مەملەكەت باسشىسى نۇرسۇلتان نازارباەۆتىڭ اتىنا وڭتۇستىك قازاقستان وبلىسىنىڭ اكىمى ابىلاي مىرزاحمەتوۆتەن حات كەلىپ ءتۇستى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسى نۇرسۇلتان نازارباەۆتىڭ اتىنا وڭتۇستىك قازاقستان وبلىسىنىڭ اكىمى اسقار مىرزاحمەتوۆتەن حات كەلىپ ءتۇستى, دەپ حابارلادى پرەزيدەنتتىڭ ءباسپاسوز قىزمەتى.
ءوز ەسەبىندە ا.مىرزاحمەتوۆ ۇكىمەتتىڭ 2013 جىلعى 11 قازانداعى كەڭەيتىلگەن وتىرىسىندا مەملەكەت باسشىسى بەرگەن تاپسىرمالاردىڭ ورىندالۋ بارىسىنان حاباردار ەتكەن.
وڭتۇستىك قازاقستان وبلىسىنىڭ اكىمى كاسىپكەرلەرگە «بيزنەستىڭ جول كارتاسى-2020» باعدارلاماسى بويىنشا جالپى قۇنى 90 ملن. تەڭگە كولەمىندە گرانت جانە شاعىن نەسيە ءبولۋ قاراستىرىلعانىن مالىمدەيدى.
جىل باسىنان بەرى 17 كاسىپكەر 71 ملن. تەڭگە كولەمىندە گرانت الىپ, قازىردىڭ وزىندە ءوز جوبالارىن جۇزەگە اسىرۋدا, ال تاعى 5 گرانت بويىنشا بايقاۋ كوميسسياسىنىڭ شەشىمى شىعارىلىپ, ءتيىستى قۇجاتتار ازىرلەنۋدە. كەستەگە سايكەس, قاراجات جىل سوڭىنا دەيىن تولىعىمەن يگەرىلەتىن بولادى.
بۇعان قوسا, مونوقالالاردى دامىتۋ باعدارلاماسى اياسىندا قۇنى 12 ملن. تەڭگە بولاتىن 6 گرانت ءبولىنىپتى.
وبلىس اكىمىنىڭ ەسەبى بويىنشا, «جۇمىسپەن قامتۋ جول كارتاسى-2020» باعدارلاماسى اياسىندا جىل باسىنان بەرى قۇنى 2,5 ملرد. تەڭگە بولاتىن 1076 شاعىن نەسيە بەرىلگەن. بۇدان بولەك, «ماكسيمۋم» وڭىرلىك ينۆەستيتسيالىق ورتالىعى ارقىلى قۇنى 2,4 ملرد. تەڭگە بولاتىن 1654 شاعىن نەسيە قوسىمشا ءبولىنىپتى.
وسىلايشا, بۇگىندە وبلىستا جالپى قۇنى 4,9 ملرد. تەڭگەنى قۇرايتىن 2730 شاعىن نەسيە بەرىلگەن.
سونىمەن قاتار, ا.مىرزاحمەتوۆ وڭىردە توقىما فابريكالارىنىڭ جۇمىس ىستەۋى ماسەلەلەرىنىڭ شەشىلگەنى تۋرالى باياندايدى. مىسالى, «Oxy Textile» جشس مەن ماقتا وڭدەۋ زاۋىتى «Sarmat trading» جشس اراسىندا جىل بويى تولىق جۇمىس ىستەۋ ءۇشىن جەتكىلىكتى 6000 توننا ماقتا تالشىعىن وڭدەۋ جونىندە كەلىسىم جاسالعان. بۇگىندە زاۋىتتى ىسكە قوسۋ جۇمىستارى جۇرگىزىلۋدە. سونداي-اق, يندۋستريالاندىرۋ كارتاسىنا ەنبەگەن «مەلانج» توقىما فابريكاسى بيىلعى قىركۇيەك ايىنان باستاپ جۇمىس ىستەي باستادى. ۇلتتىق كومپانيالارمەن جىلىنا قۇنى 50 ملن. دوللارعا تاۋار ساتىپ الاتىن ۇزاق مەرزىمدى (5 جىل) كەلىسىمدەر جاسالعان.
وڭتۇستىك قازاقستان وبلىسى اكىمى توقىما فابريكالارىن شيكىزاتپەن تۇراقتى قامتاماسىز ەتەتىن بىرىڭعاي جۇيە قالىپتاستىرۋ ءۇشىن مەملەكەتتىك تۇراقتاندىرۋ قورىن قۇرۋ جونىندە ۇكىمەتكە ۇسىنىس ەنگىزىلىپ, بۇل باعىتتا جۇمىستار جۇرگىزىلگەنىن ءمالىم ەتەدى.
ا.مىرزاحمەتوۆ ەسەبىنىڭ سوڭىندا كەڭەيتىلگەن وتىرىس بارىسىندا العا قويىلعان باسقا دا مىندەتتەر بويىنشا وبلىستا ارنايى ءىس-شارالار جوسپارى قابىلدانىپ, سوعان سايكەس ءتيىستى جۇمىستار اتقارىلىپ جاتقانى تۋرالى حابارلاعان.
