«اباي» وپەراسىنىڭ كەيىپكەرلەرىنە ارنالادى

بۇدان باسقا، كورەرمەندەر ەلور­دا­لىق تەاتردا وپەرا پرەمەراسىنا ازىر­لەنۋ جۇرە باستاعان ساتتەن باس­تاپ «اباي» وپەراسى­نىڭ اڭىز بولعان قو­يىلىمىنىڭ تاريحىن باياندايتىن ار­تىس­تەردىڭ دەبيۋتتەرىمەن، سونداي-اق تەاتردىڭ اۋقىمدى گاسترولدەرى كە­زىندەگى فوتوەكسپوناتتارمەن تانىسا الادى. ماسەلەن، «استانا وپەرا» ار­تىس­تەرىنىڭ ورىنداۋىنداعى ايتۋلى قويى­لىمنىڭ ارقاسىندا، الىس-جاقىن شەتەل كورەرمەندەرى قازاق حالقىنىڭ كەمەڭگەر تۇلعاسىمەن جاقىن تانىسۋعا مۇمكىندىك الدى.  

– حاكىمنىڭ ساحناداعى كوركەم بەي­نەسىنە ارنالعان بۇل كورمە ارقىلى ءبىز كورەرمەندەردىڭ ۇلى ويشىلدىڭ ءومى­رى مەن شىعارماشىلىعىنا دەگەن قىزى­عۋشىلىعىن ارتتىرعىمىز كە­لەدى. ەكس­پوزيتسيانىڭ اشىلۋ كۇنىندە ۇلكەن زال ساحناسىندا «اباي» وپەراسى قويىلادى. قازاق اقىنىنىڭ تاۋ تۇلعاسى – ءوز ماعىناسىندا ءداۋىر اۋى­سۋى كەزىندەگى، ياعني وتكەنىمىز بەن ەرتەڭىمىزدى ساباقتاستىرىپ تۇرعان «التىن كوپىر» تارىزدەس نىشاندى قۇبىلىس. مۇنىڭ بارلىعىن قازاقستاننىڭ تۇڭعىش پرە­زيدەنتى نۇرسۇلتان نازارباەۆ ءوزىنىڭ «اباي اماناتى» اتتى ماقالاسىندا ايت­قان بولاتىن. ەلباسى حالقىمىز ءۇشىن اباي ءبىزدىڭ اينىماس تەمىرقازىعىمىز بولعانىن، بولىپ تا قالا بەرەتىنىن بىر­نەشە مارتە ايرىقشا اتاپ ءوتتى، – دەدى «استانا وپەرا» تەاترىنىڭ ديرەكتورى، قا­زاقستاننىڭ ەڭبەك سىڭىرگەن قايراتكەرى عالىم احمەدياروۆ.

ال كوستيۋم سۋرەتشىسىنىڭ ايتۋىنشا، ايتۋلى اۋقىمدى سپەكتاكلگە ارنالىپ 200-دەن استام كوستيۋم تىگىلىپتى. ولاردى دايىنداۋ كەزىندە تابيعي جىبەكتەن باس­تاپ پەردەلىك ماتالارعا دەيىنگى ءتۇرلى ماتەريال پايدالانىلدى. كوستيۋمدەر بويىن­شا سۋرەتشى ولارمەن جۇمىس جاساۋ كەزىندە ارنايى ادەبيەتتەرگە، سونداي-اق كىتاپحانالار مەن مۇراجايلاردان تاپقان تاريحي فوتولاردىڭ كوشىرمەلەرىنە سۇ­يەندى. ءبىر قۋانارلىعى، ءوزىمىز قويىلىم بارىسىندا كۋا بولعانداي، يتاليالىق ساحنا مامانى فرانكو سكۋارچاپينو قازاق مادەنيەتىنىڭ تەرەڭىنە بويلاۋ ارقىلى ۇلتتىق كيىمنىڭ بارلىق بولشەكتەرىن ءساتتى ايشىقتاي الدى، اياق-كيىمدەردىڭ، باس كيىمدەردىڭ بەدەرلى ويۋلارىنا، بەزەن­دىرىلگەن اشەكەيلەرگە ەرەكشە نازار اۋدارا ءبىلدى. ءار كوستيۋمگە ماتانىڭ اسا زور تالعامپازدىقپەن ارنايى تاڭدالۋى جانە ويۋ-ورنەك ءھام ءتۇس ۇيلەسىمىنەن-اق بىلىكتى كاسىبي ماماننىڭ جۇمىسى ەكەندىگىن بىر­دەن اڭعارۋعا بولادى.

«استانا وپەرا» تەاترىندا مۇحتار اۋەزوۆتىڭ ليبرەتتوسىنا جازىلعان سپەك­تاكلدىڭ پرەمەراسى 2015 جىلعى 25 قىركۇيەكتە ءوتتى. قويىلىمنىڭ مۋ­زىكا­لىق جەتەكشىسى – تەاتردىڭ باس ديريجەرى، قازاقستاننىڭ ەڭبەك سىڭىر­گەن قايراتكەرى، مەملەكەتتىك سىي­لىقتىڭ لاۋرەاتى الان بورىباەۆ، قويۋشى رەجيسسەرى – دجانكارلو دەل موناكو (يتاليا). كەڭەسشى-رەجيسسەر – قازاقستاننىڭ حالىق ءارتىسى ەسمۇقان وباەۆ. باس حورمەيستەر – قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ. قويۋشى رەجيسسەردىڭ اسسيستەنتى – ەرەن­باق تويكەنوۆ. «استانا وپەرا» تەات­رى­نىڭ شىعارماشىلىق ۇجىمى 2018 جى­لى «اباي» وپەراسىنىڭ قويىلىمى ءۇشىن ادەبيەت جانە ونەر سالاسىنداعى قازاق­ستان رەسپۋبليكاسىنىڭ مەملە­كەتتىك سىيلى­عىن الدى.

تەاتر باسشىلىعى ءمالىم ەتكەن­دەي، سەگىزىنشى تەاتر ماۋسىمىندا ءتۇر­لى با­عىتتاعى كورمەلەر ءجيى ۇيىم­داس­تىرىلادى. ياعني تەاتر اكىمشىلىگىنىڭ ەكس­پوزيتسيا­نى تۇراقتى تۇردە وتكىزىپ تۇرۋ جوسپارى بار. ماسەلەن، كەلەسى ۇيىم­داستىرىلاتىن كورمە مايرا مۇحا­مەدقىزىنىڭ شىعار­ماشىلىعىنا ارنالاتىن بولادى جانە ايتۋلى شارا وپەرا جۇلدىزىنىڭ جەكە كون­تسەرتىنىڭ اياسىندا وتەدى. دەمەك، بۇل تاماشا ءداس­تۇر الداعى ۋاقىتتا دا جالعاسىن تابادى دەگەن ءسوز. ەندىگى ۇسىنىلاتىن كور­مەلەر مازمۇنى نەگىزىنەن وپەرانىڭ، با­لەتتىڭ جەتەكشى سوليستەرىنىڭ جانە بار­لىق شىعارماشىلىق ۇجىمنىڭ جەتىس­تىكتەرىنە ارنالىپ، ولاردىڭ سپەكتاكلدەرى كەزىندە ۇسىنىلاتىن بولادى.