كەشە ۇلتتىق اكادەميالىق كىتاپحانادا «سامۇرىق-قازىنا» اق-تىڭ جانىنداعى «ەكسپەرت» كلۋبى «كەدەن وداعى: قولداۋ جانە قارسى بولۋ» تاقىرىبىندا كەزەكتى پىكىر الماسۋ شاراسىن وتكىزدى.
كەشە ۇلتتىق اكادەميالىق كىتاپحانادا «سامۇرىق-قازىنا» اق-تىڭ جانىنداعى «ەكسپەرت» كلۋبى «كەدەن وداعى: قولداۋ جانە قارسى بولۋ» تاقىرىبىندا كەزەكتى پىكىر الماسۋ شاراسىن وتكىزدى.
شاراعا ەلىمىزدىڭ قارجى مينيسترلىگىنىڭ بىرقاتار ساراپشى ماماندارى مەن كاسىپكەرلەردىڭ ۇلتتىق پالاتاسىنىڭ, سونداي-اق بيزنەسمەندەر مەن بۇقارالىق اقپارات قۇرالدارىنىڭ وكىلدەرى قاتىستى. وكىنىشكە وراي, پىكىرتالاس الاڭىنا شاقىرىلعان ساراپشىلار مەن دەپۋتاتتاردىڭ جانە كاسىپكەرلەردىڭ بىرنەشەۋى كەلە الماي قالىپتى. مۇنى كلۋبتىڭ جەتەكشىسى ءارى وسى شارانىڭ مودەراتورى نۇرلان ەرىمبەتوۆ ايتتى.
– بىزگە كەدەن وداعى كەرەك پە؟ ول كىم ءۇشىن پايدالى؟ وندىرۋشىلەرگە ءتيىمدى مە, جوق الدە تۇتىنۋشىلارعا پايدالى ما؟ شەنەۋنىكتەر كەدەن وداعى شەڭبەرىندە قاراپايىم تۇتىنۋشىلاردىڭ مۇددەسىن دۇرىس قورعاي الىپ ءجۇر مە؟ كەدەن وداعىنىڭ قىزمەتىن نەعۇرلىم ءتيىمدى ەتۋ, ەلىمىزدىڭ ەكونوميكالىق مۇددەلەرىن بەلسەندى تۇردە قورعاۋ ءۇشىن نە ىستەۋ كەرەك؟ وسى جانە تاعى باسقا سۇراقتارعا بۇگىن مۇمكىندىگىنشە تولىققاندى جاۋاپ ىزدەيمىز, – دەدى جۇرگىزۋشى.
پىكىرتالاستىڭ ءبىرىنشى ءبولىمى كەدەن وداعى تۋرالى وي جارىسىنا ارنالدى دەۋگە بولادى. كەلگەن ماماندار مەن بيزنەس وكىلدەرىنىڭ بارلىعى دەرلىك كەدەن وداعىنىڭ ەل ەكونوميكاسى مەن ءونىم وندىرۋشىلەرىنە ءتيىمدى تۇستارىن ايتىپ شىقتى. دەسە دە, كاسىپكەرلەردىڭ ۇلتتىق پالاتاسىنىڭ ەكونوميكالىق ينتەگراتسيالار دەپارتامەنتى ديرەكتورىنىڭ ورىنباسارى ۆلاديمير پاك قازاقستاندىق كاسىپكەرلەرگە رەسەي رىنوگىندا ءالى دە كەيبىر كەدەرگىلەردىڭ كەزدەسىپ قالىپ جۇرگەنىن ايتىپ قالدى. ايتكەنمەن, كەدەن وداعى ارقىلى ءونىم شىعارۋشىلاردىڭ ىرگەسى كۇن ساناپ كەڭەيىپ كەلە جاتقانىن تىلگە تيەك ەتتى. ال, قازاقستاننىڭ ەت-ءسۇت وداعى باسقارماسىنىڭ توراعاسى يۆان ساۋەر كەدەن وداعىنىڭ كاسىپكەرلەرگە ءتيىمدى كوپتەگەن تۇستارىن اتاپ ءوتتى. «قازاق ەلىنىڭ بيدايىمەن رەسەيدىڭ دە, بەلارۋستىڭ دە استىق ءدانى باسەكەلەسە المايدى. ونى كوزىمىز كورىپ ءجۇر. ءتىپتى ونى دالەلدەپ جاتۋدىڭ ءوزى ارتىق. ەت ونىمىنە كەلسەك, مەملەكەت باسشىسى نۇرسۇلتان نازارباەۆ نەگە قايتا-قايتا ەت ءونىمىن ەكسپورتتاۋ ماسەلەسىن كوتەرە بەرەدى؟ سەبەبى, قازاق جەرىندە وسكەن مالدىڭ ەتى ءدامدى ءارى قۇنارلى. سوندىقتان ونى قولىنان ءىس كەلەتىن كەز كەلگەن كاسىپكەر قىسىلماي ۇلكەن رىنوكقا شىعارىپ, پۇلداۋىنا بولادى. ءبىزدىڭ كاسىپكەرلەردىڭ ازىرشە بۇعان موينى جار بەرمەي تۇرعانى وكىنىشتى», دەدى وداق توراعاسى.
بۇقارالىق اقپارات قۇرالدارى وكىلدەرىنىڭ اراسىنان كاسىپكەرلەرگە كەدەن وداعى مەن دۇنيەجۇزىلىك ساۋدا ۇيىمىنىڭ قايسىسى قولايلى ەكەندىگى تۋرالى دا سۇراق قويىلدى. «وداق اياسىندا باسەكەلەستىككە مۇمكىندىگىنشە تەزىرەك ۇيرەنىپ الساق, دۇنيەجۇزىلىك ساۋدا ۇيىمىنا سولعۇرلىم جىلدامىراق قوسىلعانىمىز ءتيىمدى عوي», دەدى يۆان اداموۆيچ. ونىڭ پىكىرىنە قۇلاق اسساق, قازاقستان كاسىپكەرلەرى 20 جىلدان استام ۋاقىتتان بەرى باسەكەسىز تىرشىلىك جاساپ, ابدەن «ەركەلىككە» بوي الدىرعان. ايتپەسە, جاقسىلاپ سىلكىنىپ, ىسكە كىرىسسە, كەدەن وداعىنىڭ دا, دۇنيەجۇزىلىك ساۋدا ۇيىمىنىڭ دا تالاپ ۇدەسىنەن ەركىن شىعۋىنا قابىلەتى دە, مۇمكىندىگى دە جەتەدى ەكەن.
وكىنىشتىسى, ارنايى شاقىرىلعان مامانداردىڭ كوپشىلىگى كەلمەي قالىپ, شارادا كوتەرىلگەن ءبىرتالاي سۇراقتار جاۋاپسىز قالدى. «ولاردى قايتا كوتەرىپ تولىقتىرۋ الداعى كۇننىڭ ەنشىسىندە», دەدى مودەراتور.
نۇرباي ەلمۇراتوۆ,
«ەگەمەن قازاقستان».
