كينو • 29 قازان، 2020

باعى جانعان «ۇلبولسىن»

488 رەت كورسەتىلدى

«جاڭا تولقىن» رەجيسسەرلەرىنىڭ ىشىندە ءادىلحان ەرجانوۆ ەسىمى ەرەكشە اتالادى. اسىرەسە فرانتسۋز كينو ماماندارى مەن كورەرمەندەرىنىڭ سۇيىكتى سۋرەتكەرىنە اينالعان قازاقتىڭ قارا بالاسى الەمنىڭ نەبىر ۇزدىك فەستيۆالدارىنا جولداما الىپ، ۇلتتىق كينو ونەرىمىزدىڭ بايراعىن ءاماندا تەك بيىكتە جەلبىرەتىپ كەلەدى. وسىدان ءبىراز بۇرىن ءادىلحاننىڭ «قاپ-قارا ادامى» فرانتسيادا جالپىۇلتتىق پروكاتقا شىقتى دەپ قۋانساق، ەندى مىنە، اراعا از عانا ۋاقىت سالىپ «ۇلبولسىن» تۋىندىسىنىڭ تۇساۋى تالليندە كەسىلەدى!» دەگەن جاعىمدى جاڭالىقپەن كينوسۇيەر قاۋىمنان تاعى دا ءسۇيىنشى سۇراماقپىز.

«ۇلبولسىن» كوركەم ءفيلمى وسى جىلدىڭ 13-29 قاراشا ارا­لىعىندا ەستونيا استاناسىن­دا وتەتىن ءححىV تاللين كينو­­فەس­تيۆالىنىڭ Black Nights («قا­راڭعى تۇندەر») كينوفەس­تي­ۆا­لىنىڭ نەگىزگى كونكۋرستىق باع­دار­لاماسىنا قاتىسادى. وتاندىق كار­تينا اتالعان باعدارلامادا ۆەنگريا، رەسەي، لاتۆيا، حورۆاتيا، تۇركيا، پورتۋگاليا ەلدەرىنىڭ فيلمدەرىمەن شىعارماشىلىق باسەكەگە تۇسەتىن بولادى. ايتۋلى كينوبايقاۋدا اتاقتى رەجيسسەرلەر الەكساندر ميندادزە جانە اننا مەليكياننىڭ جاڭا كارتينالارى كورسەتىلەدى. سونداي-اق بيىل نەگىزگى باعدارلامادا باق سىنايتىن سەگىز كارتينانىڭ ىشىندە «وسكار» سىيلىعىنىڭ لاۋرەاتى يشتۆان سابونىڭ جاڭا تۋىندىسى دا بار.

«قاراڭعى تۇندەردەگى» كورسە­تىلىم ەرجانوۆتىڭ تولىقمەترلى 10-شى كارتيناسى سانالاتىن «ۇل­بولسىننىڭ» الەمدىك پرەمە­را­سى بولماق. رەجيسسەردىڭ وسى­­­عان دەيىنگى «الەمنىڭ نا­زىك نەمقۇرايدىلىعى» مەن «قو­جا­­يىن­دار» فيلمدەرى PÖFF كينو­­فەستيۆالى كورەرمەندەرىنە جاق­سى تانىس ەدى، ەندى ەستونيا جۇرت­­شىلىعى ونىڭ سوڭعى كارتي­ناسىن دا («ۇلبولسىن») العاش­قى­لاردىڭ ءبىرى بولىپ تاماشالايتىن بولادى.

كارتينا وسى جىلدىڭ باسىندا Sunny Production (قازاقستان)، Short Brothers (قازاقستان) جانە Arizona Productions (فرانتسيا) كومپانيالارىنىڭ قاتىسۋىمەن الماتى وبلىسىندا ءتۇسىرىلدى. «ۇل­بولسىن» – رەجيسسەر ءادىل­حان ەرجانوۆ پەن وپەراتور ازا­مات دۋلاتوۆ اراسىنداعى شىعار­ماشىلىق تاندەمنىڭ العاشقى تا­­جى­ريبەسى. ستسەناري اۆتورى ءادىل­­­حان ەرجانوۆتىڭ ءوزى. فيلم بيىل ءححVى Sarajevo Film Festival كينو­بايقاۋىنىڭ Work-In-Progress سەكتسياسىندا باس جۇلدەنى جەڭىپ الدى.

