جينالىسقا كوميسسيانىڭ قوس تاراپتاعى تەڭ توراعالارى, جاۋاپتى مينيسترلىكتەر وكىلدەرى, ەكى ەلدىڭ وكىلەتتى ەلشىلەرى قاتىستى. قازاقستان تاراپىن ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ, رۋمىنيا جاقتى ەلدىڭ ەنەرگەتيكا جانە ىسكەرلىك ورتا ءمينيسترى ۆيردجيل-دانيەل پوپەسكۋ باسقاردى.
م.مىرزاعاليەۆ رۋمىنيا وكىلدەرىنە ارىپتەستىك اياسىن كەڭەيتۋدى ۇسىنىپ, جاڭا باعىتتار بويىنشا بىرلەسە جۇمىس ىستەۋگە شاقىردى.
اتاپ ايتقاندا, قاتتى تۇرمىستىق قالدىقتاردى وڭدەۋ ارقىلى ەنەرگيا الۋ بويىنشا ۇسىنىس جاسادى.
"قازىر قازاقستان "Waste to Energy" مەحانيزمىن, ياعني قالدىقتاردى تەرميالىق ۋتيليزاتسيالاۋ ماسەلەسىن قاراستىرىپ جاتىر. ەلىمىز 7 قوقىس جاعاتىن زاۋىت سالۋدى جوسپارلاۋدا. رۋمىن كومپانيالارىن اتالعان جوباعا قاتىسۋعا شاقىرامىن", - دەدى ەكولوگيا ءمينيسترى.
سونىمەن بىرگە ماعزۇم مىرزاعاليەۆتىڭ پىكىرىنشە, قازاقستان مەن رۋمىنيا كاسپي تەڭىزىندە سالقىن سۋعا بەيىمدەلگەن لوسوس, فورەل سياقتى بالىقتاردى ءوسىرۋ, بالىق شارۋاشىلىعىنا ارنالعان ازىق ءوندىرۋ بويىنشا الەۋەتتى ارىپتەستىك ورناتا الادى.
2019 جىلى قازاقستاندا بالىق جانە بالىق ونىمدەرى ءوندىرىسى 52 مىڭ توننانى قۇرادى. ەكسپورت 30 مىڭ تونناعا جەتتى (60 ملن اقش دوللارى).
"كاسپي تەڭىزىندەگى بالىق شارۋاشىلىعى الەۋەتى 500 مىڭ تونناعا جەتەدى. كورشى ەلدەردىڭ ەكسپورتقا ارنالعان پوتەنتسيالىن جانە ىڭعايلى ورنالاسۋىن ەسكەرە وتىرىپ, رۋمىن كومپانيالارىن اتالعان سالاعا ينۆەستيتسيا سالۋعا شاقىرامىن", - دەپ ايتتى ەكولوگيا ءمينيسترى.
تاراپتار ەكونوميكا, ساۋدا جانە ينۆەستيتسيا, ونەركاسىپ, دەنساۋلىق ساقتاۋ, عارىشتى يگەرۋ جانە تاعى باسقا سالالار بويىنشا دا ەكىجاقتى ارىپتەستىك ماسەلەلەرىن تالقىلادى.
جينالىس قورىتىندىسى بويىنشا قازاقستان-رۋمىنيا ۇكىمەتارالىق كوميسسياسىنىڭ 15-ءشى وتىرىسىنىڭ ساۋدا-ەكونوميكالىق جانە عىلىمي-تەحنيكالىق ارىپتەستىك تۋرالى حاتتاماسىنا قول قويىلدى.
