وسى جىل سايىنعى ءىس-شارا الەمدەگى ستراتەگيالىق ماسەلەلەر بويىنشا جەتەكشى كونفەرەنتسيالاردىڭ, سونداي-اق ورتالىق جانە شىعىس ەۋروپا (وشە) وڭىرىندەگى ۇقساس پلاتفورمالاردىڭ ءبىرى. COVID-19 اياسىندا ادامزاتتىڭ الدىنداعى بۇرىن-سوڭدى بولماعان قيىندىقتاردى ەسكەرە وتىرىپ, پاندەمياعا بايلانىستى بارلىق مەديتسينالىق شەكتەۋلەرمەن ۇيىمداستىرىلعان «الەمدى بىرگە ەمدەيىك» اتتى فورۋمدا كوپتەگەن ماسەلەلەر تالقىلاندى. كۇن تارتىبىنە پاندەميادان كەيىنگى الەمدىك ەكونوميكانىڭ, ساياساتتىڭ جانە حالىقارالىق ينستيتۋتتاردىڭ بولاشاق دامۋى, داعدارىستان كەيىنگى كەزەڭدەگى ەۋروپالىق وداق پەن وشە ءوڭىرىنىڭ دامۋ تراەكتورياسى, تسيفرلاندىرۋ جانە دەموكراتيانىڭ دامۋى ماسەلەلەرى كىردى.
فورۋم اياسىندا مينيستر م. تىلەۋبەردى سلوۆاكيا, اقش جانە ەقىۇ جوعارى وكىلدەرىمەن قاتار «الەمدى دەفراگمەنتاتسيالاۋ: تىعىز ىنتىماقتاستىققا نەگىزدەلگەن بولاشاقتىڭ كورىنىسى» تاقىرىبىنداعى پىكىرتالاس سەسسياسىنا قاتىستى.
قازاقستان ءسىم باسشىسى ادامزات ەلدەر اراسىنداعى سەنىمسىزدىكتىڭ وسۋىنە الىپ كەلەتىن كوپتەگەن پروبلەمالارمەن بەتپە-بەت كەلىپ وتىرعانىن اتاپ ءوتتى. COVID-19 پاندەمياسىنا بايلانىستى جاڭا حالىقارالىق شىندىق قالىپتاسىپ, ونىڭ نەگىزگى ترەندتەرىنىڭ اراسىنا الەمنىڭ ءارتۇرلى بۇرىشتارىندا شەشىلمەگەن قاقتىعىستاردىڭ شيەلەنىسۋى, الەۋمەتتىك-ەكونوميكالىق جانە تەحنولوگيالىق دامۋداعى الشاقتىقتىڭ ءوسۋى, قورشاعان ورتانىڭ لاستانۋى جانە ت.ب. ماسەلەلەر كىردى. «قازاقستان ءوزارا تۇسىنىستىك پەن قۇرمەتكە نەگىزدەلگەن بارلىق دەڭگەيدەگى سەنىمدى ديالوگتى قولدايدى. قازىر الەمدىك قوعامداستىق مەملەكەتتەر مەن حالىقتار اراسىنداعى ءوزارا قارىم-قاتىناستاردىڭ ساپالى جاڭا مودەلىن قاجەتسىنەدى», - دەدى م. تىلەۋبەردى.
وسى تۇرعىدا مينيستر فورۋمعا قاتىسۋشىلاردىڭ نازارىنا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ 3D جاھاندىق جانە وڭىرارالىق دەڭگەيلەردەگى ديالوگ تۋرالى باستاماسىن ۇسىنىپ, اقش, رەسەي, قىتاي جانە ەۋروپالىق وداق اراسىنداعى جوعارى دەڭگەيدەگى مازمۇندى كەزدەسۋدى ۇيىمداستىرۋ قاجەتتىلىگى تۋرالى يدەيانى ەرەكشە اتاپ ءوتتى. بۇل رەتتە مينيستر پرەزيدەنت قاسىم-جومارت توقاەۆتىڭ الەمدىك پروبلەمالاردى شەشۋگە بارلىق مەملەكەتتەردىڭ ينكليۋزيۆتى قاتىسۋىن قامتاماسىز ەتەتىن باستى حالىقارالىق ۇيىم رەتىندە بۇۇ-نى جان-جاقتى نىعايتۋ قاجەتتىلىگى تۋرالى قاعيداتتى ۇستانىمىن دا اتاپ ءوتتى.
م. تىلەۋبەردى ورتالىق ازياداعى ىنتىماقتاستىقتىڭ وڭ ۇردىستەرىن وڭىرلىك دەڭگەيدەگى تابىستى جانە سىندارلى ديالوگتىڭ مىسالى رەتىندە اتاپ ءوتىپ, مەملەكەت باسشىسىنىڭ قازاقستانداعى بيلىك پەن قوعام اراسىنداعى ديالوگتى نىعايتۋ تۋرالى باستامالارىن ۇسىندى. ونىڭ ايتۋىنشا, ۇلتتىق قوعامدىق سەنىم كەڭەسىنىڭ قۇرىلۋى مەن ناتيجەلى جۇمىسى, سايلاۋ, ساياسي پارتيالار, ميتينگىلەر تۋرالى زاڭنامانى رەفورمالاۋ, ازاماتتىق قوعامدى قولداۋ, سونداي-اق قازاقستاننىڭ ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتىك حاتتاماسىنا قوسىلۋى سياقتى قادامدار «حالىق ۇنىنە قۇلاق اساتىن مەملەكەت» قاعيداتىن دايەكتى ىسكە اسىرۋدى بىلدىرەدى.
وسىعان بايلانىستى پىكىرسايىسقا قاتىسۋشىلار حالىقارالىق قوعامداستىق تاراپىنان ودان ءارى قولداۋعا ءتيىستى قازاقستانداعى دەموكراتيالىق ينستيتۋتتاردىڭ قارىشتى دامۋ تاجىريبەسىنىڭ وڭ ءمانىن اتاپ ءوتتى.
