الماتى اكىمى باقىتجان ساعىنتاەۆ بۇگىن الاتاۋ اۋدانىنا جۇمىس ساپارى كەزىندە قوعامدىق كەڭىستىكتەردىڭ اباتتاندىرىلۋ بارىسىمەن جانە ينفراقۇرىلىمدىق ماسەلەلەردىڭ شەشىلۋىمەن تانىستى.
ب.ساعىنتاەۆ يەسىز بوس جاتقان جەرلەردىڭ ورنىندا پايدا بولعان بىرقاتار قوعامدىق كەڭىستىكتەردە بولدى. جۇمىسپەن قامتۋدىڭ جول كارتاسى اياسىندا "اقبۇلاق", "شاپاعات", "قاراسۋ" ىقشاماۋداندارىندا سكۆەرلەر سالىندى جانە جوندەلدى, سونىمەن قاتار موڭكە بي كوشەسىندەگى ۆوركاۋت الاڭ ىسكە قوسىلدى.
"سپورتتىق جانە بالالار ايماعى بۇلدىرشىنگە تولى بولسا, اللەيادا اقساقالدار سەرۋەندەپ ءجۇر.تۇرعىن ۇيلەردىڭ ماڭايى قاڭىراپ بوس تۇردى دەگەنگە سەنۋ قيىن. مۇنداعى تۇرعىندارمەن اڭگىمەلەسىپ, جاڭا قوعامدىق كەڭىستىكتەردى كۇتىپ ۇستاۋعا شاقىردىم", دەپ جازدى ب.ساعىنتاەۆ ءوزىنىڭ Instagram-داعى پاراقشاسىندا.
سونداي-اق قالا اكىمى 78 گەكتار جەرگە الەۋمەتتىك بەلسەندىلەر مەن ەكو-بەلسەندىلەردىڭ كۇشىمەن جىل باسىندا سالىنعان قاراعايلى ورماندى اباتتاندىرۋ بارىسىمەن تانىستى. "جقجك" شەڭبەرىندە مۇندا اباتتاندىرۋ جۇمىستارى جۇرگىزىلىپ, سۋارۋ جۇيەسى قاراستىرىلعان. جالپى, الاتاۋ اۋدانىندا جاسىل جەلەكتەردىڭ اۋماعى ەكى ەسەگە جۋىق كوبەيەدى, جاسىل جەلەكتەر سانى 355 مىڭعا جەتەدى, ونىڭ 176 مىڭى بيىل Jasyl Almaty باعدارلاماسى اياسىندا وتىرعىزىلادى.
سونىمەن قاتار, ب. ساعىنتاەۆ جول سالۋ جانە جوندەۋ ۋچاسكەلەرىن قاراپ شىقتى, سونىمەن قاتار "ۇلجان" جانە "وجەت" ىقشاماۋداندارىندا ينجەنەرلىك جەلىلەر مەن سىرتقى جارىقتاندىرۋ جۇيەسىن سالۋ جۇمىستارىنىڭ بارىسىمەن تانىستى.
"باقىتتى وتباسى" اۋداندىق كوپبالالى انالاردى الەۋمەتتىك قولداۋ ورتالىعىندا الماتى قالاسىنىڭ اكىمى ب.ساعىنتاەۆقا جىل ىشىندە جۇرگىزىلگەن وزگەرىستەردىڭ ناتيجەلەرى تانىستىرىلدى. ونىڭ ناتيجەسى كوپ بالالى انالاردىڭ بەلسەندى ومىرگە ارالاسۋى بولدى. جىل باسىنان بەرى 25 مىڭ ايەل "Isker ana" باعدارلاماسى بويىنشا نەگىزگى ترەنينگتەر مەن كۋرستاردان ءوتتى. 537 ايەل "بيزنەس باستاۋ" باعدارلاماسى بويىنشا وقىدى, ونىڭ 300-ءى گرانت الىپ, ءار ءتۇرلى باعىتتا ءوز كاسىبىن اشتى.
