وقيعا • 20 قازان، 2020

اسكەري بايلانىسشىلار كاسىبي مەرەكەلەرىن اتاپ ءوتتى

13 رەت كورسەتىلدى

بۇگىن قازاقستان رەسپۋبليكاسى قارۋلى كۇشتەرىنىڭ اسكەري بايلانىسشىلارى كاسىبي مەرەكەلەرىن اتاپ وتۋدە، دەپ حابارلايدى Egemen.kz

راديوەلەكترونيكا جانە بايلانىس اسكەري-ينجەنەرلىك ينستيتۋتى ەلىمىزدەگى اسكەري بايلانىسشىلاردى دايىندايتىن جالعىز وقۋ ورنى. ول 2001 جىلى قۇرىلىپ، 2002 جىلدان باستاپ 5 جىلدىق باعدارلاما بويىنشا بايلانىسشى-كۋرسانتتاردى وقۋعا قابىلداي باستادى. اسكەري ينستيتۋت قابىرعاسىندا وفيتسەر-بايلانىسشى ماماندار "بايلانىستى ۇيىمداستىرۋ" جانە "بايلانىستىڭ اسكەري تەحنيكاسى" اتالاتىن ەكى كافەدرادا دايىندالادى. كافەدرا جانىندا زاماناۋي زەرتحانالىق بازا پايدالانۋعا بەرىلگەن. ينستيتۋت اۋماعىندا كۋرسانتتار پراكتيكالىق جانە تاكتيكالىق-ساپتىق ساباقتاردا ماماندىعى بويىنشا قارۋ-جاراق پەن اسكەري تەحنيكانى پايدالانا وتىرىپ، تاجىريبە جيناقتاۋ ءۇشىن وقۋ-جاتتىعۋعا ارنالعان ستاتسيونارلىق بايلانىس تورابى ورنالاستىرىلعان. 

رەجباي ءباسپاسوز قىزمەتىنىڭ مالىمەتىنە سايكەس، وقىتۋشىلاردىڭ كاسىبي-پەداگوگيكالىق دايىندىق دەڭگەيلەرى جوعارى، اسكەري بولىمدەردە ينجەنەرلىك-تەحنيكالىق لاۋازىمداردا اسكەري تاجىريبە جيناقتاعان. ولار بىلىكتىلىكتەرىن قر تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتىندە جانە سانكت-پەتەربۋرگ قالاسىنداعى س.بۋدەننىي اتىنداعى بايلانىس اكادەمياسىندا ارتتىرىپ وتىرادى.

وقىتۋ بارىسىندا زاماناۋي مۋلتيمەديالىق پروەكتورلار مەن جەكە كومپيۋتەرلەردە باعدارلامالىق وقىتۋ جۇرگىزىلەدى. اسكەري ينستيتۋتتاعى جاڭا ۇلگىدەگى تەحنولوگيالاردىڭ ارقاسىندا ءمۇندا جوعارى دارەجەلى اسكەري ماماندار دايىندالادى. وقۋدى بىتىرگەن سوڭ باكالاۆر اتاعى بەرىلىپ، اسكەرىمىزدە بار قارۋ-جاراق قۇرالدارىن ەركىن قولدانۋ قابىلەتىن مەڭگەرىپ شىعادى.

ۇجىمدىق قاۋىپسىزدىك كەلىسىمى ۇيىمىنىڭ اسكەري كادرلاردى بىرلەسىپ دايىنداۋ باعدارلاماسى بويىنشا بىلتىرعى جىلدان بەرى قىرعىزستان مەملەكەتىنىڭ وكىلدەرى دە "بايلانىستىڭ اسكەري تەحنيكاسى" ماماندىعى بويىنشا ءبىلىم الۋدا. راديوەلەكترونيكا جانە بايلانىس اسكەري-ينجەنەرلىك ينستيتۋتى قۇرىلعان 19 جىل ىشىندە 600 وفيتسەر-بايلانىسشى ءبىتىرىپ شىققان. بۇگىندە ولار ەلىمىزدىڭ قارۋلى كۇشتەرىندە جانە وزگە دە اسكەري قۇرىلىمدارىندا اسكەري بورىشتارىن ابىرويمەن اتقارىپ كەلەدى.

سوڭعى جاڭالىقتار

ەرتەڭ ۇكىمەت وتىرىسى وتەدى

ۇكىمەت • بۇگىن، 15:00

شاپپا شوت پەن «قۇيرىقتى» پىشاق

ايماقتار • بۇگىن، 08:32

جاڭاوزەندەگى جىلىجاي

ايماقتار • بۇگىن، 08:30

توي تويلاۋ توقتاماي تۇر

كوروناۆيرۋس • بۇگىن، 08:24

ۇقساس جاڭالىقتار