نۇرسەيىت نيازبەكوۆ ەۋروپاعا قازاقى قالپىمەن دە تانىلعان ازامات
ەلباسىنىڭ سارابدال ساياساتىمەن ۋاقىت تالابىنا ساي ءبىلىم نارىمەن سۋسىنداۋعا تالپىنعان تالانتتى جاستارعا جارقىن جول اشقان «بولاشاق» مەملەكەتتىك باعدارلاماسى ومىرشەڭدىگىن كورسەتكەنى اقيقات. ناتيجەسىنىڭ نارلىلىگى ءھام ماۋەلىگى سول – وركەنيەتتى ەلدەرگە بارىپ, ساپالى ءبىلىم الۋمەن شەكتەلمەي, تورتكۇل دۇنيەدەگى ءجۇزدەن استام ۇلت وكىلدەرىنىڭ قۇددى ءسۇتىنىڭ بەتىنە شىققان قايماعىنداي ىرىكتەلىپ قاتارلارىنا قوسىلعان جاس ءوسكىندەردىڭ الدىڭعى شەبىندە قازاق بالالارىنىڭ جۇرگەنىن ەستىگەن جان قۋاناتىنى دا, سۇيسىنەتىنى دە راس.
نۇرسەيىت نيازبەكوۆ ەۋروپاعا قازاقى قالپىمەن دە تانىلعان ازامات
ەلباسىنىڭ سارابدال ساياساتىمەن ۋاقىت تالابىنا ساي ءبىلىم نارىمەن سۋسىنداۋعا تالپىنعان تالانتتى جاستارعا جارقىن جول اشقان «بولاشاق» مەملەكەتتىك باعدارلاماسى ومىرشەڭدىگىن كورسەتكەنى اقيقات. ناتيجەسىنىڭ نارلىلىگى ءھام ماۋەلىگى سول – وركەنيەتتى ەلدەرگە بارىپ, ساپالى ءبىلىم الۋمەن شەكتەلمەي, تورتكۇل دۇنيەدەگى ءجۇزدەن استام ۇلت وكىلدەرىنىڭ قۇددى ءسۇتىنىڭ بەتىنە شىققان قايماعىنداي ىرىكتەلىپ قاتارلارىنا قوسىلعان جاس ءوسكىندەردىڭ الدىڭعى شەبىندە قازاق بالالارىنىڭ جۇرگەنىن ەستىگەن جان قۋاناتىنى دا, سۇيسىنەتىنى دە راس.
وسى لەكتە الماتى وبلىسى قاراتال اۋدانىنان شىققان نۇرسەيىت نيازبەكوۆتىڭ دە قادامى قۇتتى بولدى. قۇتتى دەيتىنىمىز, ول ۇشتوبەدەگى ورتا مەكتەپ قابىرعاسىنان شىققان سوڭ, انگليانىڭ وكسفورد ۋنيۆەرسيتەتىنىڭ ساياساتتانۋ جانە حالىقارالىق قاتىناستار فاكۋلتەتىنە 2007 جىلى وقۋعا ءتۇسىپ, ايدى اسپاننان ءبىر-اق شىعارعانىنا كۇللى ايماق قۋانا شاتتاندى. قازاقتىڭ اسىل ازاماتى, وزىندىك ۇستانىمى بار, قايىسپاس قايسارلىعىن, كوزدەگەن ماقساتىنا جەتپەي توقتالمايتىندىعىن دالەلدەپ, اتالعان وقۋ ورنىن 2010 جىلى ءتامامدادى.
