رەسپۋبليكالىق «Egemen Qazaqstan» گازەتىندە جاريالانعان نۇرسۇلتان نازارباەۆتىڭ «اباي اماناتى» ماقالاسى ابايدىڭ ۇلىلىعىن تانىتۋداعى تىڭ ءبىر سوقپاق بولعاندىعىن ايتار ەدىم. بۇل ورايدا, ەلباسىنىڭ « ۇلى اقىن, دانا ويشىل اباي ءحىح جانە حح عاسىرلار توعىسىنداعى اعارتۋشىلىق نەمەسە
ويانۋ ءداۋىرىنىڭ كوشباسشىسىنا, ەلدىڭ بولاشاق باعدارىن ايقىنداپ بەرگەن رۋحاني تەمىرقازىعىنا اينالدى», دەپ ۇلى دالانىڭ ويشىلى ابايعا تەرەڭىنەن باعا بەرەدى. ادامزات وركەنيەتى كەز كەلگەن حالىقتىڭ دانالارىن تاريح ساحناسىنا شىعارىپ كەلگەندىگى جانە شىعارا بەرەرى دە انىق. وسى ويدى ءبىز ەلباسىنىڭ «اباي اماناتى» ماقالاسىنان جان-جاقتى تاني تۇستىك.
تۇڭعىش پرەزيدەنتىمىز بۇگىنگى جانە كەلەر ۇرپاققا ابايدىڭ اماناتىن ساليقالى ويمەن جەتكىزەدى. بۇل ورايدا, اباي مۇراسىنداعى حالىقتىڭ مۇڭ-مۇقتاجى, ارمان-قيالى نۇرسۇلتان نازارباەۆتىڭ وي-مۇددەسىمەن ساباقتاسىپ جاتقاندىعىن اڭعارۋعا بولادى. ويتكەنى اباي ءوز جۇرتىنىڭ مۇددەسىن ويلاپ, حالقىن جاقسىلىققا جەتەلەسە, قازاقستاننىڭ تۇڭعىش پرەزيدەنتى, ەلباسى نۇرسۇلتان ءابىش ۇلى نازارباەۆ سول قالىڭ جۇرتىن تاۋەلسىزدىككە جەتكىزدى. قازاق ەلى تاۋەلسىزدىگىنىڭ از عانا جىلدارىندا قازاقستاندى الەم تانىعان مەملەكەتكە اينالدىردى. بۇل ورايدا, الەم قازاقستاندى ەڭ اۋەلى نازارباەۆتىڭ ەسىمىمەن جانە ىسىمەن تانىعاندىعىن ايتۋعا بولادى.
دانا اباي ەلىنىڭ بىرلىگىن اڭسادى. ەل-جۇرتىنىڭ ءبىلىم مەن عىلىمدى مەڭگەرۋىن قالادى. الايدا سول كەزدەگى ءداۋىر دۇرمەگى ابايدىڭ بۇل اڭسار مۇراتىنا جەتكىزبەدى. سول حالقى تاۋەلسىزدىكتىڭ ارقاسىندا ءبىلىمى مەن عىلىمى دامىعان مەملەكەتكە اينالعاندىعىن كوزىمىز كورىپ وتىر. «جاسىمدا عىلىم بار دەپ ەسكەرمەدىم, قولىمدى مەزگىلىنەن كەش سەرمەدىم» دەگەن اباي وكىنىشىنەن نۇرسۇلتان نازارباەۆ ءوزىنىڭ پرەزيدەنتتىك قىزمەتى كەزىندە ساباق الا ءبىلدى. قازاقستاننىڭ ءبىلىمى مەن عىلىمىن دامىتۋ ماسەلەسى ەلباسىنىڭ ايرىقشا نازارىندا بولدى. ەل تاۋەلسىزدىگىنىڭ الاس-كۇلەس كەزەڭدەرىنىڭ وزىندە تۇڭعىش پرەزيدەنتتىڭ باستاماسىمەن «بولاشاق» باعدارلاماسى اشىلىپ, قازاقتىڭ ۇل-قىزدارى الەمنىڭ ەڭ وزىق وقۋ ورىندارىندا ءبىلىم الۋ مۇمكىندىگىنە يە بولدى. بۇل كورەگەندىك ەدى. قازىر سول «بولاشاق» باعدارلاماسى بويىنشا شەت مەملەكەتتەردەن ءبىلىم الىپ كەلگەن جاستار تاۋەلسىز قازاقستاننىڭ ءار سالاسىندا ابىرويلى جانە جەمىستى ەڭبەك ەتىپ ءجۇر.
ەلباسى ءوز ماقالاسىندا ابايدىڭ ءومىرى مەن شىعارماسىن تۇتاس قامتيتىن «جيدەباي-ءبورىلى» مەملەكەتتىك تاريحي-مادەني جانە ادەبي مەموريالدىق قورى مۋزەيى قۇرىلعاندىعىن, اقشاڭقان كۇمبەزدى اباي-شاكارىم كەسەنەسى تۇرعىزىلعاندىعىن جازادى. بۇل ءسوز جوق تاۋەلسىزدىكتىڭ العاشقى جىلدارىنداعى ەكونوميكالىق قيىنشىلىقتارعا قاراماستان جۇزەگە اسىرىلعان ابايدىڭ ماڭگىلىك ەسكەرتكىشىنە اينالىپ, وسى كۇندەرى حالقىمىزدىڭ جانە شەتەلدەردەن كەلىپ جاتاتىن قوناقتاردىڭ كوڭىل قۋانىشتارىنا اينالدى. ءبىز سول ءۇشىن دە ەلباسىنا ريزاشىلىعىمىزدى بىلدىرەمىز.
تاۋەلسىز قازاقستان ۇرپاقتارى ءۇشىن ابايدىڭ جولى ەلىمىزدىڭ تۇڭعىش پرەزيدەنتى نۇرسۇلتان نازارباەۆتىڭ حاكىمدى ۇلىقتاۋ جولىمەن باستالعاندىعىن باسا ايتقىم كەلەدى. ەندى مىنە, سول ۇلى ابايدىڭ 175 جىلدىعى ەلىمىزدە كەڭىنەن اتالىپ وتىر. بۇل ورايدا, قازاقستان پرەزيدەنتى قاسىم-جومارت توقاەۆتىڭ دەم بەرۋىمەن اباي مۇرالارى قايتادان جاڭعىرىپ جاتىر. ويشىلى بار حالىقتىڭ ايبىنى بيىك! ابايى بار حالىقتىڭ مارتەبەسى جوعارى.
جابال ەرعاليەۆ,
جازۋشى, قازاقستاننىڭ ەڭبەك سىڭىرگەن قايراتكەرى, سەناتورلار كەڭەسىنىڭ مۇشەسى
كوكشەتاۋ
