جەر ءجانناتى جەتىسۋ وڭىرىنەن تۇركى الەمىنىڭ بەسىگى تۇركىستان شاھارىنا جەتكەن ء«بىزدىڭ بەيسەن» بارلىق كىتاپحانا تورىنەن ورىن الماق. جاڭا كىتاپتى وقىرماندار رۋحاني وردادان الىپ, وقي الادى.
ەلباسى نۇرسۇلتان نازارباەۆ پەن پرەزيدەنت قاسىم-جومارت توقاەۆتىڭ كوڭىل ايتۋىنان باستالعان جيناقتا تانىمال ەل اعالارىنىڭ ەستەلىگى, زامانداستارىنىڭ تولعانىستارى, اقىنداردىڭ ارناۋ جىرلارى, قاراپايىپ كورەرمەندەردىڭ ىستىق ىقىلاسى مەن ساعىنىشى توپتاستىرىلعان.
قاراپايىمدىلىعىمەن قالىڭ قازاقتىڭ ەسىندە قالعان قوعام قايراتكەرىنە ارنالعان تۋىندىنىڭ تۇساۋكەسەرى دارا تۇلعانىڭ تۇركىستان وبلىسىنداعى ارىپتەس, دوس, زامانداستارىنىڭ باسىن قوستى. حالقىنىڭ جانىنا جالاۋ بولعان بەيسەننىڭ بولمىسىن تانىتاتىن وقيعالاردى ەسكە الىپ, اسەرلى ەستەلىكتەردىڭ تيەگىن اعىتتى. احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ عىلىمي كىتاپحاناسىندا وتكەن رۋحاني جيىنعا ۋنيۆەرسيتەتتىڭ جۋرناليستيكا كافەدراسىنىڭ بەلسەندى جاستارى قاتىستى.
ەركىن فورماتتا وتكەن كەزدەسۋدە ءسوز العان بەيسەن قۇرانبەكتىڭ كۋرستاسى, جۋرناليستەر وداعىنىڭ تۇركىستان وبلىستىق فيليالىنىڭ توراعاسى عالىمجان ەلشىباي ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ جۋرناليستيكا كافەدراسىنىڭ ستۋدەنتتەرىنە بەيسەن قۇرانبەك اتىنداعى 3 ستيپەنديا تاعايىندالاتىنىن جەتكىزدى.
كەزدەسۋ سوڭىندا ء«بىزدىڭ بەيسەن» ەستەلىك كىتابى ۋنيۆەرسيتەت كىتاپحاناسىنا جانە جۋرناليستيكا كافەدراسىنا سىيعا بەرىلدى. جيناق قازاق ەلىنىڭ ءبىرتۋار پەرزەنتى, تەلەجۋرناليستيكا تارلانى – بەيسەن اباي ۇلى قۇرانبەكتى قۇرمەتپەن ەسكە الۋشى قالىڭ كوپشىلىككە ارنالعان.