ءاسىلى, ءبىلىم الۋ ينەمەن قۇدىق قازعانداي, دەپ قازاق بەكەر ايتپاعان. وسىناۋ قازاقى دانالىققا سول قازاقتىڭ ۇلى دانىشپانى, ويشىل اقىنى ابايدىڭ «تالاپ, ەڭبەك, تەرەڭ وي, قاناعات, راقىم ويلاپ قوي. بەس اسىل ءىس كونسەڭىز» دەگەن كورەگەندىگىنە كوڭىل تۇكپىرىنەن ورىن بەرگەن نۇرسەيىت ماكەت ۇلى 004-2005 جىلدارى وكسفورد ۋنيۆەرسيتەتىنىڭ الەۋمەتتانۋ فاكۋلتەتىنىڭ الەۋمەتتانۋ ماگيسترى ماماندىعىن وقىپ العانى تاعى بار. ال 2000-2004 جىلدارى قازاقستان مەنەدجمەنت, ەكونوميكا جانە بولجاۋ ينستيتۋتىنىڭ ساياساتتانۋ جانە حالىقارالىق قاتىناستار باكالاۆرى ماماندىعىن مەڭگەردى. بىلە بىلسەك, بۇل تالدىقورعان وڭىرىنەن شىققان قازاقتىڭ قاراپايىم بالاسىنىڭ بىلىمگە دەگەن قۇشتارلىعىن اڭعارتارى انىق.
ەندى ءبىزدىڭ كەيىپكەرىمىزدىڭ ەڭبەك جولىنا كوز جۇگىرتسەك, 2013 جىلدىڭ قىركۇيەك ايىنان بەرى ت.رىسقۇلوۆ اتىنداعى قازاق ەكونوميكالىق ۋنيۆەرسيتەتى, حالىقارالىق ءبىلىم بەرۋ باعدارلاماسى, الەۋمەتتىك-ەكونوميكالىق ءتارتىپ كافەدراسىنا قىزمەتكە تۇرادى. اتالعان وقۋ ورنىنىڭ تالابىنا وراي, ستۋدەنتتەردى مەنەدجمەنت ماماندىعى بويىنشا ەدۆايزەرلىككە دايىنداۋ سەكىلدى ۋاقىت سۇرانىسىن مۇلتىكسىز اتقارادى. «ومىرلىك ءىستى بىلسەم, بىلگەن ۇستىنە بىلە تۇسسەم جانە وركەنيەتتى ەلدەردەگىدەي تەك ءوزىم عانا بىلۋمەن شەكتەلمەي, سول بىلگەنىمدى شاپاعات نۇرىنداي اينالاما شاشا جۇرسەم», دەگەندى ۇستانىمىنا اينالدىرعانى وي ولشەمىنىڭ بيىكتىگىن كورسەتەدى.
ەرەكشە ايتا كەتەر ءبىر جايت, نۇرسەيىت نيازبەكوۆ «بولاشاق» مەملەكەتتىك باعدارلاماسى بويىنشا, انگليادا وقىپ كەلگەن سوڭ, جوعارى ءبىلىم بەرۋ ۇيىمىنىڭ جولداماسىمەن 2006 جىلى مامىر ايىندا قازاق مەنەدجمەنت, ەكونوميكا جانە بولجاۋ ينستيتۋتىنا الەۋمەتتانۋ, حالىقارالىق قاتىناستار جانە عىلىمي-زەرتتەۋ ادىسكەرى ماماندىعى بويىنشا وقىتۋشى بولىپ قىزمەتكە ورنالاسىپ, سول لاۋازىمدى بۇگىنگى كۇنگە دەيىن جوعارى دەڭگەيدە اتقارىپ كەلەدى.
قازاق-بريتان تەحنيكالىق ۋنيۆەرسيتەتى, حالىقارالىق ەكونوميكا مەكتەبىندە دە ساياساتتانۋ جانە الەۋمەتتانۋ مۇعالىمى قىزمەتىنە دە جوعارىدا اتالعان جوعارى وقۋ ورنىنىڭ جولداماسىمەن ورنالاسىپ, قوسىمشا قىزمەت اتقارۋدا. البەتتە, بۇل – نۇرسەيىت نيازبەكوۆكە ارتىلعان سەنىم. سول سەنىمگە سەلكەۋ تۇسىرمەۋدى ول ءوزىنىڭ ازاماتتىق پارىزى سانايدى.
