سوڭعى «جەكەلەي ۋاقىتقا» ارنالعان جارىس كۇنى ميلاندا كۇتپەگەن جاعدايمەن اياقتالدى. كەزەڭ باستالار الدىندا جالپى ەسەپتىڭ كوشباسشىسى دجەي حيندلي مەن 2-ورىندا تۇرعان بريتانيالىق تەو گەوگان حارتتىڭ اراسىن بىرنەشە سەكۋند قانا ءبولىپ تۇرعان-دى. ناتيجەسىندە, جەكەلەي جارىس جالپى كوپكۇندىكتىڭ تاعدىرىن شەشىپ كەتتى. گەوگان حارت حيندليگە قاراعاندا, 39 سەكۋند جىلدام ونەر كورسەتىپ, جالپى كەزەڭ قورىتىندىسى بويىنشا «دجيرو د’يتاليا 2020» ۆەلودوداسىنىڭ جەڭىمپازى اتاندى. حيندلي 2-ورىن يەلەنسە, ۇزدىك ۇشتىك قاتارىن نيدەرلاند وكىلى ۆيلكو كەلدەرمان تولىقتىردى.
«استانا» ۆەلوكومانداسىنان فۋلسانگ جالپى ەسەپتە ۇزدىك وندىقتىڭ قاتارىنان كورىنگەنىمەن, جەرلەستەرىمىز ءۇشىن يتاليالىق گراند-تۋر جارىسى ءساتتى ءوتتى دەپ ايتا المايمىز. ۆەلوكوپكۇندىكتىڭ باستالۋىنا بىرەر كۇن قالعاندا «استانانىڭ» نەگىزگى ەكى شاباندوزى – ميگەل انحەل لوپەس پەن الەكساندر ۆلاسوۆ قاتاردان شىعىپ قالدى. ءدال وسى ەكى سپورتشىنىڭ دانيالىق ۆەلوشاباندوزدىڭ جالپى ەسەپتە جاقسى ناتيجە كورسەتۋىنە كومەگى وراسان زور ەدى. ال سوڭعى اپتادا مانۋەلە بوارونىڭ دا جارىستى جالعاستىرا المايتىنى بەلگىلى بولدى. وسىنداي قيىندىققا قاراماستان, «استانا» سپورتشىلارى ءار كەزەڭ سايىن جوعارى ورىنعا ۇمتىلدى.
قازاقستاندىق كوماندانىڭ ۆەلوشاباندوزدارى بىردە-ءبىر كەزەڭدە جارىس جەڭىمپازى اتانباسا دا, 9 مارتە ۇزدىك وندىقتىڭ قاتارىنان كورىندى. ال التىنشى كەزەڭدە 30 جاستاعى يتاليالىق فابيو فەللينە مارە سىزىعىن ءۇشىنشى بولىپ كەستى. ال ياكوب فۋلسانگ 5-كەزەڭدە توعىزىنشى, 9-كەزەڭدە توعىزىنشى, 13-كەزەڭدە جەتىنشى, 15-كەزەڭدە توعىزىنشى جانە 18-كەزەڭدە ءتورتىنشى ورىنعا يە بولدى. وسى ناتيجەسىنىڭ ارقاسىندا ول ءوزىنىڭ گراند-تۋرلارداعى ەڭ ۇزدىك ناتيجەسىنە قول جەتكىزدى. سونداي-اق 16 جانە 17-كەزەڭدە «استانانىڭ» تاعى ەكى وكىلى مانۋەلە بوارو مەن وسكار رودريگەس جارىس كۇنىن توعىزىنشى جانە سەگىزىنشى ورىنمەن اياقتادى. جالپىكوماندالىق ەسەپتە «استانا» جىگىتتەرى توعىزىنشى بولدى.
ايتا كەتەيىك, 2013 جانە 2016 جىلدارى «استانامەن» بىرگە «دجيرو د’يتاليا» جارىسىندا ەكى مارتە توپ جارعان يتاليالىق ۆينچەنتسو نيبالي بۇل جولى 7-ورىنعا تابان تىرەسە, 2017-2019 جىلدارى ەلوردالىق كوماندادا ونەر كورسەتكەن يسپانيالىق پەلو بيلباو دودانى 5-ورىنمەن قورىتىندىلادى.
21-كەزەڭدەگى جەكەلەي جارىستا مارەگە 31-بولىپ كەلگەن فۋلسانگ سۋپەركوپكۇندىكتى قورىتىندىلاپ, جارىس تۋرالى ويىن ورتاعا سالدى.
– ارينە, ءبىز يتالياعا قىزعىلت جەيدەنى يەلەنۋ ءۇشىن كەلگەن ەدىك. الايدا جارىس قورىتىندىسى بويىنشا جالپى ەسەپتى 6-ورىنمەن اياقتادىق. بۇل ءبىز ءۇشىن وتە اۋىر جول بولدى. جارىس باستالماي جاتىپ تا, جارىس بارىسىندا دا ءبىراز قيىندىققا تاپ بولدىق. جاقسى ساتتەر دە از بولعان جوق. جالپى, بيىلعى باسەكە وسىلاي ءوتتى. ءاربىر بولشەگىنە دەيىن ەسەپتەۋ مۇمكىن ەمەس. سوندىقتان ىلعي دا ءوز جۇمىسىڭدى 100% جاقسى اتقارۋىڭ كەرەك. ارقايسىمىز قولىمىزدان كەلگەنىن ىستەدىك. سوڭىنا دەيىن كۇرەستىك. ەندى مىنە, ميلاندا ءبىز جارىستى 6-شى بولىپ اياقتادىق. ارينە, باسەكەنى جەڭىستىڭ ەڭ بيىك تۇعىرىندا قورىتىندىلاعىم كەلدى. بىراق ۆەلوسپورت دەگەن وسىنداي. كەيدە جەڭەسىڭ, كەيدە جەڭىلەسىڭ. الدا مەنى تاعى دا كوپتەگەن جارىس كۇتىپ تۇر. ءدال قازىرگى ساتتە مەن دەمالىس تۋرالى جانە وتباسىممەن قالاي ۋاقىت وتكىزەتىنىم جايلى ويلاپ تۇرمىن. قيىنعا سوققان ماۋسىمنان كەيىن ءبىراز ۋاقىتتى, كەلەسى جارىستار باستالعانشا ۆەلوسيپەدسىز وتكىزگىم كەلەدى, – دەدى ياكوب فۋلسانگ.
