«مەملەكەت باسشىسى بيىلعى جولداۋدا اگرارلىق عىلىمدى دامىتۋ جانە زاماناۋي اۋىل شارۋاشىلىعىن دامىتۋعا جوعارى بىلىكتى ماماندار دايارلاۋ مىندەتىن قويدى. بۇگىندە الەمدەگى فەرمەرلەردىڭ شامامەن 70%-ى ءبىلىمنىڭ جەتىسپەۋشىلىگىنەن اشقان ىستەرىن جابۋعا ءماجبۇر. بۇل ارنايى وقۋدىڭ جانە بىلىكتىلىكتى ارتتىرۋ مۇمكىندىگىنىڭ جوقتىعىمەن, سونداي-اق اگرارلىق عىلىمنىڭ دامۋىمەن دە بايلانىستى», دەدى مينيستر.
قازىر اۋىل شارۋاشىلىعى مينيسترلىگى اوك سۋبەكتىلەرى ءۇشىن ءبىلىم بەرۋ قىزمەتتەرىن ۇسىنۋ تاسىلدەرىن قايتا قاراپ, وسى ماقساتتا «ۇلتتىق اگرارلىق عىلىمي-ءبىلىم بەرۋ ورتالىعى» كوممەرتسيالىق ەمەس اكتسيونەرلىك قوعامى ەنشىلەس ۇيىمدارىنىڭ قۇرىلىمىن وزگەرتتى. ول حالىقارالىق تالاپتارعا جانە بيزنەستىڭ قاجەتتىلىكتەرىنە باعدارلانۋعا تولىق جاۋاپ بەرەدى دەدى سپيكەر. رەسپۋبليكانىڭ عىلىمي-زەرتتەۋ ينستيتۋتتارىنىڭ, تاجىريبەلىك ستانسالارىنىڭ, تاجىريبەلىك-وندىرىستىك شارۋاشىلىقتارىنىڭ بازاسىندا 22 ءبىلىم بەرۋ ورتالىعى قۇرىلىپ, تۇراقتى كونسۋلتاتسيالىق ورتالىقتار ۇيىمداستىرىلدى.
بيىل ۇكىمەت جانىنداعى جوعارى عىلىمي-تەحنيكالىق كوميسسيا الداعى 3 جىلعا باعدارلامالىق-نىسانالى قارجىلاندىرۋعا 50,4 ملرد تەڭگە ماقۇلدادى. بۇل قاراجات بىلتىرعى ۇقساس كەزەڭمەن سالىستىرعاندا 2-3 ەسەگە كوپ. بيۋدجەتتەن بولىنگەن قوماقتى قاراجاتقا 10 باسىم باعىت بويىنشا 36 عىلىمي-تەحنيكالىق باعدارلاما ازىرلەۋ جوسپارلانۋدا.
«بيزنەستىڭ وتاندىق عىلىمي زەرتتەۋلەرگە سۇرانىسىن قامتاماسىز ەتۋ جانە كاسىبي كادرلار تاپشىلىعىن شەشۋ ءۇشىن بارلىق قاجەتتى نورماتيۆتىك-قۇقىقتىق نەگىز جاسالدى. سونىمەن قاتار ەكى ءىرى اگرارلىق جوعارعى وقۋ ورنى – قازاق ۇلتتىق اگرارلىق ۋنيۆەرسيتەتى جانە ساكەن سەيفۋللين اتىنداعى قازاق اگروتەحنيكالىق ۋنيۆەرسيتەتى «زەرتتەۋ ۋنيۆەرسيتەتتەرى» مارتەبەسىنە يە بولدى. بۇل باعىتتاعى جۇمىستار جالعاساتىن بولادى», دەدى س.وماروۆ.
ۆەدومستۆو باسشىسىنىڭ ايتۋىنشا, ىشكى نارىقتى وتاندىق ازىق-ت ۇلىك تاۋارلارىمەن قامتۋ جونىندەگى «كەشەندى جوسپار» ءبىر ايدىڭ ىشىندە مۇددەلى مەملەكەتتىك ورگاندارمەن كەلىسىلىپ, بەكىتۋ ءۇشىن ۇكىمەتكە جولدانادى.
