فورۋم حالىقارالىق تۇركى اكادەمياسى قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسى مەن يۋنەسكو جونىندەگى يران ۇلتتىق كوميسسياسىنىڭ قولداۋىمەن ونلاين رەجىمدە ءوتىپ جاتىر.
جيىندا ءسوز العان مەملەكەتتىك حاتشى قىرىمبەك كوشەرباەۆ بيىل تاۋەلسىز قازاقستان ءۇشىن ەرەكشە تاريحي جىل ەكەنىن ايتا كەلە جاھاندىق پاندەميا جاعدايى مەن الەمدىك ەكونوميكالىق داعدارىسقا قاراماستان ادامزات تاريحىندا وشپەس ءىز قالدىرعان ۇلى تۇلعالار ابايدىڭ 175 جىلدىعىن, ۇلى ويشىل, فيلوسوف ءابۋ-ناسىر ءال-ءفارابيدىڭ 1150 جىلدىعىن, ۇلى قونىس التىن وردانىڭ 750 جىلدىعى مەن بيىل تاۋەلسىز ەلدەر دوستاستىعىنىڭ مادەني استاناسى مارتەبەسىنە يە بولعان شىمكەنت قالاسىنىڭ 2200 جىلدىعىن اتاپ وتۋگە قولداۋ كورسەتكەن بارلىق حالىقارالىق ۇيىمدار مەن شەتەلدىك ارىپتەستەرگە ريزاشىلىعىن ءبىلدىردى.
"بۇل جوبالار ءبىزدىڭ ۇلى تۇلعالار الدىنداعى قارىزىمىز, وسكەلەڭ ۇرپاق الدىنداعى پارىزىمىز دەپ بىلەمىز. سونىڭ ىشىندە بيىلعى مەرەيتوي جىلىندا ءبىزدىڭ جەرلەسىمىز ءال-ءفارابيدىڭ مۇراسىن, ونىڭ الەمدىك وركەنيەتتەگى ورنىن ايقىنداۋ, ءال-ءفارابيدى ۇلتتىق برەند رەتىندە ىلگەرىلەتۋ بويىنشا ءبىرشاما جۇمىستار اتقارىلدى. جىل بويى ءال-ءفارابيدىڭ قوعامداعى عىلىمنىڭ ءرولى, ىزگىلىك, ەتيكالىق كەمەلدىك تۋرالى يدەيالارىنا نەگىزدەلە وتىرىپ, حالىقارالىق, رەسپۋبليكالىق جانە وڭىرلىك دەڭگەيلەردە قوعامدىق ساياسي الەۋمەتتىك ەكونوميكالىق, سالالىق, كاسىبي كەشەندى ءىس-شارالار جۇزەگە اسىرىلدى. اتاپ وتەر جايت فارابي بابامىزدىڭ پاراساتتى عۇمىرى بۇگىنگىدەي جاھاندانۋ زامانىندا جاس ۇرپاقتى باسەكەگە قابىلەتتى ەتىپ ءوسىرۋ جولىندا ۇلكەن ۇلگى, ونەگە", - دەدى ق.كوشەرباەۆ.
جيىنعا قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ, يران يسلام رەسپۋبليكاسىنىڭ عىلىم, زەرتتەۋلەر جانە تەحنولوگيا ءمينيسترى مانسۋر گولامي, قازاقستاننىڭ ءبىلىم جانە عىلىم ءمينيسترى اسحات ايماعامبەتوۆ, قازاقستاننىڭ مادەنيەت جانە سپورت ءمينيسترى اقتوتى رايىمقۇلوۆا, يسەسكو باس حاتشىسى ساليم ءال-ماليك, يسلام ىنتىماقتاستىعى ۇيىمى جانىنداعى عىلىم-تەحنولوگيا جونىندەگى تۇراقتى كوميتەتتىڭ (COMSTECH) ديرەكتورى مۇحاممەد يكبال چاۋداري, تۇركيا رەسپۋبليكاسى پرەزيدەنتىنىڭ باس كەڭەسشىسى يالچىن توپچۋ, جانە تاعى باسقا ىرگەلى حالىقارالىق ۇيىمداردىڭ جەتەكشىلەرى, ۇلتتىق كوميسسيالاردىڭ باسشىلارى, قوعام جانە مەملەكەت قايراتكەرلەرى, رەكتورلار, عىلىم اكادەميالارىنىڭ جەتەكشىلەرى, ديپلوماتتار, بەلگىلى فارابيتانۋشى عالىمدار قاتىسىپ جاتىر.
ايتا كەتەيىك, فورۋم الەمنىڭ التى تىلىندە ىلەسپە اۋدارمامەن اۋدارىلىپ, الەۋمەتتىك جەلىلەر ارقىلى تىكەلەي كورسەتىلۋدە.
