– ءۇيدىڭ جانىنداعى دۇكەنگە ءبىر كىرىپ-شىققاننىڭ وزىندە كەمىندە 5 مىڭ تەڭگە جۇمسايسىڭ. سونداعى الاتىنىڭ كۇندەلىكتى تۇتىناتىن ازىق-ت ۇلىك – نان, جۇمىرتقا, كۇنباعىس مايى. ىرىكتەلگەن كەسەك جۇمىرتقانى 430 تەڭگەگە الدىم. باعا قايدا كەتىپ بارادى, – دەيدى وسكەمەندىك زەينەتكەر بيكامال قۇرالوۆا.
باعا باعىنباي بارادى. ماسەلەنىڭ انىق-قانىعىنا كوز جەتكىزۋ ءۇشىن وسكەمەن قالالىق كاسىپكەرلىك جانە اۋىلشارۋاشىلىق, ۆەتەريناريا بولىمىنە حابارلاسقانبىز. ولاردىڭ ايتۋىنشا, الەۋمەتتىك ماڭىزى بار ونىمدەردىڭ باعاسىنا ۇنەمى مونيتورينگ جاسالىپ وتىرادى. اتالعان ءبولىم ماماندارى ۇساق-تۇيەك دۇڭگىرشەكتەردەن باستاپ ءىرى ساۋدا ورىندارىنداعى باعانىڭ ءبارىن نازارىندا ۇستايدى. ەگەر دە تۇرعىندار تاراپىنان قانداي دا نارازىلىق تۋىندايتىن بولسا, قۇزىرلى ورگاندارمەن بىرلەسىپ جۇمىس ىستەيدى. ال باعانى نازاردا ۇستاۋ ءۇشىن جاسالاتىن مونيتورينگ جۇمىستارىنا قالا جۇرتشىلىعى ەرىكتى تۇردە قاتىسا الادى. باعانى باقىلاۋ جۇمىستارى كەزىندە ارنايى ماماندار الەۋمەتتىك ماڭىزدى دەگەن ازىق-ت ۇلىكتەردىڭ باعاسىن ءتۇرتىپ الىپ وتىرادى. ەگەر باعادا ءوسىم بايقالسا, كوتەرۋ سەبەبى انىقتالادى.
– قازىرگى ۋاقىتتا جۇمىرتقا باعاسى قىمباتتاعان. ءبىرىنشى سۇرىپتى جۇمىرتقا الەۋمەتتىك ماڭىزى بار ازىق-ت ۇلىككە جاتادى. باعاسىنىڭ ءوسۋ سەبەبىن ايتار بولسام, قۇس فابريكالارىندا ەپيزووتيالىق كەرى جاعدايلارعا بايلانىستى ايتارلىقتاي شىعىندار بولدى. تاۋىقتاردىڭ سانى ازايىپ, دەزينفەكتسيالىق زاتتار ساتىپ الىندى. ۆاكتسينالار دا ارزان ەمەس. ودان باسقا قۇستاردىڭ ازىعى دا ءبىرشاما قىمباتتاعان, – دەپ ءتۇسىندىردى وسكەمەن قالالىق كاسىپكەرلىك جانە اۋىلشارۋاشىلىق, ۆەتەريناريا ءبولىمىنىڭ باسشىسى گاسان تۇرعانباەۆ.
ءبولىم باسشىسىنىڭ ايتۋىنشا, وسىمدىك مايىنا دەگەن باعانىڭ ءوسۋى دە نەگىزگى شيكىزاتتىڭ قىمباتتاۋىمەن بايلانىستى. مايلى ءداندى داقىلدار ەگۋمەن اينالىساتىن شارۋا قوجالىقتارى شەكىلدەۋىك تۇقىمىنىڭ قىمباتتاۋىن العا تارتقان.