2008 جىلدىڭ قىركۇيەك ايى مەن 2009 جىلدىڭ اقپان ايى ارالىعىندا ءال-فارابي اتىنداعى قازاق ۇلتتىق ۋنيۆەرسيتەتىندە ساياساتتانۋ جانە حالىقارالىق قاتىناستار مۇعالىمى بولىپ ءدارىس بەرگەنى بار. سونداي-اق, ەريست ەند يانگ قازاقستان ۇيىمىندا ماركەتينگ بويىنشا مەنەدجەر اسسيستەنتى بولىپ 2005-2006 جىلدارى جۇمىس ىستەدى. كاسىبي ءبىلىم بەرۋ بويىنشا حايفاب اب (HIFAB AB), «قازاقستانداعى ورتا جانە شاعىن بيزنەستى دامىتۋعا بايلانىستى ترەنينگ پەن كاسىبي ءبىلىم بەرۋ» جوباسىن جاسادى.
«بولاشاق» باعدارلاماسىنىڭ ءبىر تۇلەگى نۇرسەيىت نيازبەكوۆتىڭ ىزدەنىمپازدىعى تەك قانا وقۋمەن شەكتەلمەي, شەتەلدە العان ءبىلىمىن ءوز ەلىمىزدە تاجىريبەدەن وتكىزۋ ارقىلى بيىك بەلەستەرگە بەت العاندىعىن دايەكتەيدى.
نۇرسەيىت نيازبەكوۆ قازاق, ورىس, اعىلشىن تىلدەرىن – وقۋ, سويلەۋ, جازۋ ارنايى لەكسيكا سىناقتارى بويىنشا تەك «5» دەگەن باعا يەگەرى. تۇرىك تىلىنەن دە حابارى مول. بۇل ەكىنىڭ بىرىنە بۇيىرماعان باقىت دەسەك تە ارتىق ەمەس. نۇرسەيىت ءماكەت ۇلىنىڭ Microsoft Office, Outlook Express, Mozilla Firefox, Adobe Photoshop, Corel DRAW اتتى كومپيۋتەرلىك باعدارلامالاردى دا جەتىك مەڭگەرگەنىن باسا ايتقان ءلازىم. راس, بۇل بالەندەي جاڭالىق ەمەس, بىراق لەيتەنانت شەنىندەگى وفيتسەر نۇرسەيىت نيازبەكوۆتىڭ تاعى ءبىر قىرى ەدى.
«نيازبەكوۆكە وكسفورد ۋنيۆەرسيتەتىندە الەۋمەتتانۋ سالاسىنىڭ ماگيستراتۋرا باعدارلاماسى بويىنشا وقىپ جۇرگەن كەزىندە عىلىمي جەتەكشى بولدىم. مەن ودان ۇلكەن ءۇمىت كۇتتىم. ول سالماقتى جانە بەلسەندى ستۋدەنت بولدى. اسىرەسە, قازاقستاننىڭ كەڭەستىك ءداۋىر كەزەڭىندەگى سايلاۋشىلار ارەكەتى تۋرالى ديسسەرتاتسيا جازعانى مەنى تاڭعالدىردى. ول جان-جاقتى زەرتتەۋ جۇرگىزە وتىرىپ, ءوزىنىڭ كۇن ءتارتىبىن قاتاڭ ساقتادى. مەنىڭشە, نۇرسەيىت وكسفورد ۋنيۆەرسيتەتىندە وتكىزگەن جىلىن جوعارى دەڭگەيدە پايدالانا ءبىلدى. ول وتە اقىلدى, ىسكەر جانە جۇمىستى شىعارماشىلىق پەن سالماقتى مەڭگەرە بىلەدى. ونىڭ سىرتىندا, نۇرسەيىت ماكەت ۇلى ادامدارمەن تەز ءتىل تابىسا الادى. قانداي قىزمەتتى بولسا دا كاسىبي تۇرعىدا ءمىنسىز ءارى ءوز وتانىنا ادال اتقاراتىنىنا مەن سەنىمدىمىن», – دەيدى وكسفورد ۋنيۆەرسيتەتى الەۋمەتتانۋ فاكۋلتەتىنىڭ دەكانى كولين ميلس.
قورىتا ايتقاندا, «بولاشاق» مەملەكەتتىك باعدارلاماسىنىڭ ءبىر تۇلەگىنىڭ جەتكەن جەتىستىگى وسىنداي. ولاردى وتانىمىزدىڭ اقىل-وي بايلىعى دەپ باعالاعان ءجون.
نۇربول الدىباەۆ,
«ەگەمەن قازاقستان».
الماتى وبلىسى.
