ءتۇرلى لوكداۋن ستسەناريلەرىن مودەلدەۋ, قىسقا جانە ۇزاقمەرزىمدى كەزەڭگە سايكەس داعدارىسقا قارسى ءتيىستى شارالاردى جوسپارلاۋ بويىنشا Whiteshield Partners كومپانياسىنىڭ يننوۆاتسيالىق ادىستەمەسى تالقىلاۋ تاقىرىبىنا ارقاۋ بولدى.
سەميناردى اشا وتىرىپ, استانا مەملەكەتتىك قىزمەت حابىنىڭ باسقارۋشى كوميتەت توراعاسى ءاليحان بايمەنوۆ: «پاندەميا جانە ودان كەيىنگى جاڭا كەزەڭ مەملەكەتتىك باسقارۋ ساپاسىنا جوعارى تالاپتار قويادى. ەلدەردىڭ پاندەميا سىناقتارىنا شۇعىل جاۋاپ قايتارۋ جانە قايتا قالپىنا كەلتىرۋ شارالارى بويىنشا نەعۇرلىم ءتيىمدى جولدار ىزدەستىرۋدە دە مەملەكەتتىك باسقارۋدىڭ بۇگىنگى شەشۋشى ءرولى ايقىن. مۇنىڭ باستى فاكتورى – ازاماتتاردىڭ سەنىمى. بۇل – ءھام الەۋمەتتىك قۇندىلىق, ءھام ءتيىمدى اكىمشىلىك كاپيتال», دەدى.
Whiteshield Partners سەرىكتەسى جانە ديرەكتورى ەنتوني و'سالليۆان ءوز سوزىندە داعدارىسقا قارسى ارەكەت ەتۋ قاجەتتىلىگىنە جانە بۇل ءتۇرلى يننوۆاتسيالاردى ينۆەستيتسيالاۋ ارقىلى عانا مۇمكىن ەكەندىگىنە نازار اۋداردى.
ءوز كەزەگىندە Whiteshield Partners كومپانياسىنىڭ جاھاندىق باسقارۋشى سەرىكتەسى ءارى تەڭ قۇرىلتايشىسى فادي فاررا داعدارىسقا قارسى بىرىڭعاي كەشەندى كوزقاراس قالىپتاستىرۋ ءۇشىن الدىڭعى شەپتەگى باستى ماماندار مەن شەشۋشى ساراپشىلار اراسىندا بىرلەسكەن وداق قۇرۋعا شاقىردى. «داعدارىسقا قارسى تۇرۋدا كىدىرۋگە بولمايدى, ويتكەنى بيۋروكراتياعا ورىن جوق» دەپ اتاپ ءوتتى ول.
سونىمەن قاتار سەمينارعا پولشانىڭ قارجى ەكس-ءمينيسترى, ەىدۇ جانە ەو-داعى بۇرىنعى ەلشىسى, قازىرگى Whiteshield Partners ديرەكتورى پاۆەل ۆويتسەحوۆسكي, بەلگىلى ەكونوميست, ەۋروپالىق قايتا قۇرۋ جانە دامۋ بانكىنىڭ 2015-2019 جىلدارداعى باس ەكونوميسى, پاريجدەگى ساياسي زەرتتەۋ ينستيتۋتىنىڭ ەكونوميكا پروفەسسورى سەرگەي گۋريەۆ, سونىمەن قاتار فرانتسۋز قوعامدىق دەنساۋلىق ساقتاۋ مەكتەبىنىڭ ەپيدەميولوگيا جانە بيوستاتيستيكا پروفەسسورى پاسكال كرەپي قاتىستى.
پ.ۆويتسەحوۆسكي پاندەميامەن كۇرەس اۋقىمىندا ءتۇرلى كەزەڭدەردى, ءۇش ولشەمدىك, الەۋمەتتىك-ەكونوميكالىق اسپەكتىلەردى قاراستىرۋدىڭ, ءبىرتۇتاس تاسىلدەمەنىڭ بولۋى ماڭىزدىلىعىنا توقتالدى. ول قايتا لوكداۋندى بولدىرماۋ ءۇشىن مودەلدەۋدىڭ ءداستۇرلى ەمەس ءتاسىلىن جانە مولەكۋلالىق دەڭگەيدە تەرەڭ تالداۋدى قولداناتىن وسى باعدارلامانى پايدالانۋدىڭ پايداسى تۋرالى ايتتى.
پروفەسسور س.گۋريەۆ پاندەميامەن كۇرەستە ادال جانە ءتيىمدى قىزمەت ەتەتىن, سول ارقىلى ازاماتتاردىڭ مەملەكەتكە سەنىمىن ارتتىراتىن, جۇمىسى مىعىم مەملەكەتتىك اپپارات شەشۋشى رولگە يە ەكەنىن جەتكىزدى. ول ۇكىمەتتەردىڭ قابىلداعان ناقتى شارالارىنا توقتالا وتىرىپ, كوپتەگەن ەۋرازيالىق ەلدەر سالىق رەفورماسى, جاڭا سالىقتاردى ەنگىزۋ, سالىقتاردى ءوسىرۋ تۋرالى ويلايتىنىن, بىراق قازىر جاڭا سالىق ەنگىزەتىن ۋاقىت ەمەستىگىن اتاپ ءوتتى.
«ارتىق اقشا تاپشى كەزدە ادامدارعا قولدارىنان كەلگەنشە اقشا تابۋعا مۇمكىندىك بەرۋ كەرەك. سوندىقتان بيزنەس ءۇشىن رەتتەۋشى توسقاۋىلداردى الىپ تاستاۋ ماڭىزدى», دەدى س.گۋريەۆ.
ۆەبينار اياسىندا سOVID-19-عا قارسى شۇعىل ارەكەت ەتۋگە باعىتتالعان يننوۆاتسيالىق «Navigator» باعدارلاماسى تانىستىرىلدى. بۇل قوسىمشا ەكونوميكالىق جانە ەپيدەميالىق مودەلدەرگە, الەۋمەتتىك-ەكونوميكالىق سالدارلاردى تالداۋعا جانە داعدارىس ستسەناريلەرىن جوسپارلاۋعا نەگىزدەلگەن. سونداي-اق عىلىم, يكەمدى باسقارۋ جانە الەۋەتتى ارتتىرۋ ارقىلى كۇندەلىكتى اسەر ەتەتىن «جىلدام ارەكەت ەتۋ توبى» ءتاسىلى ۇسىنىلدى.
