«قازىرگى ۋاقىتتا رەسپۋبليكا جولدارىندا بارلىعى 11 مىڭعا جۋىق وسىنداي جۇيە جۇمىس ىستەپ تۇر. تەحنيكالىق باقىلاۋ قۇرالدارىنىڭ كومەگىمەن رەسپۋبليكا بويىنشا جىل سايىن 1,2 ملن بۇزۋشىلىق انىقتالادى, بۇل جول قوزعالىسى ەرەجەلەرىن بۇزۋدىڭ 40%-ىن قۇرايدى, بيۋدجەتكە 7 ملرد تەڭگەدەن استام قارجى ءوندىرىلىپ الىنادى. ولار جول قوزعالىسىن قاداعالاۋدا جانە وعان قاتىسۋشىلاردىڭ ءتارتىبىن ارتتىرۋدا ءوز تيىمدىلىگىن دالەلدەدى», - دەدى ءتارتىپ ساقشىسى.
بىراق ءتارتىپتىڭ ساقتالۋىن ماشينالار عانا باقىلامايدى. پاترۋلدىك پوليتسيا ناريادتارى كولىك اعىنى كۇشتى جانە اپاتتىلىق دەڭگەيى جوعارى بولاتىن نەعۇرلىم كۇردەلى ۋچاسكەلەردە جۇمىس ىستەيدى.
ەلدى مەكەندەردە 2 مىڭنان استام مارشرۋت ازىرلەندى, ال قالا سىرتىنداعى اۆتوجولداردا پاترۋلدەۋدىڭ 211 باعىتى ازىرلەندى. مۇددەلى مەملەكەتتىك ورگاندارمەن بىرلەسىپ, تۇراقتى تۇردە جەدەل-پروفيلاكتيكالىق ءىس-شارالار وتكىزىلەدى. اتاپ ايتقاندا, «اۆتوبۋس», «قاۋىپسىز جول», «بورىشكەر» جانە ت.ب.
