وتانىمىزدا دا, شەتەلدەردە دە الان بورىباەۆتى ەڭ بيىك دەڭگەيدەگى ماەسترو رەتىندە تانيدى. ونىڭ ديريجەر تۇعىرىنداعى وزگەشە ونەرى تورتكۇل دۇنيەنى الدەقاشان تاڭداي قاققىزىپ ۇلگەرگەن. ەندى مىنە, سوڭعى ەكى جىلدا جۇرتشىلىق تالقىسىنا جۇيەلى تۇردە ۇسىنىپ كەلە جاتقان الەمدىك مۋزىكالىق قاۋىمداستىق اراسىندا رەزونانس تۋدىراتىن بىرەگەي اۆتورلىق جوبالارى دا ديريجەردى جاڭا قىرىنان تانىتتى دەسەك, ارتىق ايتقاندىق ەمەس. ولاردىڭ ىشىندە قازاقستان, يتاليا جانە باسقا ەلدەردەن كەلگەن مىڭنان استام مۋزىكانتتاردىڭ ورىنداۋىنداعى گۋستاۆ مالەردىڭ №8 سيمفونياسى, كارل دجەنكينستىڭ SHINE ASTANA سالتاناتتى وداسى بار. جىلدىڭ باسىندا قويىلعان «يتاليادان كەلگەن حاتتار» وپەرالىق-سيمفونيالىق كونتسەرتى تىڭدارمانداردىڭ ىستىق ىقىلاسىنا بولەنىپ, جۇرەكتەرىنەن ورىن الدى. اسقاق ونەردىڭ جانكۇيەرلەرى ماەسترودان شىعارماشىلىق تارتۋلاردىڭ جالعاسىن اسىعا كۇتتى. قالىڭ تىڭدارماننىڭ تىلەگى ءھام قۋانىشىنا وراي, 17 جانە 18 قازان كۇندەرى «استانا وپەرا» ساحناسىندا وتكەن «مولەر, ۆولتەر جانە بومارشە نەمەسە فرانتسۋز كومەدياسىنىڭ نەگىزىن سالۋشىلار» اتتى تارتىمدى باعدارلاما سول ۇدەدەن تولىق شىقتى.
جوبانىڭ وزگەشەلىگى – كونتسەرتتە جان-باتيست مولەردىڭ «مەششانين ۆو دۆوريانستۆە» كومەدياسىنىڭ ەركىن وقىلۋىندا, ماەسترونىڭ ءوزى جاساعان مونولوگ نۇسقاسى ريحارد شتراۋستىڭ وسى كومەدياعا ارناپ جازعان مۋزىكاسىنان سيۋيتامەن بىرگە شىرقالدى. ءار جىلدارى اتالعان پەساداعى مۋزىكالىق جانە درامالىق باستاۋلاردى ۇيلەستىرۋ تۇجىرىمداماسىن ماەسترو ا.بورىباەۆ بالتيمور (اقش), دۋبلين (يرلانديا), ماينينگەندە (گەرمانيا) ۇسىنىپ, ونەرسۇيەر قاۋىمنىڭ زور قىزىعۋشىلىعىن تۋدىرعان بولاتىن.
مۋزىكالىق مونولوگتىڭ نەگىزگى قاھارمانى مولەردىڭ كەيىپكەرى جۋردەن مىرزا ەكەنىن اتاپ وتكەن ءجون, الان بورىباەۆ ونى كۇلكىلى, سۇيكىمدى, سويتە تۇرا اڭقىلداق ءارى پاڭ مىنەزدى ادام رەتىندە كورگەن. باس كەيىپكەردىڭ تۇلا بويى بالالىق بىلىمقۇمارلىق پەن بالاعا ءتان عاشىق بولعىشتىق قاسيەتتەرگە تولى. ماەسترو جۋردەننىڭ زيالى ورتالاردا تانىلۋعا دەگەن توقتامسىز قۇمارلىعىن كورسەتۋدەگى مولەردىڭ قولتاڭباسىن ساقتاپ قالعان. بارلىق وقيعا وسىنىڭ اينالاسىندا ءوربيدى. جۋردەن مىرزانى وركەستر مۋزىكانتى اسەت نەلدىباەۆ سومدادى.
مۋزىكالىق كەشتى فرانتسۋز كومەدياسىنىڭ التىن عاسىرىنىڭ كلاسسيكتەرى مولەر, ۆولتەر جانە بومارشەنىڭ ماتىندەرىنە جازىلعان شىعارمالار ۇسىنىلعان مازمۇندى باعدارلاما جالعاستىردى. سونىمەن قاتار تالعامپاز جۇرتشىلىق نازارىنا ۆولتەر, ل.بەرنستاين, پ.بومارشە, ۆ.موتسارت, مولەر, ر.شتراۋستىڭ ءومىرى مەن شىعارماشىلىعى تۋرالى وچەركتەر ۇسىنىلدى. ادەبي ارقاۋ كونتسەرتتىڭ مۋزىكالىق مازمۇنىن اسەمدىكپەن كومكەردى. «استانا وپەرا» ساحناسىندا العاش رەت كونتسەرتتىك باعدارلاما اياسىندا ۆ.موتسارتتىڭ «فيگارونىڭ ۇيلەنۋ تويى» وپەراسىنان ەكىنشى ءبولىمنىڭ فينالى ورىندالعانىن اتاپ ءوتۋ كەرەك.
كەشكە قازاقستاننىڭ ەڭبەك سىڭىرگەن قايراتكەرلەرى تالعات مۇساباەۆ, ايگۇل نيازوۆا, باشقۇرتستان رەسپۋبليكاسىنىڭ ەڭبەك سىڭىرگەن ءارتىسى ءالفيا كارىموۆا, «قۇرمەت» وردەنىنىڭ لاۋرەتى ايزادا قاپونوۆا, حالىقارالىق بايقاۋلاردىڭ لاۋرەاتتارى تالعات عالەەۆ, ەۆگەني چاينيكوۆ, گۇلجانات ساپاقوۆا, ەرجان سايىپوۆ, شىڭعىس راسىلحان, ەرۇلان كامەل جانە تاعى دا باسقا ونەر مايتالماندارى قاتىستى. كونتسەرتتىڭ رەجيسسەرى – ەرەنباق تويكەنوۆ.
