – مەن جەڭىپ العان اتر 250 ساناتىنداعى ءتۋرنيردىڭ العاشقى باس جۇلدەسى. بۇل جارىستىڭ ورنى ەرەكشە. ويتكەنى نۇر-سۇلتاندا كارەرامدا ۇلكەن تابىسقا قول جەتكىزدىم. ادريانعا كورسەتكەن تاماشا ويىنى ءۇشىن راحمەت ايتامىن. ماتچ وڭاي بولعان جوق. سەن مىقتى قارسىلاسسىڭ. سەنىمەن كورتتا شەبەرلىك بايقاسۋ وڭاي ەمەس ەكەنىن ءبىلدىم, – دەدى دجون ميللمان.
ايتا كەتەيىك, قازاقستان تەننيس فەدەراتسياسى جىل سايىن 50-گە جۋىق حالىقارالىق تۋرنير وتكىزەدى, ولاردىڭ قاتارىندا پرەزيدەنت كۋبوگى مەن دەۆيس كۋبوگى بار. بيىل ەلىمىزدە تۇڭعىش رەت ۇيىمداستىرىلعان اتر 250 الەمدىك تۋرى جىلىنا 40 رەت وتەتىن. الايدا پاندەمياعا بايلانىستى وسى ماۋسىمدا ونىڭ تەك 17-ءسى عانا ءوتتى.
نۇر-سۇلتانداعى تۋرنير ماۋسىمداعى سوڭعى جارىس جانە اتر رەيتينگىندە وسى جىلدىڭ سوڭعى 250 ۇپايىن الۋ مۇمكىندىگىن ۇسىندى. ءتۋرنيردىڭ جۇلدە قورى 275 000 دوللاردى قۇرادى. قاۋىپسىزدىكتى قامتاماسىز ەتۋ ءۇشىن Astana Open كورەرمەنسىز ءوتتى. جۇپتىق سىندا اۋستراليالىق جۇپ ماكس پەرسەلل مەن ليۋك سەۆيللدى جەڭگەن بەلگيا وكىلدەرى يوران فليگەن مەن ساندەر جيللە جەڭىسكە جەتتى.
