استانادا British Council جانە قازاقستانداعى «شەلل» كومپانياسىنىڭ ۇيىمداستىرۋىمەن «فيلارمونيا» وركەسترىنىڭ كونتسەرتى ءوتتى.
استانادا British Council جانە قازاقستانداعى «شەلل» كومپانياسىنىڭ ۇيىمداستىرۋىمەن «فيلارمونيا» وركەسترىنىڭ كونتسەرتى ءوتتى.
بۇل كەش قازاقستان مەن ۇلىبريتانيا اراسىنداعى مادەني بايلانىستاردى نىعايتۋ بويىنشا ءىس-شارالار توپتاماسىنداعى العاشقى شارالاردىڭ ءبىرى بولىپ تابىلادى.
كونتسەرت باسىندا ءسوز العان قازاقستانداعى British Council ديرەكتورى سايمون ۋيليامس: «ءبىز ونەر سالاسىنداعى ىنتىماقتاستىق قازاقستان مەن ۇلىبريتانيا اراسىنداعى مادەني بايلانىستاردى نىعايتۋعا, سونداي-اق, قازاقستانداعى مادەني سالانىڭ الەۋەتىن ارتتىرۋعا كومەكتەسەتىنىنە بەك سەنەمىز», دەپ بارلىق سەرىكتەستەرىنە العىسىن ءبىلدىردى.
اتى اڭىزعا اينالعان وركەستر باعدارلاما بويىنشا ەكى مۋزىكالىق تۋىندىنى تارتۋ ەتتى. العاشقى بولىمدە يگور ستراۆينسكيدىڭ «ساربازدىڭ وقيعاسى» اسپاپتىق سيۋيتاسىن ورىنداسا, شىعارمانى قازاقستاندىق اكتەر فيليپ ۆولوشين ەش ءمۇدىرمەستەن اسقان شەبەرلىكپەن وقىپ بەردى. ال, ەكىنشى بولىمدە اتاقتى بريتاندىق ءانشى كەترين ءحارريستىڭ قاتىسۋىمەن ۋيليام ۋولتوننىڭ «فاساد» اتتى شىعارماسى ورىندالدى. كەش بۇكىل الەم مويىنداعان ديريجەر روبين ءو'نيلدىڭ جەتەكشىلىگىمەن ءوتتى.
«فيلارمونيا» وركەسترى ۇلىبريتانيانىڭ ۇلتتىق وركەسترى بولىپ سانالادى. بۇل وركەستر تۋىندىنى ورىنداۋ ساپاسىمەن, مۋزىكا سالاسىنداعى ەڭ سوڭعى تەحنولوگيالاردى پايدالانۋىمەن ەرەكشەلەنەدى. جاھانعا ەسىمدەرى ايگىلى مۋزىكانتتارىمەن, ونىڭ ىشىندە وركەستردىڭ شىعارماشىلىق جەتەكشىسى بولىپ تابىلاتىن ديريجەر ەسا-پەككا سالونەنمەن ىنتىماقتاستىق جاساۋىنىڭ ارقاسىندا «فيلارمونيا» وركەسترى بريتانيا ساز الەمىنىڭ ورداسىنا اينالىپ وتىر. قازاقستان مەن ۇلىبريتانيانىڭ ونەر ساڭلاقتارى قاتىساتىن مادەني شارالار كەلەسى جىلى دا جالعاسىن تاباتىن بولادى.
نۇرزادا كۇمىسبەك,
ەۋرازيا ۇلتتىق ۋنيۆەرسيتەتىنىڭ ستۋدەنتى.