ۇن باعاسىنىڭ ءوسۋ سەبەبى دە وسىعان ۇقساس. جىل باسىندا ۇن تارتۋ كاسىپورىندارىندا ءبىرىنشى سۇرىپتى ۇننىڭ كيلوسى 110 تەڭگەنىڭ ماڭايىندا بولاتىن. الايدا ساۋىردەن باستاپ جەكە شارۋا قوجالىقتارى بيدايدى قىمباتقا ساتا باستاعان. ياعني تونناسى 68 مىڭ تەڭگەدەن 85 مىڭ تەڭگەگە دەيىن وسكەن. ءسويتىپ, ۇن تارتۋشىلار دا كيلوسىن 125 تەڭگەگە كوتەرگەن. قازىرگى ۋاقىتتا ۇن باعاسى وسىمەن تۇراقتالعان. ال قانت باعاسىنىڭ قىمباتتاۋىنىڭ سەبەبى – شيكىزاتتىڭ كوبى شەتەلدەن اكەلىنەتىنى. سايىپ كەلگەندە شيكىزات باعاسىنىڭ قىمباتتاۋى دۇكەن سورەلەرىندە تۇرعان ونىمدەردىڭ باعاسىنا اسەر ەتەدى. مامانداردىڭ ايتۋىنشا, ءدال قازىرگى ۋاقىتتا باعا تۇراقتادى.
تۇرعىندار ءۇشىن وڭىرلىك تۇراقتاندىرۋ قورىنىڭ قويمالارىندا دا قور جەتكىلىكتى. سوڭعى مالىمەتكە سۇيەنسەك, قوردا 2 400 توننا كارتوپ, 1 300 توننا قىرىققابات, 800 توننا ءسابىز جانە 1 200 توننا پياز ساقتالعان. تۇراقتاندىرۋ قورىنىڭ ونىمدەرى قاراشانىڭ بىرىنەن باستاپ كەلەسى جىلدىڭ مامىرىنا دەيىن ساۋدادا بولادى.
جەمىس, كوكونىس ونىمدەرى قازاننىڭ سوڭىنا قاراي تولىق كولەمدە جەتكىزىلەدى. جىل باسىندا تۇركىستان وبلىسىنان 95 توننا قىرىققابات پەن 2 200 توننا ءبىرىنشى سۇرىپتى ۇن ساتىپ الىندى. سوڭعىسى الەۋمەتتىك نان وندىرۋشىلەرگە ۇستەمەسىز ساۋدالانۋدا. بۇگىندە بۇل ۇننىڭ 34,7 پايىزى ساتىلدى. قوردا ءالى 1 436 تونناسى بار.
الەۋمەتتىك سورەلەردە سونداي-اق 3 پايىز ۇستەمەمەن 185 تەڭگەدەن 100 توننا ماكارون ونىمدەرى ساتىلىپ جاتىر. قازىرگى ۋاقىتتا 67 پايىزدان استامى ساتىلىپ قويدى. وسكەمەن قالاسى بويىنشا – 52,28 توننا, سەمەي قالاسى بويىنشا – 14,68 توننا.
سونىمەن قاتار تۇراقتاندىرۋ قورىنداعى 408 توننا كۇرىشتىڭ 157 تونناسى 255 تەڭگەدەن ساتىلىپ جاتىر. ىشكى نارىقتى تۇراقتاندىرۋ ءۇشىن «ۆوستوك ساحار» جانە «اق سۇڭقار» جشس قويمالارىنا وتكەن جىلدىڭ باسىندا 680 توننادان استام قانت جەتكىزىلگەن. ونىڭ 639 تونناسى ساتىلىپ, 40 توننادان استام قانت قالدى.
بيىل وڭىرلىك كوميسسيا قاراقۇمىق جارماسىن ساتىپ الۋ تۋرالى دا شەشىم قابىلدادى. سەبەبى وتكەن جىلعى ساتىپ الىنعان ءونىمنىڭ بارلىعى ساتىلىپ كەتتى.
شىعىس قازاقستان وبلىسى
