قازاق مەملەكەتتىگىنىڭ قالىپتاسۋىنا ولشەۋسىز ۇلەس قوسقان تاريحي تۇلعا بۇل ۇيدە ءومىرىنىڭ سوڭىنا دەيىن تۇرعان بولاتىن.
"رۋحاني جاڭعىرۋ" باعدارلاماسىنىڭ "تۋعان جەر" ارنايى جوباسىن جۇزەگە اسىرۋ اياسىندا ىسكە اسقان بۇل شارۋاعا ارقا توسىندەگى تەحنيكالىق ءبىلىمنىڭ قاراشاڭىراعى – ەلباسى قابىرعاسىندا ءبىلىم العان قاراعاندى مەملەكەتتىك تەحنيكالىق ۋنيۆەرسيتەتى باستاماشى بولدى.
ەسكەرتكىش تاقتانىڭ سالتاناتتى اشىلۋ راسىمىندە قاراعاندى قالاسىنىڭ اكىمى ەرماعامبەت بولەكپاەۆ قۇتتىقتاۋ ءسوز سويلەدى. ال قارمتۋ-دىڭ رەكتورى مارات يباتوۆ عۇلاما عالىمنىڭ 1955 جىلدان زەينەت دەمالىسىنا شىققانعا دەيىن قازىرگى قاراعاندى مەملەكەتتىك تەحنيكالىق ۋنيۆەرسيتەتىنىڭ جوعارى ماتەماتيكا كافەدراسىندا ەڭبەك ەتكەنىن اتاپ ءوتتى.
– كەلەسى جىلى ءالىمحان ابەۋ ۇلىنىڭ تۋعانىنا 130 جىل تولۋىنا وراي, ۋنيۆەرسيتەتىمىزدە مەموريالدىق تاقتا ورناتۋ, اتاۋلى اۋديتوريا اشۋ, حالىقارالىق عىلىمي كونفەرەنتسيا ۇيىمداستىرۋ, ستۋدەنتتەر اراسىنداعى ماتەماتيكالىق وليمپيادا وتكىزۋ سىندى ءىس-شارالاردى جوسپارلاپ وتىرمىز. سونىمەن قاتار, تومسك پوليتەحنيكالىق ۋنيۆەرسيتەتىندە دە ءالىمحان ەرمەكوۆكە ارنالعان مەموريالدىق تاقتا ورناتۋ جوسپاردا بار. ويتكەنى, ول كىسى 1923 جىلى اتالعان ۋنيۆەرسيتەتتى ءتامامداپ, تاۋ-كەن ينجەنەرى ديپلومىن جانە گەولوگيالىق بارلاۋشى ماماندىعىن العان, – دەدى ول.
سونداي-اق, ەسكەرتكىش تاقتانىڭ اشىلۋىندا, ءالىمحان ەرمەكوۆتىڭ شاكىرتى, تەحنيكا عىلىمدارىنىڭ كانديداتى, قارمتۋ-دىڭ دوتسەنتى يبادوللا ارىستان, ولكەتانۋشى, الاش تاريحىنىڭ زەرتتەۋشىسى تۇڭعىشباي مۇقانوۆ جانە باسقالار ءسوز سويلەپ, تاريحي تۇلعانىڭ قازاق مەملەكەتتىلىگىنىڭ قالىپتاسۋىنا سىڭىرگەن ەڭبەگىنە بۇگىنگى كۇن تۇرعىسىنان باعا بەردى.
سالتاناتتى ءراسىمنىڭ سوڭىندا ءالىمحان ەرمەكوۆتىڭ نەمەرەسى ولەگ ماعاۋيا ۇلى يگىلىكتى ىسكە باستاماشى بولعان, ۇلەس قوسقان بارشا زاماتتارعا اۋلەت اتىنان العىس ايتتى. سونىمەن بىرگە ول اتاقتى اتاسىنىڭ قاراعاندى قالاسىندا تۇرعان كەزەڭى تۋراسىندا مازمۇندى ەستەلىگىمەن ءبولىستى.
– اتام لەنيندىك ساياساتقا قارسى شىققانى ءۇشىن 58-باپتىڭ 8-تارماعى بويىنشا «حالىق جاۋى» رەتىندە ايىپتالدى. سوۆەت وكىمەتى وعان قاساقانا لەنين كوشەسىندەگى 58-ءشى ءۇيدىڭ 8-ءشى پاتەرىن بەردى. سونداعى تۇپكى ماقساتى كىمگە قارسى شىققانىن, قانداي باپ, قاي تارماقپەن سوتتالعانىن ەسىنەن ماڭگى شىعارماسىن دەگەن سۇرقيا ساياساتتى سەزدىرۋ ەدى. بىراق, بۇل مۇقاتۋ اتامدى مويىتا المادى. ول كىسى ءومىرىنىڭ سوڭىنا دەيىن ەڭسەسىن تىك ۇستاپ, ەلىنە ادال قىزمەت ەتتى, – دەپ تەبىرەندى ەرمەكوۆتىڭ نەمەرەسى.
ەسكە سالساق, قازىرگى ۋاقىتتا Maryadi education ءبىلىم بەرۋ كومپانياسىنا جەتەكشىلىك ەتەتىن ولەگ ماعاۋيا ۇلى وتباسىمەن ۇلىبريتانيادا تۇرىپ جاتىر.