– بۇل – قيىن جاعدايعا تاپ بول­عان اپالى-ءسىڭلىلى قىزدار تۋرالى وتە قاراپايىم وقيعا. كارتينانىڭ باس كەيىپكەرى − قالادا تۇراتىن مىقتى ءارى جىگەرلى ۇلبولسىن. ونىڭ اجار ەسىمدى ءسىڭلىسى قارا­تاس اۋىلىنىڭ ورتا مەكتەبىن تامام­داعالى جاتىر. اپايىنىڭ ءسىڭلىسىنىڭ بولاشاعىنا دەگەن جوس­پارى زور: ول وعان دەپ قو­ماقتى قاراجات جيناپ، شەتەلدىك بەدەلدى وقۋ ورىندارىنىڭ بىرىنە وقۋعا جىبەرمەك. الايدا ۇلبول­سىن اۋىل­عا كەلگەن سوڭ، جاس قىزدى اۋىل­دىڭ قۇرمەتتى ازاماتى ۇرگەن ەسىمدى جەرگىلىكتى ەمشى ەكىنشى ايەل ەتىپ الۋ ءۇشىن الىپ قاشقانىن بىلەدى. ۇلبولسىن مۇنىمەن كەلى­سەر ەمەس. سوندىقتان قاراتاس اۋى­لىنىڭ پاتريارحالدى الەمىمەن كۇرەسۋگە بەل بۋادى. ءدال وسى قيىن دا قايشىلىققا تولى جاع­داي كەيىپكەرلەردىڭ مىنەز-قۇ­لى­عىن اشۋعا كومەكتەسەدى. فيلم تۇ­سىرىلىمىنە قاتىسقان بار­شا شى­­عارماشىلىق ۇجىمدى «ۇل­بول­سىننىڭ» جەتىستىگىمەن ءھام الەم­دىك پرەمەراسىمەن قۇتتىق­تايمىن! − دەدى تۋىندى رەجيسسەرى ءادىلحان ەرجانوۆ.

ءفيلمنىڭ باس پروديۋسەرى ءارى باستى ءرولىن سومداۋشى – اسەل ­سا­دۋاقاسوۆا. ەستەرىڭىزگە سالا كەت­سەك، ءا.سادۋاقاسوۆا ەرجانوۆتىڭ بۇ­عان دەيىن تۇسىرىلگەن «اتبايدىڭ شاي­قاسى» جانە «سارى مىسىق» ات­تى تاعى ەكى تۋىندىسىن شى­عا­­رۋ­عا اتسالىسقان بولاتىن. ءسىڭ­لى­سى­نىڭ ءرولىن جاس اكتريسا دينارا ساعي، ال ۇرگەن بەينەسىن ەربولات ال­قوجا سومدايدى. سونداي-اق كينو­لەن­تادا سانجار ءمادي، دانيار ال­شى­نوۆ، بەرىك ايتجانوۆ، ەركەن گۋ­باشەۆ جانە باسقا دا اكتەرلەر ونەر كورسەتەدى. ءبىر قىزىعى، «قاپ-قارا ادام» فيلمىندە باستى ءرول­دى سومداعان دانيار الشىنوۆ «ۇل­بولسىننىڭ» ەپيزودىندا دا ال­دىڭ­عى تۋىندىداعى كەيىپكەرى دە­تەكتيۆ بەكزاتتىڭ رولىندە كو­رىنەدى.

كارانتين جاعدايىنا باي­لا­­نىستى «قاراڭعى تۇندەر» كينوفەس­تي­ۆالى بيىل ارالاس تۇردە، ياعني كينو­تەاتر­لار مەن ونلاين فورماتتا قاتار وتكىزىلەدى دەپ جوسپارلانۋدا. الەم­دەگى ەپيدەميالىق جاع­دايدى ەسكەرگەن فەستيۆال ۇيىم­­داستىرۋشىلارى قازىردەن باس­تاپ بارلىق قاۋىپسىزدىك شارا­سىن قاراستىرىپ قويىپتى. قا­تىسۋشىلارعا تەگىن بەتپەردەلەر دە تاراتىلاتىن بولادى.

سوڭعى جاڭالىقتار

15169 ادام كوروناۆيرۋس جۇقتىردى

كوروناۆيرۋس • بۇگىن، 09:17

ۇقساس جاڭالىقتار