شىعىستا سۋىق جىلداعىدان ەرتە ءتۇسىپ, جىلۋ بەرۋ ماۋسىمى قىركۇيەكتىڭ سوڭىنا قاراي باستالىپ كەتتى. وڭىردەگى 945 مەكتەپ, 73 مەديتسينالىق مەكەمە, 17 الەۋمەتتىك قورعاۋ جانە 4 837 كوپپاتەرلى تۇرعىن ءۇي جىلۋ كوزدەرىنە تولىق قوسىلعان.
جىلۋ بەرۋ نىساندارى قىسقى ماۋسىمعا 100 پايىز دايىن. اتاپ ايتساق, جىلۋ ەلەكتر ستانسالارى مەن جىلىتۋ كوزدەرىندە 308 مىڭ توننا وتىن جيناقتالعان. بۇل جىلدا جاعىلاتىن 210 مىڭ توننا كومىر قورىنان 147 پايىزعا اسىپ ءتۇستى. ال كومىر جەتكىزۋ جۇمىستارى بەكىتىلگەن كەلىسىمشارتقا سايكەس تولىق ورىندالىپ جاتىر.
بيىلعى جىلىتۋ ماۋسىمىنا اۋداندار تىڭعىلىقتى دايىندالدى. ماسەلەن, التاي اۋدانىنىڭ سەرەبريانسك قالاسىنداعى جىلىتۋ ستانساسىنا جالپى سوماسى 50,16 ملن تەڭگەنى قۇرايتىن اعىمداعى جۇمىستار جۇرگىزىلدى. ال اباي اۋدانىنىڭ ورتالىعى قاراۋىلدا ەلدى مەكەندى جىلۋمەن قامتاماسىز ەتەتىن قازاندىق قايتا جاڭاردى. بۇدان بولەك, اياگوزدەگى «سولتۇستىك» جىلۋ قازاندىعىنا بولىنگەن 132 ملن تەڭگەنىڭ 106 ملن-ى يگەرىلدى. بۇل قاراجاتقا جىلۋ بەرۋ عيماراتى جوندەلىپ, «كتس-1,5 گكال» ماركالى ءتورت قازاندىق ورناتىلدى. سونداي-اق جىلۋ قۇبىرلارى تارتىلىپ, ەكى قازاندىق قاپتالدى. حالىقتى كومىرمەن قامتۋ ماسەلەلەرى تولىق شەشىلگەن.
«قاراجىرا» اق باس ديرەكتورىنىڭ ورىنباسارى اسەت سىدىقوۆتىڭ ايتۋىنشا, جىل باسىندا 9 ملن توننا كومىر ءوندىرۋ جوسپارلانعان. الايدا ەلدەگى ەنگىزىلگەن كارانتيندىك شارالارعا بايلانىستى جوسپار 8 ملن تونناعا تۇسكەن. ال بيۋدجەتتىك ۇيىمدار كومىر ساتىپ الۋ بويىنشا جۇرگىزىلەتىن تەندەرلەرىن تامىزدىڭ ورتاسىنا قاراي وتكىزە باستاعان كورىنەدى. بىراق «قاراجىرا» كەن ورنىندا كومىر بوساتۋدان ەشقانداي پروبلەما بولعان جوق. كەرىسىنشە, كومىر تيەۋگە ءوتىنىم بەرىلگەن ۆاگوندار جەتكىلىكسىز بولعان كورىنەدى.
– «قازتەمىرترانس» اق ۆاگوندارىن جىبەرۋ جۇيەسىنە تۇبەگەيلى وزگەرىس كەرەك سياقتى. قىركۇيەكتىڭ سوڭىنا قاراي تاۋلىگىنە 420 اشىق ۆاگونعا ءوتىنىم بەرگەن ەدىك. بىراق ءبىرىنشى كۇنگە 183, ەرتەسىنە 290 ۆاگون عانا جىبەردى. ءسويتىپ تۇتىنۋشىلار الدىندا جوسپار تولىق ورىندالماي قالۋى مۇمكىن ەدى, – دەيدى ءا.سىدىقوۆ.
بىراق جىلۋ ماۋسىمى باستالماي جاتىپ, وبلىستاعى كومىر ءتۇسىرۋ تۇيىقتارىنا 30 مىڭ توننا كومىر جەتكىزىلگەن. بوساتىلۋ باعاسى قىمباتتاعان جوق. جەرگىلىكتى جەرلەردە دە كوپ وزگەرىس جوق سياقتى. تونناسى 16-18 مىڭ تەڭگەنىڭ اراسىندا. الايدا كەيبىر تۇرعىندار اۋىلدىق جەر ءۇشىن بۇل باعا قالتاعا اۋىر سوعاتىنىن ايتادى. قىستاي بەس توننا كومىر جاعاتىن بولسا, 80-90 مىڭ تەڭگە كەتەدى ەكەن. ال كوپشىلىكتىڭ ايلىق جالاقىسى كومىرگە جەتە بەرمەيدى.
– كومىردە بىلتىرعىداي پروبلەما بولعان جوق. قۇيعان ايلاعىنان بارىپ الدىق. تونناسى – 17 مىڭ تەڭگەدەن. باعاسىنا قاراي ساپاسى دا جاقسى بولسا عوي. كەيدە ساپالى كومىر تيەدى, كەيدە جەتىلمەگەنىن الىپ كەلەدى. جاقسىسىن تاڭداۋ ءۇشىن الۋشىلار تيەۋشىگە تيىن-تەبەنىن بەرىپ جاتادى. دەگەنمەن, قانداي كومىر كەلسە دە الامىز. قىس قاتتى, – دەيدى كۇرشىم اۋدانىنداعى العاباس اۋىلىنىڭ تۇرعىنى تالعات جەكسەمباەۆ.
جالپى, حالىققا جەتكىزىلەتىن كومىردەن بولەك, الەۋمەتتىك كومىر دە بوساتىلىپ جاتىر. وبلىستىق ەنەرگەتيكا جانە تۇكش باسقارماسىنىڭ تۇرعىن ءۇي-كوممۋنالدىق شارۋاشىلىق ءبولىمىنىڭ باسشىسى سامات سۇلەيمەنوۆتىڭ ايتۋىنشا, الەۋمەتتىك كومىردىڭ قۇنى 9 050 تەڭگەنى قۇرادى. بۇل باعامەن ۇوس ارداگەرلەرى, ۇوس-نا تەڭەستىرىلگەن ارداگەرلەر, I جانە II توپتاعى مۇگەدەكتەر, مۇگەدەك بالالارى بار جانە ولاردى تاربيەلەۋشى وتباسىلار, 29 جاسقا تولماعان جەتىم جانە اتا-اناسىنىڭ قامقورلىعىنسىز قالعان بالالار الا الادى. سونداي-اق كوپبالالى انالار دا الەۋمەتتىك كومىرمەن قامتىلۋدا.
شىعىس قازاقستان وبلىسى
