ايماقتار • 28 قازان، 2020

بالالار مەن قارتتار ۇيلەرىندە پروفيلاكتيكالىق تەكسەرۋدەن وتەدى

132 رەت كورسەتىلدى

الماتى اكىمى باقىتجان ساعىنتاەۆتىڭ تاپسىرماسى بويىنشا اعىمداعى جىلدىڭ 2 قاراشاسىنان باستاپ بالالار مەن قالانىڭ 65 جانە ودان ۇلكەن جاستاعى تۇرعىندارىن پروفيلاكتيكالىق مەديتسينالىق تەكسەرۋدى ۇيدە وتكىزۋ كامپانياسى باستالادى، دەپ حابارلايدى Egemen.kz

بۇل تۋرالى الماتى تا-نىڭ Akimat Live باعدارلاماسىنىڭ تىكەلەي ەفيرى بارىسىندا بەلگىلى بولدى. قالا اكىمى ب.ساعىنتاەۆ كۆي پاندەمياسى كەزىندە ناۋقاستاردى جوسپارلى قابىلداۋدىڭ قىسقارۋىنا بايلانىستى پروفيلاكتيكالىق مەديتسينالىق تەكسەرۋدى ۇيدە وتكىزۋ جونىندە شەشىم قابىلدانعانىن حابارلادى.

الماتى اكىمى پروفيلاكتيكالىق مەديتسينالىق تەكسەرۋ اۋرۋدىڭ ءتۇرىن ەرتە انىقتاۋعا باعىتتالعان حالىققا بەلسەندى مەديتسينالىق كومەك كورسەتۋ تەتىكتەرىنىڭ ءبىرى ەكەنىن اتاپ ءوتتى. سوندىقتان قارتتار مەن بالالاردى ۇيدە پروفيلاكتيكالىق مەديتسينالىق تەكسەرۋدەن وتكىزۋ تۋرالى شەشىم قابىلداندى.

ەمحانالاردا ارنايى قۇرىلعان ءارى قۇرامىنا پەدياتورلار، نەۆروپاتولوگتار، حيرۋرگتار، لور-دارىگەرلەر مەن وفتالمولوگتار ەنگەن مۋلتيديستسيپلينارلىق توپتارداعى مەديتسينا قىزمەتكەرلەرى 2 قاراشادان باستاپ جۇمىستارىن باستايدى. جالپى پراكتيكانىڭ ۋچاسكەلىك دارىگەرلەرى ءتىزىم جاسايدى جانە مەديتسينالىق تەكسەرۋدىڭ ۋاقىتى تۋرالى، ۇيدە ءارى تەكسەرۋگە دايىن بولۋىڭىز جونىندە الدىن الا حابارلايتىن بولادى.

65 جانە ودان ۇلكەن جاستاعى 80 مىڭعا جۋىق قالا تۇرعىندارىن، سونىمەن قاتار 100 مىڭعا جۋىق بالالاردى (0-16 جاس ارالىعىنداعى)، ونىڭ ىشىندە الەۋمەتتىك جانە مەديتسينالىق ۇيىمداردا ەسەپتە تۇرعان مۇمكىندىگى شەكتەۋلى بالالاردى، كوپبالالى وتباسىلاردىڭ جانە الەۋمەتتىك جاعىنان قورعالاتىن وتباسىلاردىڭ بالالارىن جانە قاشىقتان وقيتىن بالالاردى قامتۋ جوسپارلانعان.

ب.ساعىنتاەۆ بۇل شارانىڭ قالا تۇرعىندارىنىڭ دەنساۋلىعىن ساقتاۋعا جانە كوروناۆيرۋستىق ينفەكتسيانىڭ جاڭا تولقىنى سالدارىنان قوسىمشا قاۋىپكە ۇشىرماۋلارىنا كومەكتەسەتىنىنە سەنىم ءبىلدىردى.

مەگاپوليس باسشىسى قالاداعى ەپيدەميالىق احۋالدىڭ كۇن سايىن قۇبىلىپ وتىرعانىن ەسكە سالدى. ونىڭ ۇستىنە اۋرۋدىڭ ءوسۋ تەندەنتسياسى بايقالادى. ەگەر قىركۇيەكتىڭ سوڭىندا - قازان ايىنىڭ باسىندا اۋرۋدىڭ ماكسيمالدى تومەندەۋى بايقالىپ، تاۋلىگىنە 3-5 وقيعا تىركەلسە، ال قازاننىڭ ءۇشىنشى اپتاسىندا تاۋلىگىنە 44 وقيعاعا دەيىن تىركەلدى، ياعني ءوسىم 9 ەسەدەن ارتىق.

سوندىقتان ب.ساعىنتاەۆ قالا تۇرعىندارىن سانيتارلىق-ەپيدەميالىق قاۋىپسىزدىك شارالارىن قاتاڭ ساقتاۋعا تاعى دا شاقىردى. ولار: مەديتسينالىق ماسكانى كيۋ، الەۋمەتتىك قاشىقتىقتى جانە سانيتارلىق گيگيەنانى ساقتاۋ. ادامدار كوپ شوعىرلانعان جەرلەردەن اۋلاق بولىپ، شەتەلدەرگە ساپار شەگۋدەن باس تارتقان ءجون.

سوڭعى جاڭالىقتار

ۇقساس جاڭالىقتار