«پرەزيدەنت قازاقستان حالقىنا ارناعان جولداۋىندا مينيسترلىك الدىنا بىرقاتار مىندەتتەر قويىپ, ولاردى شەشۋ اگروونەركاسىپتىك كەشەندى دامىتۋدا جاڭا سەرپىن بەرەدى. ءبىرىنشى كەزەكتە كەلەسى بەس جىلدىققا ارنالعان «اوك دامىتۋ جونىندەگى» جاڭا ۇلتتىق جوبانى ازىرلەۋ قاجەت. وسى باعدارلامالىق قۇجاتتى دايىنداۋعا FAO بەدەلدى حالىقارالىق ۇيىمى تارتىلدى. ماڭىزدى قۇجاتتىڭ قۇرامىنا ەنگەن العاشقى جوبالار جەلتوقسان ايىندا تۇجىرىمداما تۇرىندە جاسالادى», دەدى جاۋاپتى ورگان باسشىسى.
ءمينيستردىڭ سوزىنە سەنسەك, قازىر جۇمىس توبى قۇرىلىپ, ونىڭ قۇرامىنا «اتامەكەن» ۇكپ, فەرمەرلەردىڭ سالالىق قاۋىمداستىقتارى مەن وداقتارى, اگرارلىق عىلىم وكىلدەرى, سونداي-اق وبلىس اكىمدەرىنىڭ ورىنباسارلارى كىردى. اوك دامىتۋدىڭ 2022-2026 جىلدارعا ارنالعان مەملەكەتتىك باعدارلاماسىنىڭ نەگىزگى قۇجاتىنىڭ جوباسىن ازىرلەگەننەن كەيىن جۇمىس توبىنىڭ قۇرامى كەڭەيتىلىپ, كەڭىنەن تالقىلاۋ جۇرگىزىلەتىن بولادى.
بۇدان باسقا ۆەدومستۆو وكىلدەرى جەكە شارۋاشىلىقتاردا قۇس تۇماۋىنىڭ تارالۋ كورسەتكىشى تومەندەگەنىن جەتكىزدى. اتاپ ايتقاندا, سولتۇستىك قازاقستان, قوستاناي, شىعىس قازاقستان, جامبىل, سونداي-اق اقمولا وبلىستارىندا قۇستاردىڭ جاپپاي قىرىلۋ دەڭگەيى ازايعان.
«بۇگىندە ءار وبلىس بويىنشا اكىمدىكتەر جانىنان جۇمىس توپتارى قۇرىلىپ, بارلىق ولگەن قۇستاردىڭ ەسەبى شىعارىلىپ, وتەماقى تولەۋگە دايىندىق جۇمىستارى جۇرگىزىلۋدە. ەلىمىزدە ەكى قۇس فابريكاسىندا عانا اۋرۋ تىركەلگەن. رەسپۋبليكا اۋماعىنداعى باسقا فابريكالاردا قۇس تۇماۋى انىقتالعان جوق», دەدى سپيكەر.
س.وماروۆتىڭ ايتۋىنشا, وتەماقىعا ءتيىستى قاراجات ءبولىنىپ, جۇمىس توبىنىڭ شەشىمى بويىنشا تولەنەتىن بولادى. مينيسترلىكتىڭ مالىمەتىنە سايكەس, قازاقستاندا قۇس تۇماۋىنان 593 مىڭ قۇس قىرىلعان.
ەلىمىزدە 36 قۇس فابريكاسى جۇمىرتقا وندىرۋمەن اينالىسادى. ۆەتەرينارلىق-سانيتارلىق نورمالارعا سايكەس, قۇس تۇماۋى تىركەلگەن ەكى قۇس فابريكاسىنىڭ جۇمىسى 4 ايعا دەيىن توقتاتىلادى. بەلگىلەنگەن مەرزىمنەن كەيىن كاسىپورىنداردا جۇمىس جاندانادى.
