بۇگىن قازاقستان رەسپۋبليكاسى پرەمەر-ءمينيسترىنىڭ ورىنباسارى ەرالى توعجانوۆ باسشىلىعىمەن وتاندىق ءوندىرىستىڭ 24 جىلجىمالى مەديتسينالىق كەشەنى (بۇدان ءارى – جمك) ەلىمىزدىڭ ءتورت سولتۇستىك وڭىرىندەگى اۋداندىق اۋرۋحانالاردىڭ قىزمەتكەرلەرىنە سالتاناتتى تۇردە تابىس ەتىلدى.
ۆيتسە-پرەمەر ە.توعجانوۆ قۇتتىقتاۋ سوزىندە مەملەكەت باسشىسى مەن ۇكىمەت اتىنان ەلىمىزدىڭ بارلىق مەديتسينا قىزمەتكەرلەرىنە قاجىرلى ەڭبەكتەرى ءۇشىن شىن جۇرەكتەن العىسىن ءبىلدىردى. ەل باسشىلىعى ساپالى مەديتسينالىق كومەك كورسەتۋ ءۇشىن اۋرۋحانالاردى زاماناۋي مەديتسينالىق جابدىقتارمەن جابدىقتاۋ بويىنشا شارالار قابىلدانعانىن ەرەكشە اتاپ ءوتتى.
جمك وتاندىق اۆتوكولڭك نەگىزىندە قۇرىلعان جانە كوشپەلى جاعدايدا ازاماتتاردىڭ دەنساۋلىعىن زەرتتەۋدىڭ كەڭ سپەكترىنە ارنالعان. كەشەن ساندىق قۇرالدارمەن جابدىقتالعان 7 مامانداندىرىلعان كابينەتتەن تۇرادى: جالپى قابىلداۋ كابينەتى, جالپى پراكتيكا دارىگەرىنىڭ ايماعى, تالداۋلاردى قابىلداۋ ايماعى, ءدارىحانا پۋنكتى, فۋنكتسيونالدىق دياگنوستيكا تەستىلەرى, اكۋشەر-گينەكولوگ كابينەتى, ساۋلەلىك دياگنوستيكا كابينەتى.
سونىمەن قاتار, ءموبيلدى مەديتسينالىق ورتالىقتا ارنايى قورعاسىنمەن قاپتالعان بولمە ورناتىلعان, وندا رەنتگەن جانە فليۋوروگرافيانى قاۋىپسىز جاساۋعا بولادى. جۇيەنىڭ بوگدە ادامنىڭ جاردەمىنە مۇقتاج ادامدار ءۇشىن ينفراقۇرىلىمدىق جۇيەمەن جابدىقتالۋى وتە ماڭىزدى - پاندۋس-ليفت مۇمكىندىگى شەكتەۋلى ادامداردى قابىلداۋدى قولجەتىمدى ەتەدى.
اتالعان كەشەندەر اۋدان ورتالىقتارىنان 100 كم استام قاشىقتىقتا ورنالاسقان اۋىلدىق وكرۋگتەردە مەديتسينالىق قىزمەتتەردى جوعارى دەڭگەيدە كورسەتۋگە مۇمكىندىك بەرەدى.
اعىمداعى جىلدىڭ 23 قازانىنا دەيىن قازاقستاننىڭ وڭىرلەرى 100 جمك-مەن قامتاماسىز ەتىلەدى.
ءوز كەزەگىندە مەديتسينا قىزمەتكەرلەرى مەملەكەت تاراپىنان جان-جاقتى قولداۋ كورسەتىلىپ كەلە جاتقانىنا زور ريزاشىلىق سەزىمدەرىن ءبىلدىردى. وسىنداي كەشەندەردىڭ ارقاسىندا دارىگەرلەر اۋىل تۇرعىندارىنا ساپالى كومەك كورسەتىپ, قازاقستان ازاماتتارىنىڭ دەنساۋلىعى مەن ءومىر ءسۇرۋ ۇزاقتىعىن جاقسارتا الاتىنىن اتاپ ءوتتى.
