تاراپتار قاتىناستاردىڭ جاڭا كەزەڭىندە, ونىڭ ىشىندە قازاقستان مەن ەۋروپالىق وداق جانە وعان مۇشە مەملەكەتتەر اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىم شەڭبەرىندە سەرىكتەستىكتى ودان ءارى ارتتىرۋعا جانە كەڭەيتۋگە ءوزارا دايىندىعىن ءبىلدىردى.
ءسىم باسشىلارى بۇۇ مەن ەقىۇ شەڭبەرىندەگى ەكىجاقتى جانە كوپجاقتى ترەكتەردەگى ساياسي ديالوگتى جانە ساۋدا-ەكونوميكالىق ىنتىماقتاستىقتى نىعايتۋ جولدارىن ەگجەي-تەگجەيلى تالقىلادى. سۇحباتتىسۋشىلار ەكونوميكالىق جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسيانىڭ (ۇاك) بەلسەندى جۇمىسىن, ەكى مەملەكەت اراسىندا ىسكەرلىك كەڭەس قۇرۋ جانە بيزنەس-دەلەگاتسيالارمەن الماسۋ يدەياسىن قولداي وتىرىپ, وسىنداي ءوزارا ءىس-قيمىلدىڭ زور جانە ءالى تولىق ىسكە اسىرىلماعان الەۋەتىنىڭ بار ەكەنىن اتاپ ءوتتى. سونىمەن قاتار, تاراپتار KazAID جانە SlovakAID دامىتۋعا كومەك اگەنتتىكتەرى اراسىنداعى ىنتىماقتاستىقتىڭ كەلەشەگىن بەلگىلەدى.
قورعانىس ءمينيسترى يا. نادپەن كەزدەسۋدە تاراپتار ءتيىستى ۇكىمەتارالىق كەلىسىم قۇقىقتىق نەگىزدى قامتاماسىز ەتەتىن اسكەري جانە اسكەري-تەحنيكالىق ىنتىماقتاستىقتى تالقىلادى. قازاقستاندىق بىتىمگەرلەردى دايارلاۋ سالاسىندا تاجىريبە الماسۋ, ولاردىڭ بۇۇ اياسىندا بىتىمگەرشىلىك وپەراتسيالارىنا قاتىسۋىن كەڭەيتۋ ماسەلەلەرى قارالدى. سونداي- اق, قورعانىس ۆەدومستۆولارى مەن كومپانيالاردىڭ باسشىلارىنا قارۋ-جاراق پەن اسكەري تەحنيكانىڭ ەكى مامانداندىرىلعان كورمەسىنە – IDEB 2021 جانە KADEX 2021 قاتىسۋعا ءوزارا شاقىرۋ ايتىلدى, ولار تيىسىنشە كەلەسى جىلدىڭ ناۋرىز جانە ماۋسىمىندا براتيسلاۆا مەن نۇر-سۇلتاندا ءوتۋى ءتيىس.
سونىمەن قاتار, مينيستر م. تىلەۋبەردى سلوۆاكيانىڭ ءىرى كومپانيالارىنىڭ باسشىلارىمەن كەزدەستى, ونىڭ بارىسىندا بيزنەسمەندەر قازاقستاننىڭ ينۆەستيتسيالىق مۇمكىندىكتەرىمەن تانىستى. بۇگىنگى تاڭدا قازاقستاندىق نارىقتا سلوۆاك كاپيتالىنىڭ قاتىسۋىمەن 40-تان استام كاسىپورىن جۇمىس ىستەيدى, بۇل ەكى ەلدىڭ ىسكەر توپتارىنىڭ ءوزارا قىزىعۋشىلىعىنىڭ ماڭىزدى ينديكاتورى بولىپ تابىلادى.
ەكونوميكالىق ءوزارا ءىس-قيمىلدىڭ پەرسپەكتيۆتى باعىتتارى رەتىندە ماشينا جاساۋ, قورعانىس يندۋسترياسى, ينجينيرينگ جانە ينفراقۇرىلىمدىق دامۋ, اگروونەركاسىپتىك كەشەن, فارماتسەۆتيكا, وزىق تسيفرلىق تەحنولوگيالار جانە ولاردى يندۋستريا 4.0 قۇرۋ پروتسەسىندە ەنگىزۋ بەلگىلەندى.
ساپار بارىسىندا شارتتىق-قۇقىقتىق بازانى جەتىلدىرۋ جانە ۇاك شەشىمدەرىن ىسكە اسىرۋ شەڭبەرىندە ءتيىستى ۆەدومستۆولاردىڭ ىنتىماقتاستىعى تۋرالى بىرقاتار مەموراندۋمدارعا قول قويىلدى. اتاپ ايتقاندا, تاراپتار سۋ جانە ورمان شارۋاشىلىعى سالاسىندا, سونداي-اق تۋريزم سالاسىندا ءوزارا ءتيىمدى نەگىزدە ىنتىماقتاساتىن بولادى.
قازاقستاندىق سىرتقى ساياسي ۆەدومستۆو باسشىسىنىڭ براتيسلاۆاعا ساپارى ساۋدا-ەكونوميكالىق ىنتىماقتاستىقتى دامىتۋدىڭ جانە ساياسي ديالوگتى نىعايتۋدىڭ جاڭا جولدارىن بىرلەسىپ ىزدەۋگە مۇمكىندىك بەرىپ, ەكى ەل اراسىنداعى ارىپتەستىكتىڭ جاڭا كەزەڭىنىڭ باستالۋىن ءبىلدىردى.
ەكى كۇن بويى وتكەن «Globsec» فورۋمى اياسىندا قازاقستاننىڭ سىرتقى ساياسي ۆەدومستۆوسىنىڭ باسشىسى بولگاريا پرەمەر-ءمينيسترىنىڭ ورىنباسارى جانە سىرتقى ىستەر ءمينيسترى ەكاتەرينا زاحاريەۆامەن, تۇركيانىڭ سىرتقى ىستەر ءمينيسترى مەۆليۋت چاۆۋشوگلۋمەن جانە ۋكراينانىڭ سىرتقى ىستەر ءمينيسترىنىڭ ءبىرىنشى ورىنباسارى ەمينە دجاپاروۆامەن كەلىسسوزدەر جۇرگىزدى. سونداي-اق, مينيستر م. تىلەۋبەردى بۇۇ ليۆان جونىندەگى ارنايى ۇيلەستىرۋشىسى يان كۋبيشپەن كەزدەسىپ, قر پرەزيدەنتى ق.توقاەۆتىڭ بۇۇ باس اسسامبلەياسىنىڭ 75-ءشى سەسسياسىندا جاريالاعان باستامالارىن تالقىلادى.
مازمۇندى كەزدەسۋلەر بارىسىندا ەكىجاقتى جانە كوپجاقتى ىنتىماقتاستىقتىڭ, كوروناۆيرۋستىق پاندەمياعا بىرلەسكەن قارسى تۇرۋدىڭ جانە بۇۇ, ەقىۇ, اوسشك, يىۇ جانە تۇركىتىلدەس مەملەكەتتەردىڭ ىنتىماقتاستىق كەڭەسى سياقتى حالىقارالىق ۇيىمدار شەڭبەرىندەگى ءوزارا ءىس-قيمىلدى نىعايتۋدىڭ وزەكتى ماسەلەلەرى تالقىلاندى.
